عبد الله غلوش يكتب: غلوشيات رمضانية 4
– ماسبيرو زمان مش معناها انه لازم المحتوي كله يكون ابيض واسود ، للاسف صفاء حجازي بتتعامل مع المحطة بمنطق المعلبات ، مفيش تغيير لمضمون الخريطة عشان يناسب رمضان .. مفيش عمو فؤاد ولا بوجي وطمطم ولا حوار صريح جدا ولا يا تليفزيون يا .. مفيش فوازير ولا الف ليلة ولا ابراهيم نصر .. مفيش بدون مونتاج ولا بدون كلام ولا اي برنامج كان ممكن يخلي المحطة رقم ١ في رمضان.
– اياد نصار 7 ارواح افضل من اياد نصار افراح القبة .. سوسن بدر ولد فضة افضل من سوسن بدر جراند اوتيل .. درة ليالي الحلمية والخروج الاتنين اسوأ من بعض.
– ولو انهم بقوا كتير بشكل مستفز ، لكن اللي اعرفه ان اللي بيفطر جهرا في رمضان ربنا اللي يحاسبه مش الداخلية.
– سقوط حر .. ممكن تفوت حلقه النهارده وتشوف حلقه بكره عادي ومفيش حاجه هتفوتك غير ان صفاء الطوخي عملت كيس باميه وحطته في الفريزر وكتبت عليه باميه.
– سقوط حر .. مشكلة مسلسل نيللي كريم السنة دي انه مافيهوش غيرها .. مفيش روبي ” سجن النسا” ولا جميلة عوض ” تحت السيطرة”.
– سلوي خطاب “نيللي وشيريهان” .. مصطفي ابوسريع “راس الغول” .. احمد حلاوة “ولد فضة” .. اجمد 3 كوميدينات السنة دي.
– لكل اللي انتقدوا ليلي علوي ومني زكي ، احب اقولكم ان ليلي عزالعرب و طارق صبري علي وشك الجواز في الكيف.
– أفراح القبة .. مني زكي بتدي درس للفنانين اللي بيقيسوا ادوارهم بالشبر.
– افراح القبة .. واضح ان محمد ياسين عامل ترتيب الحلقات علي حسب المشاهد اللي صورها مش وفقا للاسكربت .. بدليل انك في حلقه واحده ممكن تلاقي مشهد من الحلقه التالته مع مشهد من الحلقة 16 مع مشهدين من الحلقة 24 وأدينا بنتفرج علي أي حاجة وخلاص.
– بالمناسبة السعيدة دي هي صابرين في افراح القبة اتسجنت امتي وخرجت ازاي وكانت مسجونة ليه أساسا؟
– شخصية الراجل الغني المحترم اللي مش بيلجأ لتجارة الاثار والسلاح والمخدرات او غسل الاموال ، تكاد تكون معدومة في الدراما السنه دي ، والظاهر انها بقت معدومة في الحياة كمان.
– ظهور خالد الصاوي اعاد الحياة لمسلسل هي ودافنشي.
– ماتنتظرش تشوف ماتش حلو في اليورو قبل دور الـ 8.
– هو مش المفروض حملة “محاربة الفساد” دي الحكومة توجهها للموظفين بتوعها ، ولا الاعلانات دي معمولة للشعب عشان تقولهم احنا عارفين مصادر الفساد فين وساكتين؟.
– مريم امين في القاهرة اليوم .. Welcome back .
– شاطئ ستانلي في اسكندرية زرعوه وعملوا فيه خيمة رمضانية اسمها “خان اسيا”.
– 7 ارواح .. ممكن استوعب كمية الناس اللي بتموت وتدفن وتصحي تاني دي عادي جدا ، بس فكرة ان خالد النبوي يزق العسكري بالطريقة الساذجة دي فالعسكري يغمي عليه ، مش قادر ابلعها الحقيقة.
– الحاج بتاع اعلان اسمنت الممتاز انت هاتطلع بالتالت .. اجمل حاجة في “صد رد” حتي الان.
– بعد 4 حلقات .. عادل امام لسه مجاش.
– والله انا اعرف اللي يسرق حاجه يطلع يقول ان فلان سرقها من اول يوم مش بس عرضها ب ٣ ايام .. وبعدين on بقالها شهر منزله outdoor في الشوارع بصور نيللي ويسرا ، ليه العدل جروب محسسني انهم اتفاجئوا بعرضها يعني؟
– من مكاسب رمضان السنه دي عوده يسرا والفخراني واجازة شوبير وبني ادم شو.
– لا ناهد السباعي عرفت تجاري ايمي سمير غانم ، ولا ايمي عارفة تجاري دنيا سمير غانم.
– ربنا يرحمك يا أمي ويرحم أمهاتنا جميعا ويخلي امهاتكم يارب.
نرشح لك
عبد الله غلوش يكتب: غلوشيات رمضانية 3
تفاصيل الدورة الثانية لمهرجان “إعلام.أورج” رمضان 2016
بالساعة والدقيقة.. مواعيد مسلسلات رمضان 2016
شارك واختار من النجم الأفضل في إعلان فودافون رمضان ٢٠١٦؟ اضغط هنـــا
