عبدالله غلوش يكتب: غلوشيات رمضانية 18

– لو بتقرأ الكلام ده، ولسه منزلتش على بروفايلك البوست بتاع “من باب الاحتياط والموضوع بجد مش هزار والأكاونت الوهمي” ، اعرف إن لسه فيك أمل.

– مسلسل أحمد حلمي ودنيا سمير غانم الإذاعي “مين معايا”.. المعنى الحرفي لكلمة سبوبة.

– ليالي الحلمية ٦.. كل ما تتفرج على تتر المسلسل وتسمع جملة “ليه يا زمان مسبتناش أبرياء.. وواخدنا ليه في طريق مامنوش رجوع”، تحس إن سيد حجاب كاتبها مخصوص للي قرر يعمل الجزء السادس للمسلسل.

– ليالي الحلمية ٦.. مشكلة المسلسل مالهاش علاقة بالسيناريو، زي ما لها علاقة بالإخراج والإنتاج.

– ليالي الحلمية ٦.. مجدي أبوعميرة محاولش يشغل نفسه في أي وسيلة إخراجية ولو بسيطة تربط الناس بين الجزء الجديد والأجزاء اللي قبل كده، واعتقد لو تامر محسن أو محمد ياسين هما اللي بيخرجوا الجزء ده، كان ممكن يعملوا الحكاية دي بسهولة.

– ليالي الحلمية ٦.. المسلسل لو بنفس السيناريو بتاعه وبنفس أبطاله ولكن باسم مختلف، كان ممكن ينجح ويسمّع مع الناس أكتر من كده.

– ليالي الحلمية ٦.. صفاء حجازي رئيسة اتحاد الأذاعة والتليفزيون من الناس اللي ساهمت بشكل كبير في الدعاية السلبية للجزء الجديد لما عملت مؤتمر صحفي قبل رمضان أعلنت فيه إنها مش هتعرض الجزء السادس وإنها هتعمل حلقات مجمعة للأجزاء الخمسة اللي فاتت، عشان تعرف الناس الفرق.

– ليالي الحلمية ٦.. أكبر أزمات المسلسل إن الناس اللي تابعوا الأجزاء الخمسة اللي فاتت، لما جت تتفرج على الجزء الجديد، ملقتش نفس الشخصيات اللي ارتبطت بيهم الأجزاء اللي فاتت، ولقت شوية ممثلين جداد ماينفعش يتقارنوا بالفخراني والسعدني وسيد عبدالكريم، أما الجيل الجديد اللي مشفش الأجزاء اللي فاتت مكنش فارق معاهم يشوفوا جزء جديد من مسلسل معندهمش خلفية عنه.

– ليالي الحلمية ٦.. رغم كل ده ورغم إني شايف إن المسلسل متقدم على طريقة معظم مسلسلات محمود شميس اللي بعتبره سبكي الدراما، لكن مقدرش أنكر إنه في النهاية بيتشاف أكتر من مسلسلات كتير زي “كلمة سر والمغني وشهادة ميلاد ويوميات زوجة مفروسة”.

– الخانكة.. زي ما “النهار” وقفت برنامج ريهام سعيد، سبحان الله رئيس القناة اللي شغاله فيها ميريهان حسين قرر يوقف برنامجها ويعرض مكانه مسلسل هندي مدبلج.

– الخانكة.. كل اللي واحشه الأستاذ حسين رياض، في ممثل سوري اسمه بسام علي، هتلاقيه بيمثل بنفس طريقته بالظبط.
الخانكة.. إيهاب فهمي خرج من عباية حنان ترك أخيرا.

– مأمون وشركاه.. هذا العمل غير حقيقي غير منطقي ولا يمت للواقع بصلة والأحداث الوارده في المسلسل هي من قبيل تخاريف صيام المؤلف.

– الطبال.. من أكتر المسلسلات اللي اتظلمت بفكرة العرض الحصري واتظلمت بعرضها علي”ONtv” تحديدا.

– الأرخم من إعلان عبورلاند لاحمد فتحي وحسن الرداد، إعلان كومباوند محمد أبوالعينين الجديد “كليوباترا بالاس” بتاع موظف الـ sales اللي بيشرح علي الماكيت.

– إعلان “orange” صايم في مارينا.. الأفضل في حملة أكرم حسني وأحمد فهمي ولو إني مش فاهم حتي الآن إيه لازمة الفرقة بتاعة من المدفع للمدفع وليه لابسين تركواز مش أورانج.

– فوق مستوي الشبهات.. حاجة تزعل لما مسلسل يبقى حلو ومخرج كبير زي هاني خليفة تقع منه غلطات إخراجية تافهه زي أغنية “حرمت احبك” الي اشتغلت رغم إن سيد رجب كان لسه بيكتب اسمها على موبايله.

– بنسبة كبيرة، الأهلي بطل الدوري رسميا، بكره إن شاء الله.

– ياسمين كساب أفضل وجه نسائي في “الأسطورة” بعد روجينا وفردوس عبدالحميد، حتي الآن.

