عبد الله غلوش يكتب: غلوشيات رمضانية 12
– أكتر ٥ قصص حب مأثرة في الناس السنه دي .. عمرو يوسف وأمينة خليل .. عمرو سعد وريهام حجاج .. ليلي علوي وخالد الصاوي .. محمد رمضان ومي عمر .. يسرا وكلبها.
– مأمون وشركاه .. فيها أيه لو يوسف معاطي كان بدأ أحداث المسلسل من حلقة أول امبارح؟
– أفراح القبة .. اعلان خبر وفاة عبدالناصر داخل الكباريه ، مشهد مهم يضاف لأكبر عدد ماستر سيين في مسلسل واحد من بداية رمضان وحتي الآن.
– دراما رمضان السنة دي ، أثبتت أن مصطفي خاطر أخف دم بين شباب مسرح مصر ، وان أرخمهم حمدي الميرغني.
– مصر اسكندرية الصحراوي من غير لجنة واحدة ، والمقطورة والتريلا بقت تمشي علي الطريق السريع عادي.
– ونوس .. سماح السعيد من أقوي الممثلات في دراما هذا العام.
– فوق مستوي الشبهات : حوار يسرا مع كريم خطاب، كان في ديكور برنامج الستات مايعرفوش يكدبوا.
– مش شاغلني أسباب الإقالة المفاجأة لجمال عبدالحميد من الزمالك ، بقدر ما شاغلني مرتضي منصور هايغير رأيه ويرجعه لمنصبه تاني امتي؟.
– إياد نصار اتسجن في “٧ أرواح” وريم مصطفي اتقبض عليها في ” الطبال”.
– راس الغول .. لغاية اللحظة دي مش شايف سبب منطقي واحد يخلي ميرفت أمين توافق علي التواجد في مسلسل لمجرد التواجد وخلاص.
– حاجة تحزن والله لما تلاقي صحفيين المفروض انهم كبار ومش عارفين الفرق بين قناة المجد العامة وقناة المجد للقرآن الكريم.
– ادوارد سواء في القيصر أو أبوالبنات .. مجرد كمالة عدد.
– ابن بيومي فؤاد لو دمه خفيف علي الحقيقة زي السوشيال ميديا ، أتوقع انه يقعد كوميدينات كتير في البيت.
– يونس ولد فضة .. أول مشهد يجمع بين عمرو سعد وأحمد سعد منذ أحترافهما للفن.
– القيصر : هل تعلم أن إنجي علاء زوجة يوسف الشريف هي الوحيدة اللي أسمها مكتوب ٤ مرات علي تتر مسلسل واحد في دراما رمضان؟
– إعلانات تلاجات وغسالات “فريش” .. صريخ ضحك.
– في نفس اليوم اللي عرفنا فيه ان إياد نصار أخو جمال سليمان في أفراح القبة ، محمد ممدوح عرف أنه أبن شرعي لصاحب الجراند أوتيل.
– أتمني الحكومة تكون مستعدة لإحتمالية أن الصندوق الأسود يثبت أن طيارة باريس المنكوبة تكون وقعت نتيجة عطل فني.
– اللي بيعمله محمد رمضان علي الفيسبوك بقاله فترة ، مالوش غير تفسير من أتنين .. يا إما دماغه صغيره فعلا ، يا أما أنه لغاية النهارده مش قادر يصدق النجاح اللي وصله.
– سقوط حر .. الظهور الأول لمحمد فراج.
– سقوط حر .. هي أزاي أنوشكا تلقائية وجميلة كده.
– سقوط حر .. بعد ٣ أيام أنقطاع عن المطبخ ، صفاء الطوخي عملت waffle وكيك النهاردة.
– بوسي اه يا دنيا ممكن تبدل مشاهدها في “أزمة نسب” ، بمشاهدها في “راس الغول” بمشاهد سعد الصغير في “الكيف” ، ومش هاتحس بأي فرق.
– هو الخروج بكفولة معناها خد براءة ولا نوع من انواع العقاب؟ .. دنيا سمير غانم “نيللي وشريهان”.
– أكتر حاجة عاجباني في سقوط حر أن نيللي كريم مابتتكلمش فيه كتير .. فاروق جعفر “مساء الأنوار”.
– في ناس بتحب تعملها بالنوتيلا ، بس أنا قديم ومش بحبها غير بالسكر أو العسل بس .. شريف مدكور متحدثا عن الزلابية عبر “نجوم fm”.
– ربنا يرحمك يا أمي ويرحم أمهاتنا جميعا ويخلي أمهاتكم يارب.
نرشح لك
عبد الله غلوش يكتب: غلوشيات رمضانية 11
تفاصيل الدورة الثانية لمهرجان “إعلام.أورج” رمضان 2016
بالساعة والدقيقة.. مواعيد مسلسلات رمضان 2016
شارك واختار .. ما هو المسلسل الكوميدي الذي تتابعه في رمضان؟ أضغط هنـــا
