محمد فهمي يكتب: مصر والمغرب بين "رامز بيلعب بالنار" و"جراند أوتيل"
السنة دي المغرب اتعمل لها دعاية بفلوس كثير جداً في المنطقة العربية من غير ما تدفع جنيه واحد .. قول لي إزاي .. هقول لك يا سيدي .. انت عارف إن رغم تفاهة برنامج “رامز جلال” إلا إنه محقق نسبة مشاهدة “أسطورية” علي القنوات الفضائية والإنترنت قدر بيها إنه يروج للسياحة المغربية من غير ما يكلف الدولة أي شيء.
دولة المغرب استضافت البرنامج ووفرت له لبن العصفور، من غير ما القائمين علي البرنامج يسمعوا جملة “فوت علينا بكرة يا سيد”، أو “مينفعش لدواعي أمنية”، أو حتي خلت المسئولين علي البرنامج يلفوا كعب داير زي ما بيحصل عندنا في مصر علشان يخلصوا الموافقات والتصاريح المطلوبة للتصوير من عند أستاذ سيد وعم جمال ومدام إعتماد وفاروق باشا وحاتم بيك.
الموضوع دا مش جديد علي المغاربة، الناس دي عارفة قد ايه إن السينما والميديا مؤثرين في التسويق، وإنها صناعة مربحة بتدخل لها مليارات سنوياً بالدولار، وعلشان كده هتلاقي في أفلام مهمة كثير بدل ما تتصور عندك هنا في مصر هربت للتصوير في المغرب.
ولأن صناعة السينما والميديا مهمة من وجهة نظر المغاربة، قرروا يعملوا مهرجان سينما في كل مدينة تقريباً، وبيوجهوا الدعوة لأهم النجوم العالميين والعرب لحضور المهرجانات دي، في الوقت اللي إحنا فيه لما بنوجه الدعوة لنجم واحد بس بنحط إيدنا علي قلبنا بسبب اللي ممكن يحصل للضيف.
نرشح لك : أسعار الإقامة في “كتاراكت” بعد نجاح جراند أوتيل
ورغم إن مصر عندها النسبة الأكبر من آثار العالم لكن إحنا أساتذة في إهدارها وعدم استغلالها بسبب البيروقراطية والقوانين غبية، اللي بتهدر علي الدولة فرصة إن يدخل لها مليارات الدولارات اللي عندنا عجز فيها من السينما والسياحة.
هقول لك إزاي .. انت عارف إن نسبة إشغالات الفندق اللي تم تصوير مسلسل “جراند أوتيل” وصلت النهاردة لـ ١٠٠٪ من المصريين والعرب بعد عرض المسلسل، طيب تخيل معايا لو كان في أكثر من فيلم عالمي بيتكلم عن مصر تم تصويرهم علي أرضها وتم عرضهم في كل دول العالم كانت نسبة الإشغالات في باقي الفنادق اللي بتعاني من ضعف السياحة وصلت لكام.
الموضوع مش صعب ولا محتاج خطط خمسية ولا اجتماعات كثير الموضوع محتاج إننا نشتغل شوية ونقف جنب البلد ونبعد عن البيروقراطية بتاعة الجهات الكثير جدا اللي بتحتاج تصاريح وورق وأختام كثير جداً علشان تتصور في الشارع، محتاج إننا نفصل بين المؤسسة الدينية والدولة، وشوية أمن واستقرار في الشارع.
وتعالوا نطبق التجربة المغربية زي ما دولة الإمارات عملت، ونجحت إنها تستقبل تصوير أفلام عالمية مهمة علي أرضها، وحققت دخل كبير وفي نفس الوقت عملت لنفسها دعاية عالمية.
نرشح لك
بالصور : فنانون وإعلاميون وكتاب ونقاد في ضيافة إعلام.أورج
تعرف على أظرف أم في إعلانات رمضان
شارك واختار .. من أفضل ثنائي في إعلانات رمضان؟ أضغط هنـــا
