أكثر أسباب "البلوك" شيوعًا
محمد حسن
“فاض بيّا خلاص” تلك كانت إجابة صديقي حين سألته “عملتله بلوك ليه؟
احنا ليه بنعمل بلوك على تويتر وفيس بوك ؟
احنا كمصريين كالمعتاد لينا خصوصية في كل حاجة وتجربة مختلفة حتى في البلوك، لما بدأت أسأل بعض الأصدقاء من أهل تويتر وفيس بوك الإجابات كانت مختلفة بالتأكيد، إلى جانب خبراتي الطويلة وسنين اتقضت في مناقشات وحوارات بدأت بحضرتك ضحكتك جميلة وانتهت بالبلوك!
أغلب الناس اعتبرت إن الشتم والسب هو السبب الرئيسي لإنهم يعملوا بلوك لشخص تاني، البعض راح بعد كده للإستفزاز والردود بشكل مزعج، طبعاً السياسة والكورة والحب وأشياءُ أُخرى تعالوا نحكيها
_مصر هي أُمك: في المرتبة الأولى يأتي السب والشتم كرأس حربة وسبب رئيسي للبلوك، يعني مُجتمع يميل للمُحافظ ولو شكلاً دون المضمون، متدين ولو في الظاهر ودايب في المظاهر طبيعي يرفض الألفاظ الخارجة ولو حتى على سبيل الشياكة وكفاية علينا مرتضى منصور اللي دايماً يفكرك إن مصر هي أُمك!
_ تحرير تحرير تحرير: فلاش باك 6 سنين كنت بتتابع خناقة الأهلي والزمالك على جدو، بتحمل ألبوم تصدق بمين لإليسا، محتار تدخل فيلم نور عيني لتامر حسني ولا عسل أسود لأحمد حلمي، فجأة بقا اتقلبت الدنيا، يا محمد ابعت لابوك في البلد قول له حصلت ثورة ومش لاقيين حد ينجحها، فجأة اتحشرنا كلنا في أتوبيس اسمه فيس بوك وميكروباص صغير اسمه تويتر، كلنا عرقنا مرة واحدة من غير مزيل عرق لأفكارنا السطحية.
6 سنين بداية انتشار لظاهرة البلوك لمجرد الإختلاف عن حضرتك، والموضة من وقتها انك بكل بساطة تقول: خسرنا بعض بسبب السياسة
_ خد فشار : هتلاقي مجموعة من الحسابات على فيس بوك وتويتر نصهم يضع صورة الرئيس الأسبق مرسي كصورة شخصية ليه والنص التاني يضع صورة الرئيس الحالي صورة شخصية له، اسحب كرسيك وكميات متساوية من اللب والسوداني والفشار وتُرمس شاي واتفرج على كم البلوكات التاريخي، لا سبيل للتفاهم معهم وسواء تبنيت حوار منطقي مهذب أو حوار عنيف سخيف في الحالتين هيكون مصيرك البلوك، فخد مسافة كافية واتفرج من بعيد وأنت بتلقط الفشار من الهوا
_الله الوطن المهالك: الكورة من أهم الأسباب، التعصب الرهيب، هتتكعبل في ناس أكونتاتهم أبيض في أبيض دول مش ملايكة ولا بيحلموا خير اللهم اجعله خير دول يا سيدي الوايت نايتس وزيهم بالظبط أولتراس أهلاوي أحمر في أحمر ودوقي يا مزيكا، مش عارف هتستغرب لما تلاقي حد كاتب في النبذة التعريفية على حسابه الشخصي “الله، الوطن الزمالك” أو حتى مقدم الزمالك على الوطن “حدث بالفعل” وكذلك الأمر نفسه مع أولتراس أهلاوي والمنتمين لهذا النطاق فكرياً، هات نفس الفشار بنفس الكميات وانتظر البلوك على رواقة.
_ بابا فين: لو عندك حساب في موقع تويتر هتلاقي جملة مشهورة لفت أكونتات مصر “أحلى حاجة في تويتر انه مفيهوش لا أهل ولا قرايب”
جملة مُكررة لكنها حقيقية ولما تمشي وراها تكتشف إن كتير عاملين لأهلهم بلوك على فيس بوك عشان يشعروا بالحرية والإنطلاق، ناهيك عن افتخار البعض بالبلوك دا، وجود الأهل على مواقع التواصل أصبح أحد أهم أسباب البلوك لإنه بيسبب كتير من الإحراج والكبت للجيل الحالي
_ الحب والأشياء الأُخري: ربما يكون سبب غريب إلى حد ما لكنّه مطروح وهو التعلُق بين اتنين من خلال الشات في فيس بوك أو الرسائل الخاصة في تويتر أو حتي واتس آب، رغي طول اليوم وتعود ووقوع في فخ أحاسيس ربما أكبر من مجرد شات فيقوم أحدهما متأثراً بروميو وجولييت وقيس وليلى وعنتر ولبلب ويُعطي للآخر “بلوك متين” مُضحياً بسعادته وذلك حتى يكرهه الطرف الآخر وتنتهي العلاقة “لأنه مينفعش نكمل” نهاية درماتيكية مناسبة للتطور التكنولوجي ولقصص الحب العنيفة في الدراما الفيسبوكية.
تلك مجموعة من الأسباب وبالتأكيد ستختلف من شخص لآخر وليس أمامك طريقة محددة لتجنب البلوك في تلك الأيام، لكن التوسط والتلطف والبساطة وتجنب المناقشات المتعصبة والإنخراط الشديد في العلاقات على مواقع التواصل سيضمن لك الكثير من الإحترام والكثير من الأعصاب المهدرة.
نرشح لك
[ads1]
المذيعة التي أعلنت نجاح الإنقلاب وفشله
تفاصيل ما يحدث في تركيا
دليلك المختصر للأحداث في تركيا
ايهما أفضل فيلم “كابتن مصر” ام فيلم “جحيم في الهند” ؟ اضغط هنـــا
