عبد الله غلوش يكتب: غلوشيات رمضانية 13
– الأهلي مش أول فريق في العالم يتغلب بره أرضه أو جوه أرضه مش فاهم المناحه دي كلها ليه؟
– حضرتك بتبقي سايق وإنت قاعد في تكييف ومش مركز من الصيام، فما بالك باللي بيلعب في حر ورطوبه ونسبة أكسجين زي دي.
– إكرامي مش مسئول غير عن الجول الأول بس، لكن اللي يضايقك إنه شايل فرص أخطر من الكورة اللي دخلت فيه دي بكتير.
– في مؤلف كان عامل مسلسل قبل رمضان على طول ومصر كلها أشادت بيه، ومن أول يوم في رمضان الكل بيشتمه وينتقده لمجرد إنه شارك في جريمة كتابة جزء جديد من مسلسل مهم.
– اللي أقصده إن مشكلتنا في مصر عموما إننا مش بنشوف غير تحت رجلنا بس، بننسى أي حاجة كويسه لمجرد إنه لاعب أو مدرب مكنش موفق في ماتش.
– اللي بيتريق إن الأهلي دخل فيه ٦ أهداف في ماتشين، أحب أفكره إن في فرق كبيرة دخل فيها ٦ في ماتش واحد ومسمعناش صوتهم وقتها.
– أضعف لاعبي الأهلي النهارده كان رامي ربيعه، وحجازي معذور لأنه راجع من إصابه طويله والجول التاني من تسلل واضح.
– عتابي الوحيد على مارتن يول إنه كان لازم يغير حسام غالي مش لأنه مكنش في مستواه، ولكن لأنه مش هايلعب ماتش الاسماعيلي الجاي وكنا علي الأقل محتاجين يكون بين بديله وباقي الفريق نوع من التجانس والتفاهم أكتر من كده.
– رمضان صبحي لازم يحترف لو عايزين نحافظ على لاعب ممكن يكون ثروة قومية للبلد دي ويرفع سقف طموحات شبابها أكتر من النني وصلاح.
– الخلاصة مارتن يول كويس واللاعيبه كويسة والأهلي أحسن فريق حاليا في مصر وأفريقيا والعبرة بالخواتيم.
– النهارده اتأكدت من مقولة جدي الله يرحمه، الأهلي لما بيبقى وحش كل حاجة في الدنيا بتبقى وحشه، وبالتالي حلقات مسلسلات رمضان كلها تقريباً كانت مملة ومفيهاش أي جديد بالنسبة لي.
– فوق مستوي الشبهات.. أنا مش فاهم مراد مكرم صابر ومستحمل نجلاء بدر كل ده ليه الحقيقة.
– بالمناسبة، وصل بينا الحال لدرجة إن واحدة تتصل بالدكتور سعد الهلالي النهارده في الراديو تقوله، هو أنا ممكن أمسك المصحف وأقرأ القران من غير طرحة زي ما حماة نجلاء بدر عملت في مسلسل يسرا من يومين؟
– اللي بيقول علي نيللي كريم كئيبة أكيد مش متابع فردوس عبدالحميد في الأسطورة.
– جريمة شغف.. جميلة عوض تجسد شخصية مدمنة مخدرات، للسنة التانية علي التوالي.
– أعتقد أن تجربة منير في “المغني” هتخلي عمرو دياب يلغي من حساباته فكرة الاقتراب من دراما رمضان نهائيا.
– سبحان الله، في نفس اليوم اللي محمد مرسي أخد فيه ٤٠ سنة سجن، طلع علينا مع جماعته من ٤ سنين الفجر عشان يعلن فوزه بانتخابات الرئاسة.
– لو في حد يستاهل جايزة الإبداع والتميز السنة دي، تبقى مناصفة بين صاحب فكرة برنامج الصدمة ومبتكر الشخصيات الكارتونية في الفواصل الإعلانية لقناة MBC مصر.
– ونوس.. اللي حصل بين محمد شاهين ونبيل الحلفاوي في حلقة النهارده طبيعي بالنسبة لابن شايف من أول رمضان ٣ عيال بيتخانقوا عشان أبوهم سايب لهم فيلا بجنينة واحدة.
– اللي بيسرقوا البوستات والأفكار على الفيس بوك وينسبوها لنفسهم، عاملين زي الصحفيين اللي بينشروا البيانات الصحفية اللي بتتبعت على الايميلات ويكتبوا عليها انفراد.
– السنة اللي فاتت هاني رمزي عمل إعلانات قطونيل والسنة دي قطونيل سبونسر مسلسله الإذاعي “مؤذي الزناتي” على نجوم fm.
– محمد طارق ابن ماجد المصري في “الخانكة”، وعمرو إمام شقيق عمرو سعد الكفيف في “يونس ولد فضة” من أفضل الوجوه الجديدة في دراما هذا العام.
– الحب هو أكتر شخص تحس معاه بالأمان وتحس معاه بالعجز في نفس الوقت.. عمرو يوسف “جراند أوتيل”.
– لو كل واحد في الداخلية ساب شغله لمجرد إنه ظلم حد أو ارتكب تجاوزات، البلد هتخرب.. طارق لطفي “شهادة ميلاد”.
– كل ما تيجي مصيبة، أعرف إن وراها خير على طول.. هالة صدقي “ونوس”.
– ربنا يرحمك يا أمي ويرحم أمهاتنا جميعا ويخلي أمهاتكم يارب.
نرشح لك
عبد الله غلوش يكتب: غلوشيات رمضانية 12
تفاصيل الدورة الثانية لمهرجان “إعلام.أورج” رمضان 2016
بالساعة والدقيقة.. مواعيد مسلسلات رمضان 2016
شارك واختار .. ما هو المسلسل الكوميدي الذي تتابعه في رمضان؟ أضغط هنـــا
