١٠ اغنيات اسمعها لما تعوز تشحن أمل
أسماء العسكري 
فجأة المود بيضلم بسبب او من غير وعشان كدة لازم نبقي جاهزين بكل الأسلحة اللي نقدر عليها للمواجهة والحق يقال ان المزيكا والأغاني اصدقاء مخلصين جدا في الحياة ، سعادة غير مكلفة بهجة بلا مقابل .. حبي واحترامي لكل الفنانين اللي بيتجمعوا ب صوت ولحن وكلمة عشان يعبروا عن كل احساس وحالة بنعيشها، معتقدش مرة كنا في حالة نفسية معينة وما لقيناش اغنية مترجمة كل حرف وكلمة محبوسة مش عارفة تخرج ،الأغاني كفيلة تنقلك من عالم ل عالم بأقل مجهود … اسمع الـ 10 اغاني اللي جاية ولو عجبتك تقدر تضيفها لقائمة أغانيك وما تنساش تشاركها مع اللي بتحبهم
الأغنية: الدنيا ريشة في هوا
المطرب: سعد عبد الوهاب
كلمات: مأمون الشناوي
الحان: محمد عبد الوهاب
غناها مطربين ومطربات كتير لكن انا اخترتهالكم بصوت مطربها الأصلي سعد عبد الوهاب، اغنية بتحلو كل ما يعدي عليها الزمن “ياللي بتسأل عن الحياة خدها كدة زي ما هيا” قالها سعد عبد الوهاب من 60 سنة تقريبا ولحد النهاردة مش قادرين نستوعب ان الحياة باكيدج مش هينفع تتفصل علي مزاج حد يا تاخدها علي بعضها وترضي أو تعيش في عالم موازي .. انصحكم تبدأوا بيها
الأغنية: لسه في الايام امل
المطرب: شيرين عبد الوهاب
كلمات: نادر عبد الله
الحان: وليد سعد
من اعظم الاعمال الفنية التي خرجت للنور في اخر 10 اعوام حققت نجاح مبهر وإقبال جماهيري مش عادي شيرين من حقها تفتخر بأغنية صادقة وملهمة زي دي في سيرتها الذاتية.
بعتبر الاغنية دي طبطبة جاية في وقتها ولا مرة كنت حزينة ومكتئبة وسمعتها وما اتشقلبش مودي للأحسن علي طول .. “طول ما لسه فيه ناس بنتدفي ب حنانها” مين ممكن يحزن ولسه اللي بيحبهم حواليه حاضنينه مهما كانت درجة اليأس والاحباط وجود اللي بتحبهم حواليك فرحة وأمل وطاقة ايجابية ..
طول ما لسه العمر بيصالح سنينه … لسه في الايام امل
الأغنية: ليه لأ
المطرب: واما
كلمات: محمد عطية
الحان: نادر حمدي
كلام الأغنبة ممكن ميبقاش دافع قوي لـ “شحن الأمل” بس كل ما يقولوا ليه لأ دي كفاية جدا تجدد الأمل في روحي .. كل مرة اسمعها بحس الكلام ليا انا ! ليه لأ هيحصل ايه يعني جربي روحي كملي اكسبي او اخسري المهم تتعلمي بالإضافة لأن المزيكا مبهجة جدا جربوها
الأغنية: والله حلوة
المطرب: أنغام
كلمات: محمد عاطف
الحان: محمد يحيى
اغنية ناعمة جدا و احساس انغام العبقري بياخدك ل الدنيا الحلوة اللي بتحكي عنها … “ربنا ما خلقناش نتألم عادي بنغلط وبنتعلم” رسالة مهمة ربنا ما خلقناش في الدنيا للمعاناة والألم والأحزان ربنا خلقنا نعصي ونتوب ونتعلم ونؤمن بحقيقة وجوده و رحمته التي وسعت كل شيء كلام مهم بس الأهم الطريقة اللي بيوصلك بيها معتقدش لو كان اتقال في 100 خطبة كنت هحبه زي ما حبيته من أنغام
الأغنية: خايف من بكرة ليه
المطرب: علي الحجار
كلمات: عبد الرحمن الابنودي
الحان: عمر خيرت
عندما يجتمع ثلاثة عمالقة معا فالنتيجة بنسبة 100% ستكون عمل فني بقيمة خايف من بكرة ليه .. بساطة كلمات الابنودي وواقعيتها وعمقها تمتزج ب لحن الكبير عمر خيرت لتصل إلي الحنجرة الذهبية علي الحجار .. ” اليأس مش هيوصلك” حط الأغنية في قايمة أغانيك وأنت مغمض والجملة دي اكتبها في ورقة وعلقها في اكتر مكان عينك بتقع عليه كل يوم .. ونخاف من بكرة ليه مين عارف بكرة ايه ..
الأغنية: علي صوتك
المطرب: محمد منير
كلمات: كوثر مصطفى
الحان: كمال الطويل
اغنية اهداء لكل اللي الناس الجدعة المعافرة اللي صبرهم ما بيخلصش اللي بيتحدوا الزمن كل يوم ” ولو في يوم راح تنكسر لازم تقوم واقف كما النخل باصص ل السما” وممكن نعمل قائمة كاملة فقط لأغاني الكينج منير
الأغنية: كون سعيد
المطرب: بلاك تيما
كلمات و الحان : محمد عبده
بلاك تيما واحد من أشهر ال underground bands المصرية عندهم رصيد كبير من الأغنيات اللي نشحن بيها أمل اخترتلكم منها ” كون سعيد”
“لسه البراءة في القلوب لسه الطيابة في الحياة مالية الدروب” كملوا شحن للأخر
الأغنية: افتح قلبك تفرح
المطرب: نانسي عجرم
من الأغاني اللي ما خدتش حقها وممكن كتير منكم ما يكونش سمعها قبل كدة .. أغنية مبهجة للمبهجة نانسي عجرم دعوة للسعادة عنوانها ” أفتح قلبك” القلب المقفول محروم من الفرحة
الأغنية: افرد جناحك
المطرب: كايروكي
https://soundcloud.com/ahmed-yehia-2/eo91pgdvtciw
“انت كل حاجه بتحلم بيها انت املك الوحيد ” الخلاصة ومن الأخر ما تستناش حاجة من حد اسعي واجتهد اقع وقوم اختار طريق وكمله لأخره الحكاية بتبتدي وتنتهي عندك انت ايوة انت
“وكل حاجه بتدور عليها جوه منك بتناديك”
الأغنية: اي دمعة حزن لا
المطرب: عبد الحليم حافظ
كلمات: محمد حمزة
الحان: بليغ حمدي
حليم أيقونة الحب والرومانسية .. رغم احزانه وقصة حياته اللي مليانة وجع كان وسيظل من مسببات السعادة عند المصريين … صوت بيحضنك وإحساس بيطير بيك … أغنية لكل واحد بيحلم يلاقي الحب بعد الفراق والوجع
قال إيه جاي الزمان يداوينا من إيه جاي يا زمان تداوينا
ده احنا حبينا حبينا حبينا وارتحنا وانسينا
هيفضل الحب سر الأمل في بكرة.
اقرأ أيضًا:
اتهام هيفاء وهبي بإهانة الحجاب
يوسف الحسيني يجيب على سؤال المليون جنيه لأحمد موسى
نائب يعرض تسليم جزر جديدة للسعودية
رصد شامل لمواقع بث سموم التحريض في عقول المصريين
قائمة الموافقين على التنازل للسعودية عن جزيرتي تيران وصنافير
.