عبد الله غلوش يكتب: غلوشيات رمضانية 11
– أوسطه مغفرة.
– بداية من اليوم ، ممكن تبطل تتابع اي مسلسل وتتفرج علي آخر حلقتين منه ومش هاتحس انه فاتك كتير.
– سميرة عبدالعزيز يادوب خرجت أمبارح من العناية المركزة في ” الخانكة ” دخلتها النهاردة في “أبوالبنات”.
– لكل واحد عجبته إعلانات البنك الأهلي وبيفكر ياخد قرض عشان يعمل مشروع براميل أو زراير ، احب أقوله أن البنك المركزي زود الفايدة علي القروض ١٪ النهاردة.
– زي النهاردة السنه اللي فاتت محمد عادل كان واحد من نجوم رمضان ومشهد وفاته سواء في (طريقي أو أستاذ ورئيس قسم) مصر كلها اتكلمت عنهم ، السنه دي رغم أنه مشارك في ٣ مسلسلات ولا حد بيجيب سيرته.
– مش لازم يا جماعة عشان نتريق ونعمل افيه حلو نكتب أي كلام وخلاص .. الحقيقة أن ليلي علوي مكنتش خطيبة سعيد عبدالغني في “زوج تحت الطلب” لانها كانت طالعة في الفيلم متجوزه المعلم محمد رضا.
– ثانيا ليلي علوي ذكية ومستحيل تفكر تتجوز أو تتخطب لابن أحمد سعيد عبدالغني في أي عمل مستقبلا ، خاصة بعد ما أحمد باعها في ” هي ودافنشي” وسرق المستندات من بيتها ، ده غير أن أحمد اساسا مخلف بنت ومعندوش أولاد.
– بالمناسبة دي شريف باهر كتب كتابه علي صفية العمري في “ليالي الحلمية” من شوية.
– مأمون وشركاه من غير لبلبة ، عامل زي بطولة اليورو من غير بنات في المدرجات.
– الأسطورة .. هادي الجيار ممثل تحب تتفرج عليه.
– الأسطورة .. أتحدي محمد سامي ينزل أي منطقة شعبية أو عشوائية زي اللي بيتكلم عنها المسلسل ، ويلاقي واحدة عاملة حواجبها زي روجينا أو باقي بطلات المسلسلات.
– الظهور الأول لحمدي الوزير في بنات سوبرمان ، والظهور الأول لمشيرة اسماعيل في الخانكة.
– كتير ممكن يستغربوا لما يعرفوا أن (المفروض) هشام سليم مشارك في بطولة مسلسلين السنه دي.
– مدير الإدارة العامة للمرور : سعادة المواطنين بالغرامات المرورية تعطينا دفعة للاستمرار فيها .. أمنعوا الضحك.
– درة كانت في برنامج علي الراديو النهارده ، بتقول للمذيعة تليفوني مش بيبطل رن من أول رمضان ، المذيعة قالت لها مكالمات تهنئة علي “الخروج وليالي الحلمية” أكيد ، ردت عليها : لأ عايزين ياخدوا رقم ظافر العابدين .. عجبتني صراحتها الحقيقة.
– أول مرة أخد بالي النهاردة في حملة محاربة الفساد من جملة ، الفساد لو كان بقصد أو ” بحسن نية” .. اللي هي ازاي يعني؟
– غياب بيومي فؤاد عن أي حلقة من نيللي وشيريهان ، المسلسل بيفقد نصف قوته.
– قناة الناس أول قناة دينية معتدلة علي التردد الأرضي .. خطوة اتأخرت كتير.
– أفراح القبة .. صابرين ، ٣ باروكات في حلقة واحدة.
– أحمد فهمي أتقبض علي في الميزان ، ومحمد كيلاني أتقبض عليه في ونوس.
– القيصر .. كمية الـ suspense اللي اتعملت في مشهد يوسف الشريف وهو بيعمل المكرونة ، تعادل كل مشاهد الأكشن والإثارة في الدراما السنة دي.
– كلب ايه اللي محتاجينه يحرسكم وأنا موجود .. مصطفي شعبان “ابوالبنات”.
– كل واحد عايز يبقى أحسن من التاني ، مش عشان نفسه ولكن عشان يعرف يعايرك أزاي ؟ .. سلوي عثمان “سقوط حر”.
– محدش السبب في تعاسة حد ، البني آدم هو اللي بيتعس نفسه بنفسه .. هالة صدقي “ونوس”
– ربنا يرحمك يا أمي ويرحم أمهاتنا جميعا ويخلي أمهاتكم يارب.
نرشح لك
تفاصيل الدورة الثانية لمهرجان “إعلام.أورج” رمضان 2016
بالساعة والدقيقة.. مواعيد مسلسلات رمضان 2016
شارك واختار .. ما هو المسلسل الكوميدي الذي تتابعه في رمضان؟ أضغط هنـــا
