الليثي للمسئولين: اتقوا ربنا في الناس
سخر الإعلامي عمرو الليثي من إدارة متابعة الأزمات بمجلس الوزراء، قائلًا: “تصدقوا اكتشفت إن فيه عندنا إدارة اسمها إدارة متابعة الأزمات بمجلس الوزراء.. طب دي بتعمل إيه.. ودورها إيه.. وإيه هي الأزمات اللي حلتها هي أو الحكومة؟.. تفتكروا عملوا إيه في أزمة الأسعار اللي ارتفعت وبقت نار، ولا أزمة الدولار.. ولا كوارث المستشفيات وطوابير المرضى أمامها؟.. أقول لكم أنا؟.. ولا حاجة، لأن الأزمات زي ما هي بتحاصرنا من كل حتة وكل مكان”.
وعلى جانب آخر أشار الليثي خلال تقديمه حلقة الجمعة من برنامجه “واحد من الناس” الذي يُعرض عبر شاشة “الحياة”، إلى أن حوادث الطرق زادت بشكل كبير جدًا والملاحظ أن أغلبها على طرق الصعيد وطريق قنا البحر الأحمر، مُضيفًا: “يا هيئة الطرق.. أرواح الناس اللي بتموت دي مش غالية مش كدة! اتقوا ربنا وشوفوا ايه مشكلة الطريق دا وطرق الصعيد، كلها حرام عليكم”.
وأوضح الليثي أنه مع دخول الصيف تزايدت انقطاعات الكهرباء خاصة في المنوفية وأسوان والعريش والشيخ زويد، مُتابعًا: “يا وزير الكهرباء، يا وزارة، الدنيا حر والصيف شكله هييجي سخن، اتقوا ربنا في الناس، الناس مبقتش مستحملة”.
واختتم مقدم برنامج “واحد من الناس” قائلًا: “فاكرين من كام سنة لما طرحت مشكلة مصرف أبو الريش في أسوان اللي بيصرف مياه الصرف الصحي والصناعي على النيل والدنيا اتقلبت وخرج رئيس الحكومة وقتها يؤكد أنها كارثة وستحل في أسرع وقت؟.. راحت حكومات وجت حكومات، ورؤساء وزراء ومسئولين زاروا المصرف لحل المشكلة بس مفيش حاجة اتحلت، لا الصرف وقف على النيل ولا الحكومة عندها حل أساسا”.