إعلام.أورج يرصد: أغرب 20 تصريح إعلامي في 2014
إسراء النجار
مع الساعات الأخيرة لعام 2014 يرصد إعلام.أورج أغرب 20 تصريح لمقدمي البرامج،تسببت في ردود فعل وأزمات على مدار عام كامل..
محمود سعد يتذكر: بلكونة وإزازة بيرة وقميص نوم
“زمان كان الراجل بيقعد في البلكونة ومعاه إزازة البيرة وجنبه مراته واقفة بقميص النوم، ويقعدوا يلعبوا كوتشينه ويشربوا بيرة، في ناس كانوا كدة، والبيرة كانت بتتباع عند عم كامل بتاع البيبسي والعصير، بس كانوا بيعرفوا ربنا كويس أووى وكانوا متدينين أوووي، كانوا يعرفوا حق الجيرة ويعرفوا احترام الشارع، ويعرفوا يعني إيه أخلاق، إنما النهاردة إيه اللي حصل”.
عمرو أديب يفسر: هو الراجل بيتجوز ليه؟
“هو مش من وظايف الزوجة إني لما أسيب البنطلون تشيله، ولما أسيب الطبق تغسله، أومال أنا متجوز ليه، بلا مساواة بلا كلام فارغ، أنا متعلمتش كل التعليم ده عشان أشيل الطبق اللى أكلت فيه، حتى لو وصل الأمر إلى الطلاق، لا يجوز للزوج أن يساعد زوجته فى الأعباء المنزلية، هى دورها أيه فى البيت غير كده، لماذا يتزوج الرجل”.
توفيق عكاشة يفتي: فلوس السبكي حرام
“انت تاجر مواشي حتي لو تاجرت في الطيارات هتاجر بطريقه المواشي، عيب تكون تاجر مواشي وتجري ورا الستات وتعمل نفسك منتج سينمائي علشان الستات، بتقول عاوز تعمل إعلانات عندي في القناة، دا انت كلك علي بعضك بأفلامك بفلوسك محرم عليا وعلي الشعب المصري وعلي قناه الفراعين”.
إبراهيم عيسي: طلعوا الإسلام من الخلافة الإسلامية
شوية أبو بكر بالإنتخاب وعمر بالتعيين، علي بالإنتخاب الحر المباشر، معاوية بحرب أهلية طاحنة رهيبة، كل واحد بيورث ابنه، طلعلي بقي الإسلام من ده بقي، خلافة إيه، ده كان نظام حكم، نظام أسود كله قمع، وحروب أهلية، وقتل، وصراعات حكم، وبالمناسبة كل الزمن ده كان كده”.
أحمد موسى وحمدين صباحي: حديث الجزمة
“400 ألف اللي عملوا توكيلات للمشير، جزمة أي واحد منهم أشرف منك وأشرف من أي حد حواليك، لأن دول مواطنيين مصريين، لا حد قبضهم ولا حد قالهم ينزلوا، دول شرفاء مصر، أومال حضرتك اللي قابض، قول لنا تموليك، قول لنا مين بيصرف عليك، من ينفق علي حملة حمدين صباحي؟”.
أماني الخياط: المغرب= إيدز + دعارة + حكومة إسلامية
” إنتوا عارفين ترتيب المغرب في الدول المصابة بالإيدز رقم كام!، إنتو عارفين إن واحدة من أهم اقتصاديات المغرب، هي اقتصاديات الدعارة، بس هناك الحكومة إسلامية”.
يوسف الحسيني: زلبطة!!
“قمت بحلاقة رأسي تمامًا زلبطة.. تنفيذًا لما تعهدت به، رغم أن ذلك لن يغير من الواقع شيئا.. فالمحافظ لن تتم إقالته، لا يزال المحافظ يعيش فى منزله الرائع الفخم اللى محصلش فى محافظة الإسماعيلية، حاجة شياكة فرنساوى من بتاع زمان يا سلام عليك يا سيادة اللواء القصاص، مهيص إنت والناس طالعة تربانتين أبوها”.
