سحر نوح: نجم على مفيش!!
لأن وهج الشهرة بيغازل أحلام أي إنسان عنده موهبة وبيكون أمله يأخد فرصة، ظهرت علينا من كام سنة فكرة برامج مسابقات المواهب، والفكرة والنوع ده من البرامج موجود في العالم كله، وخرج منه نجوم كتير عالميين حاليًا، لكن لأننا شعوب ناقلة مش مبتكرة بنقلد شبه الفكرة، نعلن عن المسابقة بشكل سري أو خبيث، ويتم اختيار لجنة من المشاهير وشوية جمهور مدفوع الأجر، ونطلع على لبنان نحجز مسرح ونصور ونبتدي بعدد كبير والتصويت، ومد الإيد في جيبك بدفع ثمن المكالمات والرسايل.
يبتدي، وطبعًا اختيار المتسابقين بيبقى من مختلف الجنسيات العربية، علشان التصويت يسخن كده والفلوس تكتر والإعلانات تزيد وقرب قرب قرب، ويتم اللعب علي عواطف المشاهدين، حبة بكي ودموع على فرحة بإن المتاسبق جاله باباه ومامته زاروه، مفاجأه كده على كام افيه وتصوير ورا الكواليس.
كل ده حلو وجميل ومافيش مشكلة والتصفيات شغالة، ونفضل ننشغل بيا ترى مين حايكسب ومن أي جنسية، لغاية مانوصل للحلقة الأخيرة، ويتم تنصيب مطرب المسابقة وبعد كده بخ فين المطرب؟؟ مافيش مطرب طب فين سيديهاته مافيش سيديهات، ويختفي ويبقي مطرب أفراح وليالي ملاح في بلدهم زي ما كان قبل المسابقة، بس اليافطة تبقي نجم برنامج المسابقات الفلاني، ونبتدي موسم تاني بمطرب تاني، وهكذا وهكذا، فزورة النورة كوانورة.
وارجع وأقول إن الحكايه مش مسابقة، الأهم ازاي تصنع نجم بجد وتتبناه وتوصله للنجومية، تقدمه في برامج، تيترات مسلسلات، وتسجله أغاني، وتهتم بيه سنين مش كام شهر تلم بيهم إعلانات على فلوس اتصالات وبخ وكش ملك، ومع احترامي وبما إني أدعي إن بحكم دراستي وظروف حياتي أعرف إن مافيش في الفن حاجة اسمها الأول أو الأفضل أو الأحسن، فيه الأول بالنسبالي وممكن بالنسبالك لا، فيه الأفضل بالنسبالي وممكن بالنسبالك لا، الفن يعرض ولا يفرض، الفن بستان مليان ألوان، كل واحد بيختار اللون اللي جذبه، وكمان مع احترامي لازم يكون في اللجنة حد متخصص ودارس صوت مش مطرب أو مطربة، ممكن يكون صوته وموهبته محدودة جدًا، وحتي مايعرفش يغني الي بيغنيه المتسابق، ويعيش الدور ويوجه ويعاتب وينجح ويسقط ويحرج ويحرق لينا دمنا.
بالله عليكم يا سادة، اللي يعرف واحد من المتسابقين على مدار الكام سنة اللي فاتوا بقى نجم حقيقي، يشاورلي عليه!!