محمد المعتصم يكتب: 30 سنة ولسه فيه واحد زي ده بـ...
نقلًا عن الوطن
■ 30 سنة ولسه فيه موظف بيفتح الدرج علشان أخوه المواطن يحدف له 100 جنيه وإلا الورق بتاعه ناقص أو محتاج ختم من مدام عفاف اللى فى الدور الرابع وفى الآخر مصلحته مش هتتقضى.
■ 30 سنة ومدام عفاف نفسها لسه موجودة.
■ 30 سنة وبنت مدام عفاف اللى شبه أمها تنتظر ضغط السيدة الفاضلة أمها لتعيينها ضمن أبناء الموظفين.
■ 30 سنة ولسه أمناء الشرطة مصدر السلطات فى البلد.
■ 30 سنة ولسه فيه موظفين بتحل الكلمات المتقاطعة وبتقرا الأبراج وقت الشغل ومستنية العلاوة والحوافز، وممكن يعملوا ثورة ومظاهرات واعتصام وإضراب عن الطعام لو لزم الأمر لو شموا خبر إن البدلات هتتأخر شوية.
■ 30 سنة ولسه نظرية «طبّق له 50 جنيه فى إيده» هى أكثر النظريات العلمية تطبيقاً فى مصر.
■ 30 سنة والشوارع التى يتم تطويرها وتنظيفها وسفلتتها من أول وجديد تتم إعادة الحفر فيها من تانى يوم لأنهم نسيوا يوصّلوا لعمارة نور أو ميّه.
■ 30 سنة ولسه فيه مواطن مخنوق من القمامة اللى فى الشارع لكن عادى جداً إنه يرمى زبالته فى الشارع بمنطق إنها ماجاتش عليه.
■ 30 سنة ولسه مطلع الدائرى والشوارع البعيدة هى المكان المفضل لسيارات ربع النقل والكارو وخلافه لرمى الركش وبقايا عمليات البناء.
■ 30 سنة ولسه فيه 20 شركة بتعمل إعلانات إنها زانوسى والباقى نصابين.
■ 30 سنة ولسه فيه ناس بتصدّق الـ20 شركة وبتتصل بيهم عادى.
■ 30 سنة ولسه فيه مواطن لما يسافر بره مصر يحترم القوانين وإشارات المرور ويمشى زى الساعة لكن أول ما ينزل مصر يمارس مصريته ويعمل زى الناس عادى فى الشارع.
■ 30 سنة ولسه فيه ناس بتضحك على مصطفى شعبان وبتتفرج على يسرا ومقتنعة إن غادة عبدالرازق ممثلة وإن ليالى الحلمية مسلسل.
■ ٣٠ سنة ولسه مش عارفين نعمل قناة تنافس الجزيرة ولا جريدة زى الحياة والشرق الأوسط.
■ ٣٠ سنة وصحافتنا القومية بتخسر، وما حدش بيقراها ولا بتوزع والدولة بتدفع لها فلوس علشان اللى بيشتغل فيها ياخد أرباح.
■ ٣٠ سنة ولسه فيه واحد ما يعرفكش بس لما يعدى جنب عربيتك يطّلع مفتاح ويجرحها وهو ماشى.
■ ٣٠ سنة و.. وعايزينى أكسبها.
نرشح لك
محمد المعتصم يكتب: رحلة البحث عن تذكرة في العيد
بالصور: فنانون وإعلاميون وكتاب ونقاد في ضيافة إعلام.أورج
10 اختلافات بين جراند أوتيل المصري والأصل الإسباني
شارك واختر.. ما هو “أسوأ” مسلسل في رمضان 2016؟ اضغط هنـــا