مصطفى حمدي يكتب: قواعد "الريموت" الأربعون (فطروني ١)
كل سنة وانت طيب ، كل سنة وأنت محبوس أمام شاشة صغيرة تستهلك من طاقتك ومشاعرك كل ما أدخرته طوال العام لهذه الأيام ، لا أتحدث عن جيبك الذي خوى ، ولا عمرك الذي أفنيته في طوابير السوبر ماركت ، أنت الأن أمام المعركة الأهم .
في تمام العاشرة من مساء أمس الأحد – وقفة رمضان- نجحت قواتنا الدرامية في الاستحواذ على ريموت التليفزيون وفرض سيطرتها على ذوق الأسرة الكريمة في ست ساعات ، العائلة المصونة التي تتأفأف من نسوان مصطفى شعبان ، وشجن علا غانم تحت الدش أعلنت استسلامها للأمر الواقع.
هو ده الكلام ، فمعركة المشاهدة في كل بيت مصري تبدأ بالاستحواذ على الريموت كونترول وفرض قواعد للتعامل مع الشاشة على مدار 30 يوما ، عايز تعرف الطريقة ؟ خد الأربعين قاعدة دول وانت هتمشي في السليم .
1- اختيارك لمشاهدة مسلسلات مصطفى شعبان يتناسب طرديا مع مدى قوة ايمانك وعدم تأثرك بهذا الكم الكبير من الفاتنات الحلويات الراقصات منهن والتائبات ، لو ايمانك قوي بص على أبو البنات نظرة أولى لك اما الثانية فعليك والله أعلم .
2- للبنات فقط .. بلاش ظافر العابدين قبل الفطار ، قلنا اهو .
3- لاتشغل بالك بالهري على السوشيال ميديا ولا تستمع لاراء النقاد والكتاب والسوشيالجية فيما تشاهده .
4- استقل بدماغك وحدد أهدافك بعد اليوم الثالث ، حتى لو قررت تتابع حنان شوقي في ليالي الحلمية ستة ، مش عيب خالص ومتخبيش دي أذواق والله .
5- ليلى علوي زي عمرو دياب بالظبط ، كل مابتكبر بتحلو وبتلف ويتقطقط وبتـ …. اللهم اني صائم .
6- عادي لما يسرا ترجع تعمل مريضة نفسيا وباقتدار ، القاعدة تقول أن النجم لما بيتزنق بيعمل مجنون ، عادي جدا .
7- لو انتي بتحبي حماقي متتفرجيش على الأسطورة ، رمضان وحماقي لايجتمعان في قلب واحد .
8- اعلان فودافون زيه زي اعلان بيبسي ، زي كل اعلانات النوستالجيا والحنين للماضي ، لسة عندك طاقة تكتب على الفيس بوك : كنت هدمع لما شفت السقا بحمالات ابراهيم عيسى ؟!
9- رامز بيلعب بالنار بعد الأذان مناسب جدا لأي ربة بيت ملحقتش “تسوي” الفطار كويس .. بايخة عديها .
10- تاني .. بلاش ظافر العابدين قبل الفطار يابنات .
11- لو شفت القيصر “بيحزق” في مشهد من المشاهد ، متحاولش تقرب من التليفزيون ، مش لازم اشرحلك يعني .
12- عادل امام مليونير بخيل ، تيمة مهروسة تلاتين مليون مرة اشهرها مسلسل “البخيل وأنا” ، عادي هو من امتى الزعيم بيخترع ، اتفرج وانت ساكت .
13- لاتشغل بالك في عد كم الشلاليت والشتايم التي سينالها رامز جلال ، هذا طقس رمضاني معتاد فلا تندهش .
14- عمرو سعد بالصعيدي تجربة تستحق المتابعة ، بضمان الكاتب عبدالرحيم كمال ، والحكم بعد المشاهدة .
15- لو كنت من هواة السسبنس اتفرج على جراند اوتيل .
16- الفواصل الإعلانية لم تعد فرصة لالتقاط الأنفاس ودخول الحمام واصطياد مافاتك من الصلاوات ، الإعلان بقى فرجة ومساحة للهري والنقد ، ريح نفسك ومتشغلش بالك بيها ، أرجع لقديمو .
