إنجازات نجوم التوك شو في "ريو دي جانيرو"
تخيلها: إيهاب سلام
مساء الجُلاش أعزائي المشاهدين في كل مكان، كابتن شلبوكة يحييكم من البرازيل و تحديدا من ريو دي جانيرو علشان نشوف أوليمبيات الإعلاميين 2016 و اللي بتشارك فيه بعثتنا الإعلامية بكتيبة من الإعلاميين اللي إن شاء الله يحققوا ميداليات ذهب وفضة وألماظ كمان وزي ما شايفين على الشاشة البطوله وفعالياتها اللي بدأت من أسبوع تححححديدا بطابور العرض يتقدم البعثة الكابتن مصطفى بكري رئيس البعثه و إيه ده يا راجل!؟ رافع علم مصر وجنبه علم أخضر تاني روعه روعه روعه.
وراه طبعا لاعبينا الإعلاميين المشاركين في البطوله وشايف كابتن شوبير ماشي زعلان وبيصرخ على الشاشة وبيقول ليييييييييه أنا ما أرفعش العلم أقوله يا كابتن شوبير الأقدمية بقى هي اللي بتحكم و كابتن مصطفى بكري قديم جدا وهو الأحق يشيل العلم في طابور (العرض).
شوفوا الجمال و الحلاوه يااااا نهار اااااابيض روعة الروعه و معانا مراسلتنا الجميلة أماني الخياط هتعيشنا في جو البطوله وتدينا ملخص الميداليات في اليومين اللي فاتوا:
*مساء الجلاش يا كابتن أماني
-مساء الكنافه يا كابتن شلبوكة
*قبل ما أبدأ كلامي معاكي قوليلي بس حقيقي الشيف شربيني كسر رقم الـ 100 متر حواوشي؟
-ده حقيقي يا كابتن و أنا اتصلت بيه وسألته عن سر تفوقه وتحب تقول إيه قالي هاتي ورقه وقلم واكتبي ورايا يا ست الكل.
بس بصراحه ما كانش عندي وقت علشان عايزه أتابع كل المنافسات فقلتله بعدين هكلمك تاني.
*كلام جميل تحب نطلع فاصل يا نصر ولا نكمل ؟
-خلاص نكمل مع كابتن أماني الخياط
*اتفضلي
-معاك يا كابتن شلبوكه هقول لحضرتك ملخص سريع بالميداليات اللي خدناها في السبع أيام اللى فاتوا:
*في ألعاب القوي فضية رمي (الجله) لكابتن توفيق عكاشة.
-وزي ما قلنا ذهبية 100 متر حواوشي للشيف شربيني وخد بالك إنه كان مصاب لكن أصر وعملها باللحمه الضاني كمان و شرفنا.
*في الجمباز الإيقاعي أخدنا برونزية المتوازي للاعبه لميس الحديدي وكلنا عارفين أسلوبها وأدائها الجميل إنها بتوزن حلو وبتمسك العصاية من النص دايما.
-في الباليه المائي كلنا عارفين إن كابتن شريف مدكور حقق ميدالية دهب بس للأسف المايوه اتقطع قبل ما ينهي الحركة واللجنه سحبت منه الميداليه وقاعد منهار حاليا في مقر البعثة.
*في السباحه كابتن وائل الابراشي حصل على ذهبية 300 متر متنوع وبالنسبه للجمهور اللي ما يعرفش متنوع يعني أول 100 متر بيشيل الضيف ويروح بيه لنهاية حمام السباحه وتاني 100 متر بيشل الضيف اللي معاه وهو على كتفه وآخر 100 متر بينهي السبق ويسلم الضيف للشرطة.
-عايز أقولك يا كابتن شلبوكه إن مدينة الإنتاج الإعلامي موفر لنا كل حاجه هنا علشان أبطالنا تجيب ميداليات لمصر حتى اللي مبيقدرش يحقق ميداليه بينزل سوق ريو الشعبي اللي هو زي الموسكي عندنا يجيب واحده من هناك.
*الله الله على إعلام مصر ونجومه وما ننساش طبعا أبطالنا اللي لسه عندهم مسابقات الفترة الجاية الكابتن إبراهيم عيسى في شد الحمالات ودي رياضه صعبه جدا جدا وربنا يوفقك يابنى ويبعد عنك لسوعة الإصابات. ده بخلاف حكامنا المميزين في البطوله طبعا كابتن أسامه كمال في التنس بنتمنالهم كل التوفيق.
-نتابع بقى أعزائي المشاهدين أبطالنا الإعلاميين ولكن ببببببعد الفااااصل.
نرشح لك
[ads1]