مؤمن المحمدي يكتب : كتيبة الإعدام .. رمضان 2016

الحكاية سهلة خالص، زي شكة الدبوس، ومضمونة ومتجربة بدال المرة ميت مرة، امشي معايا انت بس، وادعي لي.

كل المطلوب منك تختار فيلم، عربي بقى أجنبي قديم جديد كوميدي أكشن سياسي اجتماعي، كله شغال، ومش مهم يكون اتشاف لـ حد ما الناس حفظته، محدش هـ ياخد باله أصلا.

بعد ما تختار الفيلم، تفرغ قصته، وتشيلها من سياقها، ومن الرسالة اللي عايز يقدمها، خليك في الحبكة لـ وحدها، ودي الخطوة التانية.

الخطوة التالتة، وبـ ما إنك هـ تقلب الفيلم لـ مسلسل، عندك فرصة تزود التفريعات زي ما إنت عايز، اللي مش متجوزة في الفيلم تجوزها، اللي معندوش عيال يبقى عنده، وممكن الشخصية الواحدة في الفيلم تفكها بـ شخصيتين تلاتة، ما يضرش، وممكن تجوز كل واحد منهم، بـ راحتك، محدش هـ يراجع وراك.

الخطوة الأخيرة دي ليها فايدة تانية، وهي إن هـ تخفي معالم الأصلي فـ اتوصى، وأخيرا اقعد اكتب كل ده، وما تنساش تغير اسم العمل، وتسميه مثلا “راس الغول”.

أيوه، وتعالى نعيد الفيلم من الأول:

كلنا شفنا فيلم كتيبة الإعدام، وحافظينه، ومع ذلك عادي، اتعملت فينا كلنا.

لو استرجعنا “حكاية” فيلم عاطف الطيب وأسامة أنور عكاشة، هـ نلاقيها بـ تتكلم عن واحد اتحبس ظلم (حسن عز الرجال) الراجل اللي حبسه (فرج الأكتع) غير اسمه وشخصيته وهويته خالص، وعمل نفسه رجل أعمال ، وبقى واحد من رجال المال المعدوين في البلد.

الراجل اللي اتحبس ظلم كان له ولد (هاني)، ما يعرفش عنه حاجة، ومراته خدته وبعدت بيه خالص، وقالت له إن أبوه مات.

لـ سبب ما، الشرطة كانت بـ تطارد الراجل اللي اتحبس ده، وكان فيه اتنين ظباط ماسكين القضية (ممدوح عبد العليم وشوقي شامخ بس مش فاكر أسماء الشخصيات اللي لعبوها)، وعايزين الراجل ده يدلهم على حاجة بـ أي تمن، وعندنا كمان بنت الناس اللي اتقتلوا (نعيمة سيد الغريب) هي كمان بـ تطارد حسن عز الرجال، اللي لما خرج كان واحدة بـ تساعده ومؤمنة (رضا)

مع توالي الأحداث، الاتنين الظباط هـ يقتنعوا بـ براءة حسن، وكذلك نعيمة سيد الغريب، فـ تتكون كتيبة مهمتها إنصاف حسن، وكشف حقيقة فرج الأكتع، فـ تبقى هي دي كتيبة الإعدام.

الفيلم فيه كلام عن أكتوبر واللي حارب فيها، واللي استفاد منها، واللي اجتهد واللي سرق مجهود اللي اجتهد، كل الكلام ده مش مهم، إحنا هـ ناخد “الحكاية” لـ وحدها، ونبدأ نشتغل.

حسن عز الرجال يبقى فضل الغول، وفرج الأكتع يبقى زهير الملاح، والاتنين الظباط يبقوا زي ما هم، ونعيمة سيد الغريب تبقى بنت الوزيرة اللي لعبت دورها لقاء الخميسي، بس إيه هـ نجوزها، وجوزها يبقى مشترك في الجريمة، والاتنين الظباط هـ يبقى فيه ظابط تالت أكبر منهم، وهاني ابن عز الرجال يبقى اسمه طارق.

البنت اللي بـ تساعد عز الرجال هـ يبقى فريق، وأهو بـ المرة نلاقي دور لـ بيومي فؤاد، أصله بـ صراحة ممثل تقيل يوزن برضه، إنما سلوى خطاب هـ تبقى بوسي، وقتال قتلة مع نشالة يبقى لازمهم مزور، وأهو يزود الإثارة شوية.

إنما التطور الدرامي لـ الأحداث هـ نخليه زي ما هو تقريبا، ما هو ده الشاسيه اللي إحنا بانيين عليه المسلسل، وحتى الظابط الزيادة اللي حطوه اتقتل في نص المسلسل، علشان يفضل الاتنين ظباط، وبنت الضحية والراجل المظلوم في مواجهة فرج الأكتع اللي هو زهير الملاح.

شفت بقى الحكاية طلعت سهلة ازاي

يالا بقى نختار فيلم نعمل بيه مسلسل السنة الجاية.

نرشح لك

مؤمن المحمدي يكتب: مسلسل رميت طوبته (موجز أخبار المسلسلات 3)

القائمة الكاملة لنجوم مهرجان إعلام.أورج – رمضان 2016

شارك واختار .. ما هو “أسوأ” مسلسل في رمضان 2016 ؟ أضغط هنـــا