مصطفى شعبان يحقق أمنية والدة شهيد كرداسة

نشرت الإعلامية إيمان الحصري، صورة على صفحتها الشخصية على موقع “فيس بوك”، تجمعها بالفنان مصطفى شعبان ووالدة الشهيد النقيب هشام شتا، والذي استشهد في مذبحة كرداسة الشهيرة في أغسطس 2013.

وكشفت الحصري، كواليس تلك الصورة، قائلة: “الحكاية بدأت برسالة من والد الشهيد النقيب هشام شتا بيحكي في الرسالة إن والدة الشهيد هشام بعد ما شافت فيلم اسمه “كود 36″ بطولة الفنان مصطفى شعبان واللي فيه شبه كبير جدا من ابنها الشهيد -وبالصدفة كمان كان عامل في الفيلم دور ضابط شرطة- بدأت تبكي بحرقة وتنادي عليه وتحتضن الشاشة وتقول ده هشام”.

وأضافت الإعلامية: “والد الشهيد كان عاوز يسعد أم الشهيد ويفرح قلبها ولو لدقائق، فطلب مني إني أزورها بصحبة الفنان مصطفى شعبان في البيت لأنها لو شفته هتشوف فيه ابنها، وهتبقى سعيدة ودي أمنية لها، وإنه بعت الرسالة من وراها عشان لو وافقت تبقى مفاجأة ولو رفضت متزعلش، والرسالة بتاعته انتهت على كده”.

وتابعت: “وصلت لمصطفى شعبان اللي كان صعب الوصول إليه عشان بيصور شغل رمضان ومن غير تفكير أو تردد الحقيقة أول ما عرف الحكاية وافق على طول على الزيارة وكان متحمس جدا وحددنا الميعاد مع والد الشهيد إننا هنروح النهاردة”.

واستكملت: “الأب قرر يعملها مفاجأة للأم وفهمها إن زملاء هشام (الله يرحمه) جايين يزوروها وكانت محضرة سفرة كاملة احتفالا بيهم، الحقيقة المشهد اللي فتحت فيه الباب و لقت قدامها مصطفى شعبان و الله العظيم مش لاقيه أي كلام يوصفه، بس ممكن كل واحد يتخيل حجم المفاجأة والدهشة والدموع والوجع والفرحة والألم والأمل لأم اعتقدت ولو لدقائق أن ابنها عاد إلى حضنها”.