17- لهواة النوستالجيا ، هات مسلسل ليالي الحلمية ، حطة على برنامج بيت العيلة وماما نجوى ، وفوقيهم اعلان فودافون ، ورشة ” مفيش مشكلة” مع محمد صبحي ، واقعد عيط على الزمن الجميل ، بس بعد رمضان الله لا يسيئك .
18- بنات سوبر مان ، المعادل الأنثوي للرجل العناب بس على نضيف ومتكلف .
19- الحمد لله مفيش الكبير أوي السنة دي .
20- رمضانك “اون” بيومي فؤاد .. مش اون حاجة تانية الحقيقة .
21- عفاريت محمد أمين راضي تم سلسلتها بنجاح هذا العام ، لو كنت تبحث عن بديل لن تجد سوى 7 أرواح .
22- بلاش ظافر العابدين قبل الفطار يابنات .. فاهمين .
23- خلي الكلام بينك وبين اللي حواليك “صد رد” قلل الهري على قد ماتقدر .
24- اسم مسلسل يحيى الفخراني “ونوس” وصور الدعاية قادرة تقفلك من المسلسل قبل ماتشوفه ، يهده الانطباع الاول .
25- الحالة الوحيدة اللي هتقلب فيها على قناة العاصمة لو عملوا عرض هدية لحاف فايبر مجانا لكل مشاهد هيحول على القناة في رمضان .
26- لهواة الإعلام الهادف ، عندك “قمرة” الشقيري اتفرج واحكيلنا الله يكرمك .
27- أين عمرو خالد ؟ يبحث عن طريق للحياة .
28- ” هاني في الأدغال ” .. لا تعليق .
29- المغني محمد منير ، فيلم وثائقي عن كيفية تصوير اعلان لشركة محمول يتصدره مطرب كبير .. هذه القاعدة لا تنطبق على دراويش الملك ، هنتفرج يعني هنتفرج .
30- بلاش ظافر العابدين قبل الفطار يابنات والنبي .
31- لو تيتر ليالي الحلمية الشهير بصوت محمد الحلو أثر فيك والدمعة فرت من عينك ، ارجع للقاعدة رقم 17 فورا .
32- أي مقارنة مطروحة بين محمود عبدالعزيز وباسم السمرة حول شخصية مزاجنجي تندرج تحت بند “الكيف بيذل” .. بس مشاهدية .
33- بعد تقديمها شخصية المريضة نفسيا في حكاية حياة ، غادة عبد الرازق تدخل الخانكة ، هذه المرأة لم تجد من يحنو عليها .
34- كلية الحقوق تعلن عن فتح باب القبول للكيرفي والمليلفات والبرونزاجات ، مش مصدق اتفرج على هي وادفنشي .
35-أول حلقة من “يوميات زوجة مفروسة أوي” تريقة على الزمالك والزملكاوية ، واعلان فودافون جايب مشهد لاطفال على تي شيرت كل طفل مكتوب رقم من 1 لحد 6 ، الاسقاطات دي لايمكن أن تمر مرور الكرام ، أين انت يا بوعرايس ؟ أين انت ياسيادة المستشار ؟ احذروا غضب الالهة البيضاء .
36- لو فقدت الأمل انك تخس ، اتفرج على طارق لطفي في “شهادة ميلاد” ، الراجل جالة اسقربوط عشان يتقن دوره .
37- في الوقت اللي “اتسلسل” فيه كل مقدمي برامج التوك شو ، نفسنة الستات لاتتوقف في رمضان طارق نور .
38- معز مسعود الباحث عن الحقيقة ، أول داعية يتقمص شخصية مفيد فوزي .
39- حقيقة علمية ، التيترات اتعملت علشان تشوفها وتسمعها على يوتيوب وفيس بوك بس .
40- نكتة كل سنة ، انا قررت اخس في رمضان .
نرشح لك : تفاصيل الدورة الثانية لمهرجان “إعلام.أورج” رمضان 2016
