عبد الله غلوش يكتب: غلوشيات رمضانية 8
– في يوم واحد ، روجينا اتطلقت في “الطبال” واترملت في “الاسطورة”.
– الحقيقة الواضحة في رمضان السنة دي ، ان مصر مافيهاش نجيب محفوظ ولا أسامة انور عكاشة تاني.
– اذكر كام مرة فكرت تجيب فيها قناة ten من اول رمضان؟
– ياريت يا جماعة اللي عايز يمدح حد يمدحه من غير mention ، انت المفروض بتقول رأيك فيه لوجه الله أولأنه يستاهل المدح فعلا ، مش عشان تعرفه انت كاتب ايه عنه وتعرف الناس انه عندك في الـ friend list.
– سقوط حر .. المسلسل الأبطأ في رمضان.
– سقوط حر .. “انتي معانا هنا ولا مع الأسف” .. سلوي عثمان لما تحب تقلش.
– سقوط حر .. اول مرة اشوف سواق ميكروباص يتضرب ، وياخد عربيته ويمشي عادي كده.
– سقوط حر .. مشوفتش ممرضات في مستشفي حكومي بالطيبة دي من ايام المرحومة أمينة رزق.
– سقوط حر .. صفاء الطوخي كانت عاملة محشي لادم ، وعملت لنفسها كفته ومكرونة سباجتي.
– للسنة التانية علي التوالي ، النسخة الـ 3D من بكار حاجة تسد النفس .. ربنا يرحمك يا دكتورة مني ابوالنصر.
– مأمون وشركاه .. الظهور الأول لشريف عامر في الدراما السنة دي.
– في نفس اليوم اللي يوسف الشريف هرب فيه من السجن في القيصر ، بيومي فؤاد دخل السجن في نيللي وشيريهان.
– الاخوة اللي بتعمل شير لأي حاجة ، علي فكرة شاي ليبتون الاحمر هو نفسه شاي ليبتون الأصفر ، بس مغيرين لون العلبه ، وماعتقدش ان تغيير لون العلبه ده بيجيب سرطان.
– احمد السعدني رائع في وعد ، وهايل في أفراح القبة.
– كفاية قلش علي حادثة اغتيال رفاعي الدسوقي .. ونراعي حرمة الموت شوية.
– فوق مستوي الشبهات .. تخيل في كام واحد وواحده حواليك بيعملوا فيك زي يسرا ما بتعمل مع شيرين رضا كده.
– اعلان مستشفي القلب .. مجدي يعقوب ياخوانا ياخوانا.
– اعلان مستشفي القلب .. صوت حماقي وصورة حازم امام بجوار حسام غالي ، احلي حاجة في الاعلان.
– اعلان مستشفي القلب .. ياريت دنيا سمير غانم تنصح الأخ هشام جمال بأنه يكتفي بالتلحين والتوزيع بس لأن صوته وحش.
– اعلان مستشفي القلب .. اسعاد يونس افضل من طلتها في اعلان فودافون.
– اعلان مستشفي القلب .. نيللي كريم ضحكت اخيرا.
– ونوس .. لما يكون كل الممثلين هايلين ومحطوطين في ادوارهم صح .. يبقي شادي الفخراني هو البطل الحقيقي للمسلسل.
– راس الغول .. ايه قيمة اني اتفرج علي مشهد مطارده اكتر من 6 دقايق بين المتهم مصطفي ابوسريع وظابط الامن الوطني رامي وحيد ، طالما اتقبض عليه في الاخر.
– انا لو مكان رئيس جهاز حماية المستهلك احترم نفسي واستقيل.
– يونس ولد فضه .. 3 حلقات بدون حدث واحد جديد او مفيد.
– كل ما تنجح ، كل ما هتلاقي اللي يتمني لك الفشل والخسارة .. سناء شافع “الميزان”
– تحت القبة رقاصة ولموأخذة قرني .. سيد رجب “افراح القبة”.
– اللي يخبي علي مراته انه عنده الفلوس دي كلها أسوأ من اللي يتجوز عليها .. لبلبة “مأمون وشركاه”.
– ربنا يرحمك يا أمي ويرحم امهاتنا جميعا ويخلي امهاتكم يارب.
نرشح لك
عبد الله غلوش يكتب: غلوشيات رمضانية 7
تفاصيل الدورة الثانية لمهرجان “إعلام.أورج” رمضان 2016
بالساعة والدقيقة.. مواعيد مسلسلات رمضان 2016
شارك واختار .. ما هو مسلسل الكرتون الذي تتابعه بانتظام؟ أضغط هنـــا
