أنا وأنت أكيد ونوس.. قصيدة لـ نهى بهمن
مفيش شياطين …
وفي في الدنيا بني أدمين،
مابين نصين قوي وضعيف
ومين هايسلم الراية
ومين ماسك ف قلبه نضيف
حقيقي وزيف…
على الوشين
ورغم إن الطريق واضح
قصاد عينا …شمال ويمين
بنسأل بعضنا وتايهين…
وقاصدين البعاد مخصوص …
مافيش شياطين…
حياتنا فيها كام “ونوس”
جريء قادر بقلب يدوس…
على كل الضغيف فينا…
بصوته الحلو يغرينا
يغمي عنينا بإيدينا…
يوصلنا لطريق منحوس…
مفيش شياطين
عشان ونوس
بيعشق يجي في التفاصيل
وعارف إننا ها نميل
أنا طيب وفيا شيطان
ونص جريء ونص جبان
ونص حقيقي مش عايش
وماسك في الحياة أكتر من الإمكان
ومش قادر على الشيلة ولسة بشيل…
ولسة عاشق التفاصيل
ف نغرق مننا فينا ف تفاصيلنا
ودنيا نسيبها ف تجيلنا
ونقلبها ف تعدلنا
ونتعلم معاها دروس
وقاصدين البعاد جدا
وقاصدين العناد مخصوص…
مافيش شياطين
أنا وأنت أكيد ونوس
نرشح لك
القائمة الكاملة لنجوم مهرجان إعلام.أورج – رمضان 2016
أفراح القبة: ما حدث في المسلسل ولن تقرأه في الرواية
شارك واختار .. من الممثلة الشابة الأكثر جاذبية في رمضان 2016؟ أضغط هنـــا
