مصطفى حمزة يكتب : أختي العزيزة.. عروس بنها
أختي العزيزة عروس بنها
بالصدفة قرأت عن اللي حصل ليلة زفافكن الجماعي في “استاد بنها”، وتحول ليلة عمركن إلى “فضيحه” حسب ما نُشر.. ومع ذلك وجدت نفسي مدفوعا للرد عليكن.. “والنبى ما تكبروهاش وكملوا فرحتكم”.
وتعالوا مع بعض نبص للموضوع ببساطه.. فين “الفضيحه” بالظبط”.. في الزفة ولا الصور المنشورة؟.. وعلى ايه بالظبط الزعل؟.
بالعكس انتي تحمدي ربنا انك في أيام زي اللي بنعيشها دي، ومحاوطنا فيها “الحزن “.. ربنا أكرمك في يوم فرحك .. وبقيتى “ملاك سعادة”، فأكيد بالمسافه من مبنى الشئون الاجتماعية إلى الاستاد مريتم جنب كام واحد وواحدة محتاسين يتجوزوا إزاى؟! ودعوا ربنا ينولها لهم… وناس تانية طلعت من قلبها ضحكة الفرح الصافيه .. وأكيد فيه غيرهم أكتر دعوا لكم “ربنا يتمها لكم على خير ويسعدكم”.. ده غير أمهات بصوا للسما ودعوا ببيت العدل لبناتهم.
زعلانه ياعروسة، عشان حد مش فاهم ولا مقدر قيمة ليلة نبيلة زى دى، وحب يعمل فيها شهم على حسابكم ..ويتهم الوزارة بالتقصير.. ياستي، ياما ناس بتتجوز فى فنادق فخمة والمعازيم بيطلعوا، وهات يا تريقة ع البوفيه، واللى حصل فيه، غير قعدات النميمة، و”شفتي فلانة لابسة ايه.. وعلانة لازقة فى فلان ليه؟.
طيب سيبكم من دة كله، وتعالوا بقى لقصة الفساتين، اللى رجعت تانى يوم، بذمتكم متعرفوش إن معظم عرايس مصر حاليا بيأجروا فستان الفرح.. وبعد الحفلة بتبقى أخت العريس أو العروسة واقفة مستنياها عشان تاخده وتلحق ترجعه تاني يوم الصبح لمحل التأجير.
أما اللي ماقدرش أوضفه ولا ارد عليه بالكلام، وهو حساسية مشاعر اليتيم، فدي تفتكروها وتترحموا على أولياء أموركن، وتدعن ربنا يعوضكن عنها خير وسعادة .. وتكون دافع انكم تسكنوا وتعيشوا في بيوت عامرة بالفرحه.. ومن قلبكم تغنوا مع منير “الدنيا لو جارحه لونها لون فرحه”.
اقرأ أيضًا:
رصد شامل لمواقع بث سموم التحريض في عقول المصريين
قائمة الموافقين على التنازل للسعودية عن جزيرتي تيران وصنافير
تعرف على “أبو جلابية” الذي أحرجه الرئيس
حرب خرائط بين السعودية ومصر .. لمن النصر؟
أسوأ 11 تصريحًا عن “تيران وصنافير”
تعرف على مواقف 14 شخصية عامة من جزيرتي “تيران وصنافير”
.