محمد حربي يكتب : البرامج الكوميدية ..لهذة الاسباب لم ينجح احد
قبل الحديث عن أزمة البرامج الكوميدية اللي انتشرت كالنار في الهشيم في القنوات التليفزيونية ، يجب علينا في البداية توضيح اسباب نجاح برنامج البرنامج ، بين قوسين “باسم يوسف” حتي نستطيع القياس عليه كلما كان هذا ممكنا
1- باسم يوسف نفسه ، راجل بيشتغل علي نفسه ، مجتهد ، يعمل 24 ساعة في الساعة من اجل تطوير ادواته و نجاح البرنامج
2- الظرف السياسي و التاريخي ، شعب بعد ثورة ، اسقط فيها كل المسلمات و المحظورات قبل أن يسقط اي نظام سياسي او ساسة ، من هنا كان سقف الطموحات و الحريات في أعلي مراحله
3- فريق عمل متناغم ، متكامل ، يعمل لأنه مؤمن بالمذيع و البرنامج قبل أي شئ
دول 3 اسباب ظاهرين و واضحين جدا ، تعالوا نشوف البرامج الكوميدية الموجودة حاليا و ترتيبها هنا “ربما” يكون مقصودا
1- سيد أبو حفيظة : شخصية و برنامج سابقين زمنيا باسم يوسف ، لكن عدم تطويرها أدي في النهاية لوفاتها ، لكن نجاح باسم يوسف ثم اختفائه “قسريا” أدي لعودة ابو حفيظة مجددا للساحة ، و للأمانة أكرم حسني يجتهد كثيرا و يحاول تقديم شئ مختلف ، لكن سيف المقارنة دائما موجود ، لكن يبقي لأبو حفيظة انه الاكثر ثباتا و استقرارا في السوق حتي هذة اللحظة ، مع الاعتماد علي فريق كتابة جيد .
2- البلاتوة : احمد امين حقق نجاح علي اليوتيوب بفيديوهات 30 ثانية ، ثم برنامج”البريك ” علي اليوتيوب بردو ، و من الانترنت لشاشة النهار ، مشكلته ان مدة عرض البرنامج اطول مما يحتاج، و لأن عندنا وقت كتير لازم نملاه بأي حاجة ،ده بيخلينا للاسف نكرر اللي بيعمله غيرنا و نخسر نقط تفوقنا ، مع ان الفكرة دايما انك تنمي نقاط القوة مش تخسرها.
3- أشرف يقدمه أيمن : أيمن وتار واحد من فريق باسم يوسف ، و البرنامج بحاجة لاعادة ترتيب اوراقه و بسرعة لأنه بيسحب من رصيد أيمن وتار المكشوف اساسا ، و بيني و بينكم لا تنتظروا اي تغيير قريب لأن الشركة المنتجة صورت و سلمت فعلا 8 حلقات
4- “ما يصحش كده ” اللي فعلا بقي ما يصحش كده ، المشكلة ان القائمين علي البرنامج متصورين ان المشكلة في ورشة الكتابة و ده الخطأ الشهير اللي كل الناس بتقع فيه ..العيب في المذيع و ربنا ، حاجة كده زي ما قال برايز ” انتوا فاكرين العيب في الشريط ..العيب في النظام يا كواركات”
5- Snl و ده بقي منقدرش نحاسبه بنفس الدرجة ، لانه علي قناة مشفرة ، يعني جمهوره محدود مسبقا ، و مشاركة شادي الفونس و خالد منصور “الاتنين كانوا مع باسم يوسف” ساهمت في دفع البرنامج اكيد ، لكن احد اهم عيوبه ورشة الكتابة .
6- العلم و الايماو ..مع انه مش معروض حاليا لكنه حقق نجاح كبير وقت عرضه سواء علي اليوتيوب او علي قناة ontv و من المنتظر عودته و ربما يحدث فارق ما .
7- ابلة فاهيتا ..مثير للجدل احيانا ، مضحك ربما في ظروف غامضة ، لكن يبقي ان اضعف نقطة فيه هي ابلة فاهيتا شخصيا
8- اخطر رجل في العالم ، عرض كبير ، و دول ماتوا اكلينيكيا و ده من فضل ربنا علي المشاهدين
طيب ايه اللي ناقص البرامج دي علشان تبقي ناجحة ؟
الصراحة كلهم منزوعين الدسم ، بلا سياسة و دي كانت نقطة تفوق لباسم يوسف من غير جدال ، كلهم مفتقد الجمهور اللي يدافع عنه، و يرفعه لمصاف البرنامج الجماهيري ، مع ان الجمهور بقي مزاجي اكتر من اي وقت فات ، كلهم مفتقدين ” الشغف ” اللي هو السبب الرئيسي لأي نجاح و استمرارية ، لأن كلهم خضعوا لترتيبات السوق بدون حساب قوة الجمهور و مدي استعداده او رفضه للبرامج دي ، و خلونا فاكرين أن الجمهور اللي رفع باسم يوسف هو نفسه ذات الجمهور اللي هاجمه بعد كده ،يعني علي بلاطة الجمهور مالوش “عزيز” ، كمان القنوات نفسها احد اسباب فشل العديد من البرامج دي ، لانها اتعاملت مع الحدوتة بمنطق ” هاتولي برنامج كوميدي اشمعنا القناة الفلانية ” و ده خلي السوق فيه حمي “البرامج الكوميدية ” و بتبقي النتيجة ببساطة برامج سخيفة احيانا ، زي ما عملنا قبل كده في فرة “الست كوم” اللي قضينا عليها في اربع سنين و بقت مجرد ذكري بنترحم عليها و علي اللي اشتغلوا فيها .
ملحوظة :
1- معظم القائمين علي البرامج السابق ذكرها تربطني بهم صداقات او علاقات عمل و اتمني ان يصححوا مسارهم قبل ضياعه بالكامل
2- مفارقة غريبة ان ياسمين عبد الله صاحبة تجربة otv قعدت في البيت و كل من عمل معها (و انا من ضمنهم ) انتشروا في كل القنوات عقب اغلاق المحطة الا ياسمين عبد الله ..قعدت في البيت ، و ده نفس اللي حصل مع باسم يوسف ، فريقه انتشر بين البرامج و هو اللي قعد في البيت
3- ربنا يسامح اللي كان السبب في ماسورة البرامج الكوميدية
اقرأ أيضًا:
محمد حربي : سطوة السوشيال ميديا ..صناعة النجوم وتحطيم الآلهة
محمد حربي : لماذا غنت أم كلثوم لملك السعودية؟
.