وليد رشاد يكتب: انهيار الطبقة المتوسطة

ايوه حضرتك … احنا الطبقة المتوسطة بكل شرائحها العليا او الدنيا او حتى العادية، سواء كنا فى مصر او اللى طافحين الدم بره ومستحملين الغربة والقرف، احنا اللى اهلهم شافوا الويل علشان يعلموا ولادهم ويربوهم كويس، وصمموا انهم يزرعوا داخل ولادهم المبادئ الاخلاقية الاساسية فى البيت مش يسيبوهم للشارع يربيهم، وعندنا للاسف مجموعة من القيم والاخلاقيات اهمها ان العمل والدراسة والاجتهاد هما الوسائل الوحيدة لرفع المستوى، ممكن صحيح نستعين بالواسطة لكن علشان نوصل لحقوقنا مش علشان نسرق حقوق غيرنا، وعلشان كده احنا مش ممكن نسرق او نغش او نرتشى او ناكل فلوس البلد فى سبيل زيادة دخلنا لاننا مش متربيين غير على الصح، وما ينفعش نبئه فهلوية وبلطجية زى الاسطورة اللى مسلسلاتكم عملته بطل قومى، لاننا الطبقة اللى اتربت على انها تحاول تحصل على حقوقها بالادب وبالذوق او حتى بالقانون مش بالصوت العالى والبلطجة.

احنا الطبقة المتوسطة .. اللى مش بتستفيد اى حاجة من الدعم اللى انتوا ليل نهار بتكلمونا عنه، مش بنستفيد من مدارسكم اللى لو اعتمدنا عليها مش حنتعلم حاجة، ومستشفياتكم اللى لو دخلناها مش حنخرج منها، ومواصلاتكم اللى مش بنعرف اساساً نتعامل معاها، وتموينكم اللى مش بيوصل لنا اصلاً، وبنشترى كل حاجة من سلع وخدمات بسعر السوق ويمكن اكتر.

احنا الطبقة المتوسطة .. اللى كل الانظمة السياسية من بعد “عبد الناصر” بتضغط عليها علشان تساويها بالطبقة الفقيرة علشان المجتمع يتحول لاسياد وعبيد وبس، رغم ان الطبقة المتوسطة فى اى بلد محترم هى اساس اى تقدم، احنا اللى بنحارب علشان نفضل مع اللى حوالينا على وضعنا وكتير مننا بيفشل وبيسقط فى هوة الفقر السحيقة واللى مستحيل يخرج منها بعد كده.

احنا الطبقة المتوسطة .. اللى بتستحمل نتيجة الفساد مرة وبتستحمل عشرات المرات نتيجة الاصلاح المزعوم اللى عمره ما اتحقق، احنا اللى كل شوية تقولوا لنا شدوا الحزام .. شدوا الحزام .. وانتوا اساساً عمركم ما ساعدتونا نشترى اى حزام او حتى بنطلون.

وليد رشاد يكتب: هزموه كما لو كان زملكاوياً

احنا الطبقة المتوسطة .. اللى الكل طمعان فيها من اول البواب وسايس الجراج مروراً بالسباك والكهربائى والنجار والميكانيكى والفكهانى و..، و..، و.. ونهاية بموظفين حكومتكم الموقرة، احنا المطحونين فى الشغل ليل نهار ومفيش عندنا وقت نخلص اى ورقة حكومية علشان البيروقراطية المعششة فى دواوينكم، وعلشان كده بنضطر ندفع فى الورقة اللى بعشرة او خمسة مية ويمكن الف علشان ننجز.

احنا الطبقة المتوسطة .. اللى بتصعبوا علينا كل شوية فرص السفر وكأنكم سجنتونا جوه معتقل كبير، ولما نشتكى من الاوضاع السيئة تقولوا لنا غوروا فى ستين داهية وكأننا احنا اللى ماسكين فيكم.

احنا الطبقة المتوسطة .. اللى بنسدد بانتظام ضرايب دخلنا اللى بيكفينا بالعافية، واحنا اللى اهلنا واخواتنا هما اللى بيدافعوا عن البلد ضد اى خطر داخلى او خارجى، واحنا والفقرا بس اللى ولادنا بيموتوا علشان خاطر البلد ديه، وحضراتكم بتلاقوا مليون واسطة وثغرة علشان تهربوا باللى يخصكم عن المواجهات الحقيقية، وفى الاخر يظهر نطع منكم ويقول انتوا مش وطنيين وانتوا بتكرهوا البلد !!!!

واحنا .. واحنا.. واحنا … وبعد كل ده حضراتكم بتتطلبوا مننا نتبرع علشان مصر يا اخى … ولا بلاش !!!!!!!!!