مؤمن المحمدي يكتب : ضربة البداية (موجز أخبار المسلسلات ١)
الحلقة الأولى من أي مسلسل بـ أعتبرها زي “الوعد”، المفروض صناع أي عمل بـ يقدموا من خلال الحلقة دي وعودهم لـ المشاهد بـ اللي هـ يشوفه طوال شهر كامل، ومحدش يقدر يحكم على حاجة من مجرد وعود، يدوب تقدر تتكلم عن الموضوع.
شفت الحلقة الأولى لـ ست مسلسلات، حتى الآن، وما اختارتش المسلسلات بـ معنى إن اللي بـ ألاقيه قدامي بـ أشوفه، وهـ أقول لك في السطور الجاية اللي وصلني، وعموما المقالات الأولى هـ تبقى لـ الحلقات الأولى، لـ حد ما المسلسل اللي هـ اتابعه يشدني لـ وحده، أو أقرر أقضي بقية الشهر على القهوة أوفر لـ الدماغ والقلب والراحة النفسية.
هي ودافنشي: محمد الحناوي تأليفا وعبد العزيز حشاد إخراجا، صناع العمل بـ يقدموا حاجات عادية وأقل من العادية بـ اعتبارها فتح من الله، ده بـ يقول لك الناس دي بـ تفكر فيك ازاي كـ متلقي.
يعني المرافعة الفظيعة اللي قدمتها كرما (ليلى علوي) في المحكمة، والمفروض إحنا ننبهر بـ ذكاءها، أنا عن نفسي ما انبهرتش بـ حاجة، الكلام ده بِطِل من التسعينات، وقفلة الحلقة اللي المفروض نحبس أنفاسنا بـ سببها، حبست فعلا نفسي، بس علشان الأصوات ما تطلعش.
عموما، مش هـ نحكم على حاجة دلوقتي، خلينا نمشي كام حلقة كمان.
ليالي الحلمية ج6: أيمن بهجت قمر وعمرو محمود ياسين كتابة، ومجدي أبو عميرة إخراجا، والله وكمان والله، حاولت أتفرج وأنا فاصل عن تاريخ العمل، ولو إن التاريخ عبء صعب تتخلص منه، المهم إن النتيجة طلعت أسوأ، اللي وصلني إننا قدام بكائية على الزمن الجميل اللي راح، والأيام الغبرة اللي إحنا عايشينها، مع إدانة لـ الجميع، وربنا يخلف ظننا.
الخروج: محمد الصفتي تأليفا، ومحمد العدل إخراجا، أكتر مسلسل واعد لـ حد دلوقتي، التحقيق في جريمة قتل، الجانب البولييسي مش هو الموضوع، الفكرة وعود بـ عالم فيه شخصيات ثرية، كل شخصية واضح إن وراها حكايات هـ نعيش معاها الشهر، وفيه عمود فقري واضح لـ الحبكة.
اللي قالقني إن المسلسل فيه ريحة من فيلم سفن، بس ربنا يخلف ظني.
القيصر: محمد ناير تأليفا، وأحمد نادر جلال إخراجا، ويوسف الشريف، هنا لازم نقول الممثل الرئيسي، لـ إنه بالع الحلقة، وعموما يوسف الشريف قدر في السنين الأخيرة يخلق عالم وجمهور، بـ غض البصر عن نوع ومستوى العالم ده والجمهور دول.
الحلقة الأولى مافيهاش أحداث تقريبا، وده غريب على النوع ده من المسلسلات، معظمه فرشة لـ الشخصية الأسطورية الفظيعة المريعة الشنيعة اللي هـ نتابعها، بس المفروض كان يدينا أمارة تخلينا نحب نتابع الشخصية غير عضلاته وقدراته القتالية، خصوصا إن مستوى مشاهد الأكشن متواضع إلى حد كبير، وفيه لونجيييير في مشاهد سلوموشن لـ القيصر، وهو يعني ما يآخذنيش على قده خالص، واللي كان بـ يسنده الحدوتة المثيرة.
مش عارف، الصبر يا رب.
أفراح القبة: بـ أشوف المسلسل ده بـ مشاعر متناقضة، وترددت في الكتابة عنه، بس المشاهد مالوش دعوة بـ دواخلي، عموما الوعد اللي في المسلسل إننا هـ نشوف مباريات تمثيل، بـ استثناء جمال سليمان، اللي لهجته واقفة فـ زور الشخصية، لكن إياد نصار وصبري فواز وصابرين ومحمد العدل وصبا مبارك وكلهم كلهم بـ يعملوا شغل عالي، وهـ أستأذنكم أتكلم في المسلسل ده عن الممثلين بس.
راس الغول: وائل حمدي وشريف بدر الدين تأليفا، أحمد سمير فرج إخراجا، تخيل مطاردة طويلة عريضة، تلاتة عمالقة راكبين عربية أعملق منهم، بـ يطاردوا راجل مسن راكب توكتوك، تخيل المطاردة العبثية دي أصلا أصلا محشورة في الأحداث حشر، ومصادفات غير منطقية، وكل الشخصيات بـ تتصرف من غير مبرر، وأخيرا كمية استظراف غير طبيعية.
أتمنى الدنيا تتحسن، ده لو كان لينا عمر ومشاهدة.
أحبطتك؟
معلش
خلينا لـ الأيام الجاية
تابعونا
نرشح لك
تفاصيل الدورة الثانية لمهرجان “إعلام.أورج” رمضان 2016
بالساعة والدقيقة.. مواعيد مسلسلات رمضان 2016
شارك واختار من النجم الأفضل في إعلان فودافون رمضان ٢٠١٦؟ اضغط هنـــا