– لو عايز تضيع من وقتك نص ساعة كل يوم في حاجة مالهاش أي لازمة.. ممكن تتفرج على برنامج “المرايا” على روتانا والفضائية المصرية وصدى البلد.

– “النهار”.. حلو إنك تعمل موقع مشاهدة خاص بيك زي شاهد ويوتيوب، بس الأحلي إنك تروج له صح ومن بدري مش تفاجئ الناس بيه.

– زواج صفاء الطوخي ومحمد مرزبان “سقوط حر” وانضمام خالد الغندور لقناة سعيد حساسين .. أصدق مثال لمقولة ما جمّع إلا أما وفّق.

– شخصية قرني اللي بيعملها بيومي فؤاد في بنات سوبرمان، كفيلة إنها تخرجك من أي مود اكتئاب عايش فيه.

– أفراح القبة.. سوسن بدر ماتت محروقة، دينا الشربيني اتطلقت، رانيا يوسف انتحرت هي وابنها، أحمد السعدني أخد إعدام، معرفش كل ده إيه علاقته بإن مصر انتصرت على اسرائيل في أكتوبر ٧٣.

– أفراح القبة.. طب إحنا ممكن نتجاوز عن فكرة إن محمد الشرنوبي يعرف تاريخ أمه وأبوه من قبل ما يتولد عادي، لكن يعرف قصص باقي أبطال وشخصيات المسلسل إزاي؟

– أفراح القبة.. هو الممثل اللي بيعمل دور البطل الرئيسي في مسرحيات سرحان الهلالي، مالوش نفس نعرض قصته ونضيع حلقتين تلاته فيها هو كمان ولا إيه؟

– ألبوم تامر.. الألبوم حلو وواضح إن تامر كان مركز فيه عن كل ألبوماته اللي فاتت.

– ألبوم تامر.. أغنية “كان في واحدة”، من أفضل أغاني الألبوم.

– ألبوم تامر.. تعليقات جمهور تامر من امبارح على سالم الهندي حسستني إنه النسخة الرجالي من يسرا في فوق مستوي الشبهات.

– ألبوم تامر.. مش فاهم يعني إيه روتانا تسرب الألبوم ، وإيه اللي يثبت المعلومة دي، وإيه اللي هتستفيده الشركة لما تسربه.. معتقدش في شركة عايزه تخسر ومعتقدش إن أول البوم لتامر بعد انفصال عمرو دياب عن الشركة، كان سالم الهندي أو غيره مخططين إنهم يدمروه.

– جراند أوتيل.. سنه بعد الأخري تامر حبيب بيثبت إنه واحد من أفضل الكتاب اللي بيعملوا مسلسلات سهلة وبسيطة ومسلية.

– وعد.. لما قصة المسلسل مسروقة من مسلسل “العشق الممنوع”، مي عزالدين كاتبه على التتر إن المسلسل فكرتها على أي أساس؟

– بالمناسبة، مفيش في مصر كاتب سيناريو واحد، عنده قدرة مؤلفي المسلسلات التركية على عمل مسلسلات من ١٠٠ و٢٠٠ حلقة من غير ما تحس بالملل والزهق والمط الغير مبرر.

– سقوط حر.. الحاجة الوحيدة الي ممكن تخرج بيها في حلقة النهاردة، إن أحمد وفيق مسجل اسم أخوه على الموبايل سعيد أخويا بالعربي ومسجل اسم صفاء الطوخي “Tant Seham” بالإنجليزي.

– سقوط حر.. معنديش مانع أحمد وفيق يستحمى في كل حلقة.. الراجل نضيف ومن حقه، بس يبقى في تجديد مرة شامبو مرة صابون مرة شاور جيل.. لكن افتح الدش وأقف تحته وأضيع ٣ دقايق كل حلقة كده في الفراغ، مايصحش كده.

– اختر الإجابة الصحيحة ما بين الأقواس.. أسطورة الحديد في مصر من وجهة نظرك ( عز – أبوهشيمة – ناصر الدسوقي)؟

– أي صحفي او إعلامي يتكلم في قضية أو يفتح ملف يزعل ناس مهمة، تطلعه مصيبة فجأة.. أحمد فهمي “الميزان”.

– الغربه تربه، لو اتدفنت فيها محدش هايحس بيك.. أمير كرارة “الطبال”.

– أنا مسئول عن اللي بقوله، مش على اللي بتفهميه.. تامر حسني “بطلة العالم في النكد”.

– كلمة لكل الخنافس، هل من منافس؟.. علي ربيع متقمصا شخصية محمد رمضان “صد رد”.

– الست متقبلش واحدة تشاركها في بال جوزها، فما بالك لو هتشاركها في سريره؟.. سحر الصايغ “يونس ولد فضة”.

– ربنا يرحمك يا أمي ويرحم أمهاتنا جميعا ويخلي أمهاتكم يارب.

نرشح لك

عبدالله غلوش يكتب: غلوشيات رمضانية 17

شارك واختر.. من أفضل ثنائي في إعلانات رمضان؟ اضغط هنـــا