محمد المعتصم يكتب: اللهم أعز الإسلام بنائب رئيس حى العجوزة

نقلاً عن “الوطن”

«قال علمنى اسمها إيه قال تعالى فى شهر رمضان واعمل فيها ساموراى الإسلام»، سيفك فى إيدك موظفينك تحت إيدك، عساكرك وأمناء الشرطة بتوعك واقفين على رنة، وهوب حملة محترمة على المقاهى التى تعمل فى الصيام، وامسك يا جدع شوية فاطرين على ملاحدة.

لا أعرف نائب رئيس حى العجوزة الذى قام بحملة عسكرية لتطبيق شرع الله، لكن ما سمعته أن الرجل كان عضواً فى الحزب المصرى الديمقراطى، وهو حزب مدنى على ما أعرف ليس من مبادئه تغيير المنكر باليد، بالكتير آخرهم يغيروا أو يحدثوا صفحة الحزب على السوشيال ميديا، لكن دين وشريعة وحملة أمنية لتطبيق الحدود فدى ما أخدوهاش فى الكلاس، ما سمعته عن الرجل نفسه أنه يحب «الشو» زى عينيه، وما أجمله من شو لما يكون فى سبيل الله.

أعتقد أن رب العزة سيكون راضياً أكثر لو أن سعادة نائب رئيس حى العجوزة خطف رجله برجالته وموظفيه ومتاريسه وأمناء شرطته إلى حوارى الحى ليرى العذاب اللى هو ألوان، كان رب العزة سيرضى عنه لو تواصل مع شركة مياه الشرب عن المناطق التى قطعت فيها المياه نهار رمضان، لو تجول حول المدارس التى تعقد فيها امتحانات الثانوية ووفر للطلاب والطالبات كام مروحة -مش هقول تكييف- تنفعهم وتهوّن عليهم الحر والتسريبات، لكانت عند الله أفضل من اللف والدوران على المقاهى مصطحباً معه مندوبى الصحف، لو نفذ الرجل حملة جادة للقضاء على القمامة من الشوارع وتبنى فكرة (العجوزة منطقة نظيفة) ونزل بنفسه مع العمال وطلاب الجامعات، مستغلاً الحالة الإيمانية اللى عند الناس فى الشهر الكريم، ونظف الحى بالكامل وخلاه يبرق كانت الصحافة ستهتم وستكتب وتشيد به وستنشر له صوره وتصريحاته، لو تجول فى الشوارع الضيقة وتخلص من السيارات اللى بتركن صفين، وأصحاب المحلات اللى فاتحين الشارع ع محلاتهم ووسع الطرق، كان سيلاقى الحسنيين، الناس هترضى ورب العباد سيجازيه خيراً.

هناك مليون طريقة تجعل الصحافة والإعلام اللى بيتنشقوا على موظف عام يعمل بدون ما يفتح الدرج يهتمون به كمسئول فى حى مهم مثل حى العجوزة، غير أنه يقول للطلاب: اللى هنشوفه ع القهوة هنديله بالجزمة، لم يختر نائب رئيس الحى أى طريقة للفت الانتباه مما تحتمها عليه وظيفته واختار الطريق الأسهل مخاطبة الناس من منطقة الدين، حبة عيال فاطرة ولازم يتمسكوا.. طيب خلاص مسكت العيال ولميت الكراسى من على المقاهى وحميت الإسلام حل بقى مشاكل المواطنين.

نرشح لك

محمد المعتصم يكتب: إلهام شاهين فى الأدغال

بالساعة والدقيقة.. مواعيد مسلسلات رمضان 2016

شارك واختر من النجم الأفضل في إعلان فودافون رمضان ٢٠١٦؟ اضغط هنـــا