مينا فريد يكتب: مزازيك رمضانية (2) (كلام في الكنافة 5)
كلام في الكنافة النهاردة هيكمّل الكلام عن الموسيقى في رمضان هذا الموسم.. مش بس موسيقى و أغاني تترات المسلسلات لأ كمان الموسيقى التصويرية و موسيقى الإعلانات و موسيقى الأغاني اللي صدرت في رمضان السنة دي ….
بدون مقدمات طويلة..
بسبب إن الكثافة الإنتاجية السنة دي صعب تتحصر في مقال واحد .. ده الجزء التاني من مزازيك رمضان .. و هتتبعها أجزاء تاني
تقدر تقرا اللي فاتك في الجزء الأول من هنا
أولا : المسلسلات : الجزء الثاني.
نيلي و شريهان
هشام جمال.. صاحب الطلة الشهيرة في إعلان مجدي يعقوب الأخير.. المنتج الشاب الذي بدأ إنتاج في عمر ال 16 عام بعد ما حوّش من مصروفة كل ده لحد ما قدر ينتج لأنغام و دنيا سمير غانم … و بعدها عمل أغنية شهيرة بيقول فيها راح فين زمن الرجولة.. بيقول فيها على الرجالة اللي بتلبس بنطلونات ضيقة ” خواجات” – هو قصدة كلمة عيب مع إنه ولد مؤدب متعلم في أسبانيا” و بيكمل و بينظّر و يتحسر على الشنبات … هو اللي ملحّن التتر بتاع المسلسل بتاعه.. اللي أنتجه بفلوسه.. فهو حر … حر تماما يكتب إسمه على التتر أي عدد من المرات .. مشرف على الأغاني .. ملحن .. معد موسيقي …تتره في مسلسله.. اللي كتب كلام التتر الفنان الكبير أمير طعيمة.. أمير طعيمة غني عن التعريف فنا و أخلاقا.. و الحقيقة إن هشام موهوب في التلحين و فيه مزيكا كتير حلوه ليه قبل كده….. و مش كل منتج أو صاحب راس مال كبير يظهر فجأة يبقى مش موهوب.. فيه قصة مثلا –مالهاش علاقة بهشام جمال خالص .. خالص – عن شاعر إسمه منصور الشادي.. منصور الشادي ده ملياردير كبير .. فجأة بقى يكتب لهاني شاكر في عز أيام نجاح هاني شاكر بالمصري مع إنه خليجي.. وبدأت أبواق دعاية ليه رهيبة في الخليج و مصر.. لحد ماوصلت إن روتانا عملت ألبوم ليه إسمه “شاديات”.. كله أغاني كتبها منصور الشادي.. مين بقى غنّى في الألبوم ده ؟
محمد عبده .. أحلام .. أنغام .. فضل شاكر .. راشد الماجد .. رابح صقر… و كتير غيرهم.
حاجة حلوة جدا.. صحيح بعدها بدأت تظهر قصايد بإسم شاعر مغمور إسمه إبراهيم الجنوبي.. و لقيوا القصايد اللي غناها نجوم كبار تحت إسم منصور الشادي هي هي القصايد اللي ناشرها إبراهيم الجنوبي قبلها بسنتين…و من وقتها بدأت تظهر إتهامات لمنصور إنه بيشتري القصايد… بس للأمانه هي كلها غير مؤكده.. كمان مفيش دليل.. فبلاش ناخد أحكام مسبقة.. بالتوفيق يا هشام …
نرجع لنيللي و شريهان .. واحد من أجمل الأغاني اللي نزلت السنة دي أغنية “باب الحياة” اللي غنتها دنيا مع عبد الباسط . عبد الباسط لما بيتحط في مكان صح بيكون مبهر.
بنات سوبر مان
مكملين مع المسلسلات الكوميدية و المرة دي مع ” بنات سوبر مان” محمد نور عضو فريق واما …غنى تتر حلو أوي أوي.. لدرجة إني حسيت إنه خلاص أخيرا عمل عملية الجيوب الأنفية… التتر لحنه محمد نور كمان و كتبه أحمد علاء الدين…
راس الغول
أيمن بهجت قمر هو غول التترات السنين الأخيرة.. بيعرف يكتب و يحس بكل بساطة و يترجمها لمضمون القصة.. السنة دي إتحمس مع وليد سعد لموهبة جديدة هي أحمد زعيم .. و وزع الأغنية توما..
إسمع كده أحمد زعيم مرتين تلاته.. مش حاسس إنه فضل شاكر جديد؟ .. أحساسه و وقفاته و هو بيغني و بحه بسيطة في صوته..
أيمن بهجت قمر و وليد سعد و توما مش بيهرجوا..
ثانيا : الإعلانات : الجزء الثاني
واجب علينا – إعلان مؤسسة الكبد المصري
مدحت صالح.. مثال حي حقيقي عن الموهبة الرائعة اللي ممكن إختياراتها تدمرها.. مدحت صالح اللي غني ” لا هناخد إيه ” و “النور مكانه في القلوب” … رجع بكل إحساس و خبره و معلمه يغني الأغنية دي … مدحت صالح بيغني أغنيات سنجل أحسن مليون مرة من إنه يعمل ألبوم … “واجب علينا” كتبها مؤمن راجح و لحنها محمد راجح و وزعها محمد هارون..
أنا أتمنى تكمل و تنتشر.. هتكون أسطورية زي” النور مكانه في القلوب”..
ثالثا : أغاني صدرت في رمضان : الجزء الثاني
نفس الحنين
بشكل ما تامر حسني وضع نفسه مع مزازيك رمضان… دخول مفاجئ للألبوم بسبب تسريبه..
تامر في أغنية “نفس الحنين” رجع لتامر القديم.. تامر بإحساس حبيبي و إنت بعيد.. مع خبرة سنين كتير.. محمد يحيى عمل لحن قريب من القلب و تميم عامل توزيع أوركسترا مش توزيع عادي .. جمال الخولي .. كتب الكلام عادي بس قوي… تامر حسني موهوب.. المشكلة مشكلة إختيارات .. بس إختيارات..
الأغنية دي هتكمّل …
العمر الحقيقي
المعادلة بالنسبة لي إن أي عمل فيه أنغام.. فهو يستحق إنك تسمعه… مصري .. خليجي.. أدعية إسلامية.. أنا مش بيفرق غير إحساسها و روحها اللي بترفرف فوق الغنوة…
العمر الحقيقي كتبها و لحنها عزيز الشافعي توزيع خالد سليمان و طارق مدكور
مزازيك خلصت النهاردة.. بس لسة مكملة معانا لباقي الأعمال… في حلقات جديدة
نرشح لك
مينا فريد يكتب: مزازيك رمضانية (1) (كلام في الكنافة 4)
شارك واختار .. من أفضل ثنائي في إعلانات رمضان؟ أضغط هنـــا
