عيسى عن الاحتفال بالميدالية البرونزية: صغرتوا مصر - E3lam.Com
وليد سمير
تعجب الكاتب الصحفي إبراهيم عيسى من حالة الفرحة التي عمت المصريين والإعلاميين والمسؤولين والممثلين، بسبب حصول مصر على ميداليتين برونزيتين في أوليمبياد ريو دي جانيرو.
وأكد “إبراهيم عيسى” خلال برنامج “مع إبراهيم عيسى” المذاع علي فضائية القاهرة والناس”، أنه يحترم البطلين اللذين حققا الميداليتين، وهما نماذج مشرفة لمصر، ولكن علينا أن نضع الأمور عند حدها الطبيعي.
تابع عيسى: “هو في إيه، دول ميداليتين برونزيتين يا جماعة، ده دول بعدنا بكتير عندها ميداليات ذهب، مصر انتوا صغرتوها أوي لما بتفرحوا وتهللوا على ميداليتين برونز كإننا أخدنا الأوليمبياد، ده الكبرياء الوطني المفروض يجعلنا متألمين من عدم حصولنا على ميداليات ذهب، أو عدم تصدرنا الميداليات في الأوليمبياد حتى”.
وتابع الإعلامي إبراهيم عيسى: “ما تصغروهاش أكتر من كدة، مش كفاية كمان اللي بيرفعلي علم السعودية في طابور الأوليمبياد، والتعامل المخجل من الدولة معاه، مش كفاية فضيحة عدم مصافحة اللاعب الإسرائيلي، فضيحة على مستوي العالم، العالم كله كشف عورة تخلفنا، شايفين إسرائيل عدو ما تلعبوش معاها، مادام لعبتم تلتزموا بأخلاق الرياضة وتسلموا زي الرجالة”.