محمد حسن يكتب: هوبا دبل كيك

كل اللي فاكره إنه كان يوم “بايخ”، مش فاكر اليوم ولا السنة، غالباً كنت في إعدادي، بالتيشيرت البيج، الجو حار، راجع مشي وحيد لا أُبالي، لا أُجيد التسكع والسرمحة ومعاكسة البنات، أحمل شنب أخضر مقزز لا يرتقي الوصول لمنزلة “الشارب” وأنا من كيعاني شارب، شايل شنطة المدرسة برياضتها بدراستها بنحوها ببلاغتها وصولاً لعقدة كتاب “الصرف”، وأنا كده كده بشوط الزلط وأنشن علي البرك اللي بتعملها مواسير “الصرف”، المهم وصلت البيت وجدت الوالد منهمكاً أمام القناة الأولى، حيث كان الإعلان عن البلد الفائز بشرف تنظيم كأس العالم 2010، جنوب أفريقيا نالت الشرف، والمغرب نالت محاولة بشرف، واحنا بعدها بسنين ربنا كرمنا بحكومة عصام شرف…

2010 سنة مهمة جداً وحاسمة تقدر تكلفتها في جملة عمرو دياب “عمرنا ما هنرجع زي زمان”

دي سنة ما قبل الخلاط الحقيقي، سنة دسمة بس منسيّة

تعال نعمل “هوبا دبل كيك” بلغة مواقع التواصل وقول لي هتحس بإيه بعد الأخبار دي

_ 3 يناير : أقر الرئيس حسني مبارك تعديلاً وزارياً …. هوبا يسري الجمل طالع وأحمد زكي بدر بيسخن ونازل تغير مركز بمركز “زمن التعديل الوزاري الجميل” شغل مانويل جوزيه ” يوم من أيامك يا ساحر

_ 6 يناير : فتنة طائفية بنجع حمادي ، وتشتهر نجع حمادي بتصنيع الفتنة الطائفية والألومنيوم …….مات 7 واتصاب 9

_ 16 يناير : محمد بديع مرشداً لجماعة الإخوان بعد انتهاء ولاية عاكف ، محمد بديع هو المرشد الثامن للجماعة……أبوس ايدك ارجع هيسحبوا سراج منير من عنتر ولبلب وهيزقوك مكانه وهتشيل انت السبعة اللي قبلك ، ارجع يا بديع مفيش اثار ولا دهب في الحكومة…..ارجع …ارجع

_ 31 يناير : مصر بطلاً للأُمم الإفريقية للمرة السابعة في تاريخها ……عدي الرقم دا أرجوك يا محمد يا نصر

_ 16 فبراير : غرام في الكرنك ويا ولاد بلدنا يوم الخميس….نظيف بيتجوز والزفاف في الأقصر ….

_ 19 فبراير : أهو جيه يا ولاد ، انت جيت يا رمضان شهقة…..وصول البوب محمد البرادعي المرشح المحتمل لرئاسة الجمهورية في 2011 وسط إجراءات أمنية مشددة ………..ابوس ايدك…..لا ما هو رجع تاني
البوب : 1 | بديع : صفر

_ 18 إبريل : طالب ثلاثة نواب من بينهم نشأت القصاص “حزب وطني” بضرب المتظاهرين من حركة 6 إبريل بالرصاص مؤكدين أن تظاهرتهم تشكل خطراً علي الوطن ……متتعبش نفسك انت يامعلم 10 شهور وهجبلك 6 إبريل كلها في شنطة سودا…….خطة في منتهي الذكاء

_ 9 مايو : تمديد حالة الطوارئ لمدة عامان بموافقة الأغلبية في مجلس الشعب وسط احتجاجات المعارضة ……أبيع كليتي وأعرف مين المعارضة دي وراحت فين

_ 8 يونيو : مقتل الشاب خالد سعيد علي يد اثنين من رجال الشرطة ………شهور قليلة بعدها وبقينا كلنا بالفعل خالد سعيد ، سنين قليلة بعدها وبقينا “قتلوه كما لو كان مصرياً”

_21 أغسطس : سرقة لوحة زهرة الخشخاش ….اتوصي يا حاجة شوية بالجلاش

_ بعدها بيومين : قام السيد البدوي رئيس حزب الوفد بشراء جريدة الدستور ب 16 مليون جنيه ……مترجعش أنت هو قلم واحد وعلقة تفوت ولا حد يموت

_ عالمياً : ديلما روسيف أول امرأة تفوز بمنصب رئيس الجمهورية في البرازيل بعد فوزها في جولة الإعادة علي جوزيه سيرا بنسبة 56 % ……..

هوبا اسبرينت 2016 : سقوط ديلما روسيف بفضيحة في واقعة الفساد المعروفة ب “لاجا فاتو” التي كشفت تورط حزب العمال اليساري الذي تنتمي إليه في قبول رشاوي مالية مقدمة من شركة النفط “بتروراس” من أجل عدة صفقات بقيمة منخفضة “من تحت الترابيزة”

_ ميشال تامر : تعيين ميشال تامر نائب ديلما روسيف رئيساً للبرازيل بعد تصويت البرلمان بعزل ديلما روسيف

_ تامر حسني : ارجعلي تاني بضهرك …….اطلاق تامر حسني أحدث ألبوماته “اخترت صح 2010 ” والتي حملت أسماء أغنياته احساس دفين بقيام الثورة

“بحلم إيه” “بتصعب عليا نفسي” “كام واحد فينا” “اطمن” “مستني اليوم” “لأول مرة” “صحيت علي صوتها”
والذي لقي استحسان كل القوي الثورية والفلولية وحزب الكنبة بس الإخوان لأ عشان الأغاني حرام ، بس يا سيدي وخلصت 2010 وقامت الثورة ……حاسس بإيه دلوقتي ؟

نرشح لك

محمد حسن يكتب: سلملي على جوزك يا اسماعين بيه