مؤمن المحمدي يكتب : ألف مشهد ومشهد (74) أونكل ابن رشد
اعترفنا إنه مفيش عمل فني “تاريخي” بـ معنى الكلمة، كل فيلم أو مسلسل أو أي حاجة بـ تقدم دراما، مهما حاولت تقدم التاريخ، فـ هي محاولات مش أمينة، ثم إنه مش ده دور الفن، واللي ياخد معلوماته التاريخية من سيناريو إبداعي هو غلطان، ويستاهل.
إنما برضه مش لـ درجة اللي عمله يوسف شاهين وخالد يوسف مع ابن رشد في “المصير”.
الكلام عن أخطاء تاريخية في الفيلم ده هو نوع من العبث، الأخطاء بـ تبقى في عمل حاول يقدم التاريخ، بس قدم معلومة هنا غلط، خبى معلومة هناك، خلى اتنين يقابلوا بعض، وهم ما قابلوش بعض، كده يعني، إنما يوسف شاهين خد أسماء مبعثرة من التاريخ، وعمل بيهم اللي هو عايز يعمله.
أذكر وقتها إن جرنان الدستور عمل تغطية لـ الفيلم صفحتين، وكانت التغطية هجوم شرس على الفيلم، وكان حمدي عبد الرحيم له مانشيت لطيف أوي، معناه إن الفيلم مش عن ابن رشد الفيلسوف، وإنما عن أونكل ابن رشد وطنط زيزي.
هنا بقى، وقبل ما ندخل في الفيلم، فـ رأينا إنه حتى لو كان يوسف شاهين حر في اللي عمله، وفي اللي قدمه، لكنه كان من الواجب عليه تقديم تنويه في أول الفيلم “إن هذا ليس عملا تاريخيا، وأنه يستوحي فقط اسم لفيلسوف عظيم، وجميع الأحداث من وحي خيال المؤلفين”.
أنا ما أعرفش بره الدنيا عاملة ازاي، بس أنا شفت أفلام عملت كده، استوحت حدث تاريخي، واشتغل خيال المؤلف، فـ عملوا التنويه، مش هـ يرى حاجة يعني لو اعترفنا.
ده ثانيا، أما ثالثا بقى، فـ فيه نقطة مهمة في المشكلة دي:
لو أنا عملت فيلم، ولـ يكن عن عبد الناصر مثلا، وحطيت أحداث من عندي، ازاي هـ أهرب من ظلال الشخصية الموجودة فعلا في التاريخ، واللي اسمها جمال عبد الناصر؟
السؤال بـ صيغة تانية:
لو أنا عملت عمل فني، بلاش حتى عن شخصية، فيه أماكن موجودة فعلا في الحقيقة، فيه أحداث حصلت فعلا، ما أقدرش أقول إن الحدث مش مهم أو مش مقصود.
أفتكر كان حصل نقاش حوالين فيلم “زوجة رجل مهم”، لـ إن الفيلم قصة من خيال المؤلف تماما، ماهيش أحداث تاريخية إطلاقا، لكن جزء من الأحداث كان 18 و19 يناير 1977، المظاهرات اللي كانت أقرب ما يكون لـ 25 يناير 2011، بـ استثناء إن السادات لم الموضوع، وما مشيش.
متهيألي ما ينفعش صناع الفيلم يقولوا إن دي مش قرايتنا لـ اللي حصل في 18 و19 يناير، أو خلينا نقول في جزء منه، وفي تفاعلاته السياسية والاقتصادية والاجتماعية، وإن دي نظرتنا لـ جهاز أمن الدولة وقتها، ولـ وزارة الداخلية عموما، لـ إنك لو مش عايز تقدم رؤيتك دي، ما تستعيرش الحدث ده بـ الذات، كان ممكن تعملها مظاهرات وخلاص.
في فيلم رجل فقد عقله، عادل إمام وإكرامي كانوا أهلاوية، وصناع الفيلم قدموا مباراة بين الأهلي والزمالك ماحصلتش فعليا، ده حقهم من وجهة نظري، لكن ما ينفعش يطلعوا بعد الفيلم يقولوا إحنا مش أهلاوية، وإحنا على الحياد بين الأهلي والزمالك، لـ إنه مش كده، هم بـ ينتصروا لـ الأهلي، حتى لو مكنش ده صلب قصة الفيلم.
فـ اللي عايز أقوله، إنك حتى لو كنت حر في إنك تعبث في التاريخ زي ما إنت عايز، فـ إنت في النهاية مسئول عن رؤيتك دي، وما تقدرش تهرب من إن دي رؤيتك بـ خصوص ابن رشد أو الخليفة أو حتى اليهود.
خلينا بقى ندخل في الفيلم
بس المرة الجاية
تابعونا
نرشح لك
[ads1]
مؤمن المحمدي يكتب : ألف مشهد ومشهد (73) عمل “تاريخي”
هذا ما فعلته C.A.T في عامها الأول
ايهما أفضل فيلم “كابتن مصر” ام فيلم “جحيم في الهند” ؟ اضغط هنـــا
