جندي مجنّد ..حصرياً من ديوان كَلَامْ بالِوقّة لأحمد شبكة
ينفرد إعلام.أورج بنشر قصيدة جندي مجنّد من ديوان “كَلَامْ بالِوقّة” للشاعر أحمد شبكة والمنتظر صدوره واقامة حفل توقيعه قبل نهاية شهر أبريل الجاري.
جندي مجنّد
كِبِر الولد
و بقى له لازمه و عوز
لجل البلد
ترخص عيوني الجوز
مع انه بيني و بين نفسي
و بين بيني
اغلى كتير يا الولد م الروح و من عيني
حضنتُه حُضن خفيف
من غير ما تبّت قوي
يا شاب لما نزل… ترك لي قلبي عجوز
كِبِر الولد
و انفَرَد
طولُه و طال السما
عدت سنين الطفوله و عنها شب و نما
انا كنت نايم؟ و باحلم؟
و لا باجري اجيب
من بكره قوت البيوت
و التوت عشان يعصر
يشرب و يعصر و يشرب
و الليالي تفوت
و انا المحاسب و حاسب كل ليله انما
كبر الولد
و استوى
و طلع له تفاحه
و الصوت بقى له شنب بس العيون واحه
و زمانه واقف مزنهر عرقُه بالل ريق
كل اللي شايفه
و شايفه للسلامه طريق
جندي مجند و صالب طول
و شبه البدر
يا شمس لو ناويه تقسى
اقسى بالراحه
كبر الولد
ع الدلع
و الطبطبه مانكرش
إيّاكوا بس تلوموه علشان ابوه…. ماكبرش
للحصول علي كتب مجانية أضغط هنـــــــا
