مؤمن المحمدي يكتب: بالمناسبة (24) الأبطال في الأدغال
بـ مناسبة سنة جديدة في أبطال أفريقيا، خلينا نحكي مسيرة الأندية المصرية في أفريقيا، كل الأندية المصرية، من أول ما قالوا يا أفريقيا لـ حد دلوقتي، ومع كل ماتش لـ الأهلي في أفريقيا، نمشي حبة، إيه رأيكم؟
توكلنا على الله.
أول بطولة أفريقية اتلعبت كان سنة 1964، مكنتش لسه بطولة ليها شنة ورنة زي دلوقتي؛ بـ العكس، الاتحاد الأفريقي كان بـ يلاقي صعوبة في إكمال عدد مناسب تقام بيه البطولة. مكنش فيه فلوس لـ رعاية البطولة، فـ كان تمويلها من جيوب الأندية.
البطولة كان اسمها: “بطولة أفريقيا لـ الأندية أبطال الدوري”، وبـ التالي كان فيه شرطين لـ الاشتراك فيها:
1. الحصول على بطولة الدوري في بلدك، في آخر سنة قبل البطولة.
2. دفع فلوس كـ اشتراك في البطولة.
طيب، سنة 1964، مين كان حامل لقب الدوري في مصر؟
كانت الترسانة كسبت لقب الدوري موسم 1962/ 1963، ما هو أصل حضرتك أول 13 دوري، الأهلي كسب 11 لقب، والزمالك لقب والترسانة لقب. فـ كان المفروض الترسانة هي اللي تشترك، وده ما حصلش.
ليه؟
علشان الترسانة رفضت تدفع الاشتراك، مكنش فيه حماس لـ البطولة المجهولة، اللي هو يعني بعد ما تروح تلعب في زائير والكاميرون وبلاد الواق الواق، ولما تكسبها، لو كسبتها، هـ تاخد إيه؟ السلطانية؟!
سنتها كسب البطولة فريق كاميروني، اسمه “أوريكس دوالا”.
السنة اللي بعدها، 1965، كان المفروض اللي يشارك هو الزمالك، على اعتبار إنه هو اللي حاصل على لقب موسم 1964، بس ده ما حصلش، علشان البطولة أساسا ما اتلعبتش، وده كان الموسم الوحيد لـ حد وقتنا هذا اللي ما اتلعبتش فيه.
سنة 1966، برضه كان المفروض إن الزمالك هو اللي يشارك، لـ إنه لـ أول مرة في تاريخه، يكسب بطولة الدوري سنتين ورا بعض (لـ حد لحظة كتابة السطور 2016، الزمالك عمره ما كسب الدوري 3 مرات ورا بعض) المهم، خلينا في أفريقيا.
الزمالك برضه ما اقتنعش بـ أهمية البطولة، وما دفعش الرسوم، وما اشتركش، واللي فاز بيها فريق ستاد أبيدجان بطل ساحل العاج، اللي هي كوت ديفوار.
بـ مناسبة كوت ديفوار، إحنا عارفين إن كوت ديفوار معناها ساحل العاج بس دي بـ الفرنساوي ودي بـ العربي, إحنا في مصر، وبـ الأخص جمهور الكورة، ما كناش نعرف اسم “كوت ديفوار” ده خالص، كنا دايما نقولها “ساحل العاج”، لـ حد سنة 1986، وكانت بطولة الأمم الأفريقية هـ تتلعب في مصر.
بعثة “ساحل العاج”، لاحظت إننا بـ نقول اسمهم بـ طريقة غريبة، حاجة كده زي “مصر” و”إيجيبت”، بس “إيجيبت” دي عالمية، فـ إحنا متعودين، إنما هم اتفاجئوا، لـ إنه حتى تونس والجزائر والمغرب، وهي بلاد عربية، بـ يقولوها “كوت ديفوار”.
المهم، بعثة كوت ديفوار في 1986، لما لاحظت إننا بـ نقول اسم بلادهم بـ النطق العربي، اشترطوا إن وسائل الإعلام بتاعتنا لازم تقولها بـ النطق الفرنساوي، وإلا هـ ينسحبوا، فـ استجبنا، وبقى اسمها كده.
نرجع لـ الستينات، وبعد البطولة، جت التالتة سنة 1967، وجه الدور على بطل الدوري المصري موسم 1966، وكان الأوليمبي، أول نادي مصري من خارج القاهرة الكبرى يكسب الدوري المصري، كان جيل عز الدين يعقوب، ومحمود بكر الله يرحمه، وكان نادي قوي.
الأوليمبي، كسر اعتذارات الأندية المصرية عن بطولات أفريقيا، وقرر الاشتراك في البطولة، ودفع الرسوم، وفعلا، كان أول فريق مصري يلعب خارج حدود مصر، وكان أول لقاء ليه مع الهلال السوداني
من هنا نبدأ اللقاءات والأرقام
تابعونا.