عبدالله غلوش يكتب: غلوشيات رمضانية 19
– ليلة الدوري 38 .. دعونا نشمت في صمت.
– ليلة الدوري 38 .. الأهلي لعب حلو في ماتش المصري وخسر ولعب وحش النهارده وأخد الدوري.
– ليلة الدوري 38 .. فضيحة النقل التليفزيوني للمباراة، لو حصلت في تليفزيون أي دولة محترمة، المفروض يتم إقالة رئيس اتحاد الإذاعة والتليفزيون قبل الماتش ما ينتهي.
– ليلة الدوري 38 .. مفيش أسوأ من قناة المفروض محترمة وعشان الفلوس تسمح تمشي علي شاشاتها ناموس وصراصير وسط المبارايات.
– ليلة الدوري 38 .. فوز الإسماعيلي على الزمالك رايح جاي الموسم ده، الحاجة الوحيدة اللي هاتخليني معلقش على شغل العيال الصغيرة اللي حصل من جهازهم الفني وبعض مسئوليه قبل وأثناء المباراة.
– ليلة الدوري 38 .. تفتكروا الزمالك ممكن ياخد الدوري رقم 38 في تاريخه سنة كام؟
– بعد ٣ ايام من وفاتها في “الخانكة”، سميرة عبدالعزيز توفت من شوية في “أبوالبنات”.
– يوميات زوجة مفروسة .. اللهم ارزقنا ثقة خالد سرحان في تقل دمه.
– راس الغول ..لأول مرة من بدايه رمضان 6 مشاهد تعدي في حلقة واحدة من غير ما محمود عبدالعزيز يظهر في واحد منهم.
– من الأسئلة اللي مش لاقي لها إجابة من أول رمضان.. هو ليه شريف بيظهر في كل بوسترات الدعاية الخاصة بمسلسل “الخروج” بشنب مع إنه في المسلسل طالع من غير شنب؟
– فوق مستوي الشبهات.. مشهد وفاة والدة يسرا.. مفيش إحساس أصدق من كده.
– فوق مستوي الشبهات .. مشهد وفاة والدة يسرا .. أول مرة أحس بدور عمرو مصطفى في المسلسل.
– فوق مستوي الشبهات .. كل اللي حسدوا شيرين رضا على شيكاتها وأناقتها، أحب أقولهم إن بقالها ٩ حلقات بنفس الطقم.
– فوق مستوي الشبهات .. عن الصفاء النفسي للبنت اللي كانت نايمة مع أحمد حاتم وهي بتقوله “لو بتحب ماتبقاش تكلمني تاني، لأن كل اللي يهمني إنك تبقي مبسوط حتى لو مع واحدة غيري”.
– سعد الصغير أحيا من ٣ أيام حفل زفاف مصطفى شعبان “أبوالبنات”، وامبارح أحيا زفاف باسم سمرة في الكيف.. الأول أخد فيه فلوس والتاني عمله مجاملة.
– لو البنك المصري الخليجي عايز يطفش العملاء بتوعه، مش هيلاقي أسوأ من فكرة إعلانات شيكو وهشام ماجد بصراحة.
– جراند أوتيل .. مشهد ولادة دينا الشربيني، واحد من أصدق مشاهد الولادة في السينما والدراما المصرية عبر تاريخها.
– جراند أوتيل .. من الظلم عبارات الإشادة للعنصر الرجالي في المسلسل تقتصر على محمد ممدوح بس، لأنه بصراحة مش أقوي من أحمد داوود.
– ونوس .. انتبه من فضلك المسلسل يرجع إلى الخلف.
– سقوط حر .. بمنتهي الأمانة اللي عاملة أو اللي عامل دور المتحولة جنسيا في حلقة النهارده، من كتر إتقانها للدور، مخلياني لغاية اللحظة دي مش عارف إذا كانت بنت فعلا في الحقيقة ولا ولد؟
– سقوط حر .. فاهم إن المسلسل عايز يقول إن كل واحد فينا بينه وبين الجنون شعره، لكن للأسف أقوى نقط ضعف المسلسل إنه مقدرش يوصل الرسالة دي للناس، لأن ببساطة كل قصص الحالات اللي مشاركه المسلسل يتم تناولها من فوق الوش، من غير ما تعيش فيها ولا تتوغل في تفاصيلها زي ما كان بيحصل في مسلسلات نيللي الأخيرة زي سجن النسا وتحت السيطرة.
– “تكنو موبايل” بينافس “فريش” على لقب أبسط فكرة وألطف إعلان.
– سناء شافع لو بيعمل دوبلاج مسلسل كارتون، مش هيعمل اللي بيعمله في مسلسل “القيصر” ده.
– أبوالبنات .. من المسلسلات النادره اللي يمر ١٩ حلقه منها، من غير عبدالرحمن أبو زهرة ما يموت.
– كيف تصبح أسطورة في ٥ خطوات؟ .. تتجوز ٣، تتاجر في السلاح والآثار، تظبط نفسك مع واحد تقيل في الداخلية، تجيب سكرتيرة وتدفع لها ٢٠ ألف دولار في الشهر، تنزل تصور الناس وهي بتتفرج علي المسلسل بتاعك في القهاوي وتحطها علي صفحتك في الفيسبوك.
– الأسطورة .. أكيد مي عمر لما سألت محمد سامي هو أنا دوري في المسلسل عبارة عن ايه؟، قالها هتصوتي في وش روجينا كل ما تشوفيها يا حبيبتي.
– الخوف مرتبط دايما بالفهم .. بيومي فؤاد “الميزان”.
– ربنا يفرح قلبك ويسترك ستر مايوجعش غيرك .. سهر الصايغ “يونس ولد فضة”.
– لو جبتي full mark في امتحانات المدرسة هاعلمك الرقص .. صافينار لبنت مصطفى شعبان “أبوالبنات “.
– ربنا يرحمك يا أمي ويرحم أمهاتنا جميعا ويخلي أمهاتكم يارب.
نرشح لك
عبدالله غلوش يكتب: غلوشيات رمضانية 18
شارك واختار.. من أفضل ثنائي في إعلانات رمضان؟ اضغط هنـــا
