زينة لمحكمة الأسرة: تعبت من التشهير بأولادي

استمعت محكمة الأسرة، اليوم الخميس، لأقوال الفنانة زينة أثناء نظر دعوى بطلان حكم إثبات نسب طفليها المقامة من الفنان أحمد عز ضدها.

وقالت زينة للمحكمة: “أنا خدت حكم من محكمة أول درجة بإثبات نسب طفلى للفنان أحمد عز وتم تأييده في اﻻستئناف وخلاص.. أنا تعبت من التشهير بيا وبأوﻻدي، أنا نفسي أعيش زي الناس حياة عادية مافيش فيها مشكلات وولادي يكونوا زي باقي الأطفال مش كل يوم سيرتهم بالصحف والقنوات وأترحم من التقطيع فيا كفاية بقا ظلم وتجريح فيا وبأولادي”.

يذكر أن محكمة استئناف الأسرة قد قضت فى 13 يناير الماضى بتأييد حكم أول درجة بثبوت نسب توأم الفنانة زينة للفنان أحمد عز، وأسست المحكمة حكمها على شهادة شهود الفنانة زينة الذين قالوا إن”عز”و”زينة” قد تزوجا فى حفل بفيلا شقيقتها “نسرين” بالرحاب.

وكان الفنان أحمد عز قد قال في مُداخلة هاتفية على قناة “CORRECT”،: “كلامي مش هيتغير من هنا لحد ما أموت، ومعنديش قلق من القضية دي”، وأضاف ساخرًا: “أنا متأكد يعني”، وتابع: “ربنا عالم بالحقيقة، صورتي عند ربنا أهم من صورتي عند الناس، حتى لو هبطل تمثيل وهفتح كشك سجاير، أنا مش بهزر في الحاجات زي دي، الموضوع منتهي”.

وواصل تعليقه على “خلافه مع زينة بشأن قضية نسب أولاده”، قائلا: “حتى لو حاولتي تعملي ايه تكتبي أو تغلطي أو تأجري ناس تكتب، فربنا اللي مقدره هو اللي هيحصل، واللي عارفني عن قرب متأكدين إني معملش كده، وعارفين أنا مين ومتربي إزاي، ولكن سنُة الحياة كل ما يبقى فيه نجاح لازم يبقى فيه هجوم”.

وأكد أنه “يرفض الخوض في أعراض من تحدثوا عنه بسوء”، مضيفا: “للمرة المليون، مش ههزر مع ربنا مهما حصل، لو هفتح كشك سجاير ومش هتكلم في أعراض عشان عيب رجولتي تمنعني أتكلم في حاجة زي دي”.