مؤمن المحمدي يكتب: مسلسل رميت طوبته (موجز أخبار المسلسلات 3)

بعد رابع حلقة أقدر أعلن بـ كل ثقة أول مسلسل أرمي طوبته، وأتوقف عن متابعته، وهو مسلسل “هي ودافنشي”.

ولـ إن الواحد مش بـ يحب يتكلم عن الأعمال مش عاجباه، فـ مش هـ أتكلم كتير عن المسلسل، بس أحب ألفت النظر لـ عدة أمور، أو أفكر معاك بـ صوت عالي، يمكن:

أولا، الزمن بـ يمر، بـ يعدي علينا، وإحنا عايشين جواه، فـ إحنا لازم نتطور، لـ إننا لو ما اتطورناش، بـ نختفي، اللي نقدمه سنة 2010 ما ينفعش نقدمه في 2016، فـ فكرة الشخصية الغامضة اللي إحنا ما نعرفلهاش، واللي ليها أطوار غريبة، وبـ تدور حواليها الأحداث، وبـ يتسمى بـ اسمها المسلسل، دي خلاص بح، ما عادتش تنفع، حتى لو خليناه مش معروف إنس ولا جن، عايش ولا ميت، حتى لو سندناه بـ “هي” وجبنا ليلى علوي شخصيا تعمل دور هي، خلاص الموضوع ده جاب آخره.

ثانيا، المكياج والحفاظ على الشكل الأمور الشاب حتى في سن متقدمة، وعمليات التجميل، والتخسيس، وسيشنز التصوير، فوتو شوب أو مش فوتو شوب، كل دي حاجات ممكن تكون لطيفة، أو ضرورية لـ نجمة عايشة وسط كريمة المجتمع، بس لما نتكلم عن التمثيل، فـ ده حاجة تانية خالص.

التمثيل يعني تشخيص، تشخيص جاية من الشخصية، والشخصية ليها أبعاد كتير غير الشكل، فيه حاجات نفسية واجتماعية واقتصادية، فـ لما الممثلة تدخل المسلسل بس بـ شكلها، شكلها ده بـ يبقى ماسخ، اشتري مني، بـ يبقى ماسخ والله.

ثالثا، الإخراج مش معناه حد يدير اللوكيشن وخلاص، الإخراج رؤية، روح، وجهة نظر في الحياة، الإخراج في الدراما هو سيد العمل، هو اللي بـ يحول الكلام على الورق لـ حاجات من لحم ودم، علشان كده مهم جدا التعامل مع مخرج بـ حق وحقيق، الحكاية مش أكشن وفركش، وهايل عظيم، نكست.

متهيألي كده كفاية.

مسلسل القيصر بقى بعد رابع حلقة مش قادر أحدد منه موقف، بس هو ناجح لـ حد دلوقتي، يخليني مستني أعرف إيه الحدوتة، وده في حد ذاته نجاح، وعموما يوسف الشريف وأحمد جلال من الناس اللي فاهمين هم عايزين يقدموا إيه لمين ازاي؟ فـ في الطريق لـ ده مش بـ يهتموا بـ أي حد برة دايرة جمهورهم.

جمهور الشريف، هو اللي مدي على دراما غربية أفلام ومسلسلات، بس مش دايسين أوي فيها لـ صعوبات كتير، منها عدم توفر الأعمال الأجنبية بـ سهولة، والمتوفر عايز غلبة علشان توفر الترجمة، فـ بـ يحبوا النسخ العربية منها.

من المنطلق ده، بـ يهتموا يعملوا عمل تشويقي، مع مراعاة تنويع مصدر التشويق من سنة لـ سنة، يعني هم السنة دي طلعوا بره دايرة جريمة القتل، سواء كان قاتل تسلسلي، جريمة قتل عادية، وكل الكلام ده، لكن تفضل ملحوظة مهمة:

لو أنا ممثل على قدي، وعارف إن أنا ممثل على قدي، وعنصر قوتي هو ذكائي وجسمي، ونوعية الأعمال اللي أنا بـ أقدمها، ضروري جدا أتسند على ممثلين تقال، ما ينفعش كل طقم التمثيل يبقى جي من التلاجة.

ثم إنه فيه عناصر ضرورية لـ عمل من النوع دي، زي الإبهار في الصناعة، واستغلال كل الإمكانيات لـ عمل الشو، بس اللي أنا شايفه عمل فقير من كل النواحي، اعتمادا بس على حبكة التشويق، بس في ظل المنافسة الشرسة دي ده مش كفاية، خصوصا إن ده أضعف ورق اشتغله يوسف الشريف من ساعة المواطن إكس.

أخيرا، أنا مش طالب من الله ولا يكتر على الله أكتر من إني أشوف مسلسل لـ غادة عبد الرازق ما تقولش فيه كلمة “وسخة” وهي بـ تصرخ، يا رب

نرشح لك

مؤمن المحمدي يكتب: ليس بـ الكادر وحده يحيا الإخراج (موجز أخبار المسلسلات2)

تفاصيل الدورة الثانية لمهرجان “إعلام.أورج” رمضان 2016

بالساعة والدقيقة.. مواعيد مسلسلات رمضان 2016

شارك واختار من النجم الأفضل في إعلان فودافون رمضان ٢٠١٦؟ اضغط هنـــا