هشام المياني: صحافة برأس نعامة!!
–غريب حال الصحافة والإعلام في مصر والأغرب حال نقابة الصحفيين.
–فجأة الدنيا تولع وقنابل تنفجر وبلالين تفرقع وجرادل مياه تندلق.
–امسك يا ولا.. حلق يا جدع.. اضرب يا كبير.
–تسأل انت ايه اللي حصل يا ولاد؟… فيه ايه يا جودعان؟
–يقولك أصل صحفي اتعرض لموقف محرج مع مصدر أو مسئول؟
–ايه الموقف ده يا جماعة؟.. المصدر قل أدبه عليه وقفل السكة في وشه أو مارضيش يقابله.. أو أو..
–ويا سلام بقى لو كانت المعركة لوشت في طريقها حد من أعضاء مجلس نقابة الصحفيين كرم الله وجوههم وبيضها.
– تلاقي يا عمنا بقدرة قادر البلد كلها مشغولة بالحكاية وكل الصحف والفضائيات والمنابر الإعلامية يتهاتي ليل ونهار في الموضوع وكأنه الحرب العالمية الرابعة- عشان التالتة اتعملت فيلم-.
– وكمان لو الصحافة كشفت مخالفة على مسئول في الدولة بيبقى زي اللي وقع ومحدش سمى عليه يا ضنا أمه.
– لكن أول ما تكشف كارثة أو فساد أو مصيبة عملها رئيس تحرير أو رئيس مجلس إدارة أو حتى حد في نقابة الصحفيين نفسها.
–وكمان لو صحفي اتفصل أو اتعاقب أو اتنكل بيه أو حتى اتقتل.
– كله بيعمل نفسه من بنها.. لا صحف بتنشر ولا فضائيات بتزعق ولا نقابة بتعمل بحق الأصوات اللي اتنبحت لانتخاب مجلسها.
– وكله بيجاهد عشان يعمل نفسه مش هنا.. وفجأة بيغيب كل الضجيج ويحل مكانه صوت صرصور الحقل ينبعث من كل المنابر الإعلامية أو من مبنى النقابة
– حاجة زي اللي بيقولوا عليها ” أسد على غيري نعامة على نفسي”.
ملحوظة:
– أنا مش ضد فضح مخالفات المسئولين أو خوض معركة مع أي مسئول أو مصدر يتطاول على زميل، بالعكس ده المطلوب، ولكن عشان الناس تصدقنا لازم نبدأ بنفسنا.
–وبالمناسبة هل تعلم أن نقابة الصحفيين لديها صلاحية بموجب المادة 48 من قانونها أن تتخذ قرارات ملزمة ضد أي مسئول في صحفية يتجاوز في صلاحياته؟.. طبعا محدش هيصدق عشان ولا مرة حسستنا نقابة الصحفيين إن ليها صلاحية!!.
اقرأ أيضًا:
هشام المياني: كيف تصبح مقربًا من أصحاب السلطة؟
المياني يشكو النجار أمام نقابة الصحفيين
هشام المياني: علشان رئيس تحريرك يحبك