مها بهنسي: الشعب بيتحرش.. الشعب بيهيص
لماذا يتحرش المصريون في ميدان التحرير من وجهة نظر مها بهنسي؟
“مبسوطين بقى، الشعب بيهيص”.
تامر أمين: امنعوا العُري
“هو إنتو ليه يا فنانات يا محترمات بتتعمدوا التعري، الفنانين دايمًا عاوزين يكونوا مختلفين من بين الناس وده بيحصل عن طريق اللبس، تلاقي الفنان لابس بدلة بتلمع من كل حتة كأنه جايبها من أنوار العتبة، والفنانة لابسة ترتر وكل الألماس الموجود، ورافعة شعرها علشان تسحب العين وتبقى مختلفة ومميزة، أنا مش عارف ايه الحكمة في ده، يعني كل ما أبقي نجم أكتر، كل ما أقلع أكتر”.
القرموطي لأردوغان: طلع الشيطان اللي جواك
انت كل ما تتطلع، طلع الشيطان اللي جواك، ومش وراك غير مصر، لكن توصل لمرحلة انك تقول ان ليك حق تتدخل في الشأن المصري، الراجل عايزينا نبقي ولاية من ولاياته، ايه يا اخوانا ده، يعني انت خلاص المسائل مأثرة عليك للدرجة دي، ابقي خش الحمام كتير يا سيدي، متقعدش كل شوية تقولي من حقنا، حقك ايه يا عم انت، خليك في حالك، الله يكرمك”.
الدرديري لخالد أبو النجا: يا سوسو!!
“يا سوسو، أيه الجمال ده والحلاوة دي، ما أنت كنت واقف لمبارك وبتطبل وبتصفق كمان، وبتزغرط وماسك صاجات، ثورات ربيع عربي ايه بقي اللي بتتكلم عليها، أي حد كان ليه يد في المصايب اللي كانت البلد فيها يكتم ويخرس خالص، مهو كان من شلة وائل غنيم خالد بيه أبو النجا، وكان من شلة الناس الحلويين اللي بهدلوا البلد، وجاي عايز يكمل عليها، اللي ملكش فيه يا شاطر متتكلمش فيه، دي مصر يا خالد مش المانيا”.
رانيا بدوي لسفير أثيوبيا: الزم حدودك!!
لقد تجاوزت حدودك معي وأنا لا أُوصِّف كلام حضرتك، ولا يجب أن تُوصِّف كلامي، ولا يجب أن تحدثني عن التعالي، من حقي أن أسال الأسئلة التي يراها ويسألها الشعب المصري، هذه أسئلة وليست مزايدات، فالدبلوماسية تحتم عليك أن تجيبني على سؤالي أو الاكتفاء بقول لا تعليق”.
محمد الغيطي عن محمد عطية: كومبارس وإمعة.. ولأحمد فتحي: طظ فيك
لما الاقي الأخ الكومبارس بتاع ستار أكاديمي محمد عطية يشبه نفسه بعمر بن الخطاب، ويقولك أنا مع مبارك وكنت ضد يناير وشايف أنها مؤامرة ودلوقتي شايف إن السيسي مؤامرة، بقي الكومبارس بيتكلم عن السيسي والشعب وثورة يونيو، الإمعه بيتطاول علي جيش وشعب مصر عشان حد يفتكره ويشير كلامه، هؤلاء سفل وفسل، وأنا قولت قبل كده معني الكلمة دي، الفسل هو ذكر النخيل الذي لا يبلح”، وبعد إعلان اللاعب أحمد فتحي توقيعه لنادي قطري غضب الغيطي وقال لفتحي “طظ فيك” الشعب المصري يحتقرك أنت وأبو تريكة!!
