عبدالله غلوش يكتب: غلوشيات رمضانية 17
– خايف وسط هوجة برامج القافية المنتشرة في رمضان السنة دي زي “الحلو الخفيف مع شريف” و ” للأمام مع طارق علام” ، قناة دريم تفاجئنا ببرنامج “يا خراشي مع وائل الابراشي”.
– بمنتهي الامانة هل إعلانات قطونيل او دايس او الأمبراطور طول السنين اللي فاتت ، أقنعت حد فيكم انه يغير نوع البوكسر بتاعه؟
– أحمد السعدني خطب ملك قورة في “وعد” واتقبض عليه في قضية افيون بـ ” أفراح القبة”.
– أفراح القبة .. محمد ياسين معتمد علي سياسة حلقة حلوة و ٣ مملة.
– أفراح القبة .. دينا الشربيني وهي بتقلد سوسن بدر الحاجة الوحيدة اللي ممكن تشوفها في حلقة النهاردة.
– كوبا أمريكا .. إهدي يا ميسي .. مش كده يا ميسي.
– لسه هابتدي افوق من صدمة رسالة orange بعتاها للعملاء بتوعها بتقول (عايز تعرف تفسير رؤية الحمار في الحلم،اشترك الان) ، لقيتها بعتالي رسالة تانية بتقول (ابعت اسم الفنان اللي محمد رمضان لبسه قميص النوم واكسب ١٠ الاف جنية).
الخانكة .. مش عارف ايه المغذي من ظهور مشهدين تلاته للقمر في كل حلقة.
– مصطفي ابوسريع مفيش اتنين يختلفوا علي أن دمه خفيف ، زي ما برضه مفيش اتنين يختلفوا علي ان حركاته وافيهاته في “راس الغول” نسخة طبق الأصل من حركاته وافيهاته في “الطبال”.
– سقوط حر .. اسم علي مسمي.
– سقوط حر .. أول ضحكة مسموعة لـ نيللي كريم في دراما رمضان من 3 سنين.
– سقوط حر .. لو المخرج شوقي الماجري كان أختار الدكتور أحمد عكاشة أو الدكتور هاشم بحري مكان محمد فراج ، كانوا عملوا الدور بطريقة أحسن و أسهل وأبسط من كده.
– شهادة ميلاد .. طارق لطفي وكل اللي في مسلسله هايلين وموهوبين وعلي عيني وراسي ، بس مش معني اني صاحب المخرج او المؤلف او حد من الممثلين أقول انه من المسلسلات الناجحة ، لان الحقيقة المسلسل ضلمة وبطئ وكئيب وتقريباً نسبة مشاهدته صفر ، واتحدي اي حد يلاقي ١٠ من اصحابه بيتفرج عليه اصلا .
– راس الغول .. مظهر أبوالنجا من الحاجات الحلوة القليلة في المسلسل.
– الأسطورة .. الحالة الوحيدة اللي محمد رمضان ممكن يحس فيها ان مسلسله نجح فعلا ، لما الحكومة تبطل تشتري سلاح من فرنسا وروسيا.
– الأسطورة .. اجر فردوس عبدالحميد في المسلسل كله تقريبا ، ميوصلش للعشرين الف دولار اللي ناصر وافق يدفعهم لهند رضا كل شهر.
– اتصالات .. فكرة اعلان النني احلي من صلاح ، وسكربت اعلان صلاح افضل من النني.
– في نفس اليوم اللي محمد رمضان اتجوز عليها روجينا في (الأسطورة ) مي عمر اتخطبت لوليد فواز في (الطبال).
– القيصر .. مش معني ان حضرتك عايز تهرب من المط او مزنوق في معاد التصوير ، تخلي الحلقات مدتها تلت ساعة.
– القيصر .. الـ suspense الزايد عن الحد بيتقلب للضد، والناس عينها مش ناقصة زغللة أساسا.
– مأمون وشركاه .. لو رئيس جهاز أمن الدولة بنفس سذاجة كمال ابوريه ، يبقي عليه العوض في البلد دي.
– أبو البنات .. في تاريخه الفني كله ، مصطفي شعبان خد فياجرا مرتين .. مرة مع لقاء الخميسي في “الزوجة الرابعة” والمرة التانية امبارح مع صافينار.
– الشخص المهم في حياتك هو اللي تحس بغيابه مش اللي تحس بوجوده .. عمرو سعد .. “يونس ولد فضة”.
– الراجل اللي ميبقاش عنده مطرح ينام معاكي فيه ، اعرفي علي طول أنه هايقلبك في الاجره .. سوسن بدر “أفراح القبة”.
– ماينفعش تحبب نفسك في حد وإنت بتحب حد تاني.. أمينة خليل “جراند أوتيل”.
– ربنا يرحمك يا أمي ويرحم أمهاتنا جميعا ويخلي أمهاتكم يارب.
نرشح لك
عبدالله غلوش يكتب: غلوشيات رمضانية 16
شارك واختار .. ما هو المسلسل الكوميدي الذي تتابعه في رمضان؟ أضغط هنـــا
