مؤمن المحمدي يكتب: ليس بـ الكادر وحده يحيا الإخراج (موجز أخبار المسلسلات2)
بعد حلقتين من مسلسل “سقوط حر” أقدر أقول إنه ليس بـ الكادر وحده يحيا الإخراج، وليس بـ التفاصيل وحدها يحيا السيناريو، وليس بـ النجم وحده تحيا المسلسلات، ده إجمالا.
بـ تفصيل شوية نقول إننا طول الحلقتين عمالين نشوف كادرات وشوتات المفروض إنها جمالية، ماشي يا عم شوقي يا ماجري، إنت مخرج جامد آخر حاجة، وعمالين نشوف تفاصيل، وتفاصيل تفاصيل التفاصيل، ماشي يا مريم يا نعوم، ماشي يا وائل يا حمدي، إنتو كتاب عباقرة، وعمالين نشوف وش نيللي كريم من غير ما تنطق، ماشي يا ست النجمة إنتي شرحهم، رهيبة.
بس يا جماعة، وجهة نظري المتواضعة، التي لا قيمة لها على الإطلاق (بـ صوت مدحت شلبي) إن عناصر أي عمل فني أو إبداعي، مجرد خدم وحشم لـ السيد الأكبر، المعنى، إحنا هدفنا في الآخر نقول “حاجة”، مش شرط بقى الحاجة عميقة سطحية جادة هزلية متأملة مسلية، كله حلو، بس إحنا في المسلسل ده لـ حد دلوقتي مش بـ نقول حاجة.
اللي بـ أفهمه في شغل الدراما، مسلسل/ سيما/ مرسح، صناع العمل بـ يحرصوا على خلق حافز عند المتلقي إنه عايز يعرف إيه اللي حصل، أو إيه اللي هـ يحصل، أو الاتنين، لكننا هنا مش عارفين: إحنا مستنيين نعرف اللي حصل، ولا اللي هـ يحصل، مش جامع بين الاتنين، لأ، تايه بينهم، وده بـ يعمل حاجة مش كويسة:
مثلا، أنا مش فاهم خالص ردود فعل الشخصية اللي بـ يلعبها أحمد وفيق، يعني هو هادي جدا، متماسك لـ الغاية، بـ شكل لا يتناسب إطلاقا مع مواطن شرقي عادي عرف إنه مراته اتقتلت، وإن اللي قتلتها أختها، لـ إنها ظبطتها مع جوزها، لا، مش بس كده، ده متعاطف مع القاتلة، ومهتم جدا بـ حالة ابنها النفسية، لأ مش فاهم، فعلا مش فاهم.
أما التفاصيل، فـ كتير منها مالوش أي تلاتين لازمة، ومتنفذ وحش، زي الممرضة اللي بـ تتدخل في شغل الدكتور، إحنا مالنا؟ طيب على الأقل هاتوا ممثلة عدلة تعمل المشهد. أو إنهم يستهلكوا مشهدين تلاتة في إنهم يلاقوا جوز القتيلة، علشان موبايله مقفول ولازم تبعت له ماسيج، تفاصيل تفاصيل، ومش بـ تقول حاجة
أغلب ظني، وربنا يخلف ظني، إنهم معتمدين على شعبية نيللي كريم، وجرعة النكد السنوية اللي بـ يحبها المصريين، حاكم هم يعزوا النكد زي عينيهم، وإننا هـ نقضيها ريكأشنات ومشاهد مؤثرة، والأحداث تبقى تيجي على مهلها، أو ما تجيش مش مهم.
خلينا ما نحكمش ونتابع، قولوا يا رب.
على جنب، وده خاص بـ كل المسلسلات:
هو إيه اللي إنتو بـ تكتبوه في التترات ده؟
بـ جد، إيه ده؟
يعني إيه النجم فلان الفلاني؟
هو مش ده ممثل وإنتو جايبينه علشان هو نجم؟ ولا مش هو/هي مش مصدقين وبـ يحلفوا لنا؟ ولا عندهم مشاكل في البيت بـ يحلوها؟ ولا إيه بـ الظبط؟
لأ، وظهور خاص وظهور متميز وظهور لافت، وظهور ابن العمدة، والممثل القدير والممثلة الفشيخة، وشكر خاص، واللي تحط اسمها في آخر، هو إيه الشقلباظات دي؟
المفروض إن التيتر بـ نعرف منه صناع العمل، مش فرح وكله عمال ينقط.
وإحنا خسرانين إيه؟
لأ خسرانين، لـ إن “النجم” لما يشترط إن اسمه ينزل بـ شكل معين، ويثبت ع الشاشة زمن معين، بـ يأثر على باقي صناع العمل، فـ اسمهم بـ يعدي في زمن ما ينفعش تقراه أصلا، وفيه ناس اسمها بـ يسقط، أو يترحل لـ تتر النهاية.
ارحمونا شوية
بكرة نشوف أعمال تانية
تابعونا
نرشح لك
مؤمن المحمدي يكتب : ضربة البداية (موجز أخبار المسلسلات 1)
تفاصيل الدورة الثانية لمهرجان “إعلام.أورج” رمضان 2016
بالساعة والدقيقة.. مواعيد مسلسلات رمضان 2016
شارك واختار من النجم الأفضل في إعلان فودافون رمضان ٢٠١٦؟ اضغط هنـــا