محمد شردي: هناك ما هو أهم من مؤخرة هيفاء
“الناس مشغولة جدًا بمؤخرة الفنانة هيفاء وهبي، طب إيه حكاية البرنامج اللي خرجت بيه الست هيفاء وهبي بمؤخرتها، والناس كلها ما بين مؤيد للست هيفاء ومابين اللي بيشتم شتيمة غير طبيعية في الست هيفاء وهبي، لو كان الفستان ده اتلبس في قنوات أخري بره مصر كان ممكن يكون مقبول، وحتة بقي انها جايبة الفستان ومخدتش بالها لامؤاخذة ان الاضاءة لما تكون زيادة الفستان هيبن اللي بينه، دي مسائل اعتقد انها ليس من المفترض أن تشغل مجتمع، انتو عندكوا حاجات أهم بكتير من الست هيفاء ولا مؤاخذة من مؤخرة الست هيفاء”.
أسامة منير: باسم بتاع العجل
“يا باسم إحنا مش هانسمح لك بأي شكل من الأشكال أن تتهجم علينا بألفاظ قذرة وبقلة أدب، يا باسم يا يوسف لو جواك حاجة حرقاك علشان مش قادر تتطلع قلة أدبك على الشاشة تاني لأن الراجل اللي موجود دلوقتي راجل محترم، ومش هانسمحلك التطاول على رئيس الجمهورية أو على الإعلاميين أو على البلد اللي عملتك بني آدم، ويا باسم متغاظ ليه علشان الإخوان اللي بيأكلوك عيش مشيوا من البلد، أقولك يا باسم موت بغيظك، علشان هاتفضل طول عمرك باسم بتاع العجلة، أنا مش هقولك حاجة تاني، لأن متستاهلش أكتر من كده”.
أحمد موسى: لا لكبت الحريات
“أنا غاضب من الكلام الذي صدر بالأمس عن مؤسسة الرئاسة، بإن الرئيس عبدالفتاح السيسي بصدد إصدار قانون ضد من يهين ثورتي 25 يناير و30 يونيو، مبدئيا هذا القانون لو صدر سيكون موجه ضد الإعلام والصحافة التي تتحدث عن النشطاء وحركة 6 أبريل، وأنا سأظل أتحدث عنه، ومن سيضار من هذا القانون، الإعلام والصحافة بالكامل، فهو سيعني كبت الحرية ومنع التعبير عن الرأي”.
نائلة عمارة: موتوا بفيروساتكم
أشهر تصريح في 2014 للمذيعة المتقاعدة نائلة عمارة في برنامجها “حزب الكنبة”، كانت نائلة ترد على الاتهامات الموجهة لجهاز علاقة فيروس سي والإيدز، وقالت أنها متقينة من نجاح الجهاز لهذا تطالب برصد كل من هاجمه وعدم علاج من يصاب منهم بالفيروس مستقبلًا، اللافت أن البرنامج توقف في سبتمبر الماضي ولم يعاصر مرحلة عدم الإعلان عن تجميد الجهاز.
عبد الرحيم علي: دربوا وائل غنيم على البكاء
“دموع وائل غنيم مع منى الشاذلي في أثناء ثورة 25 يناير هي دموع التماسيح، وائل متدرب كويس وعارف هو بيعمل إيه كويس جدًا، كان بيؤدي دور في محله تمامًا لإيصال الإستراتيجية الأمريكية لمنتهاها، وخداعنا”
توفيق عكاشة عن محمد رمضان: سمكري بوابير الجاز
“فيلم عبده موته طلع لنا ممثل شمام وسمكري بنسميه في البلد عندنا سمكري بوابير الجاز، اللي بيقوم بلحام البوابير بالأزير أمام بيوت الفلاحين في القرى، ده بنقول عليه شمام، يعني المدعو السبكي طلعلنا ممثل شمام، عشان يكون نموذج للشباب المصري، ويعلمهم البلطجة وحمل السلاح والرقص علي مسارح الأفراح بالسيوف”.
عزيزي القارئ: رشح لنا أغرب تصريح لإعلامي في 2014 من وجهة نظرك