"حفيف توبِك".. جديد جوني وأنطونيوس نبيل - E3lam.Com
أطلق الفنان جوني بمشاركة الشاعر والملحن أنطونيوس نبيل أغنية “حفيف توبِك” وهي أغنية لحبيب يكمن في قبره منتظرًا حبيبته التي تمشي فجأة أعلى هذا القبر.
“حفيف توبِك” اشترك في غنائها الفنانات مريم حلمي وسارة معروف وريم نسيم وقام بتوزيع موسيقاها الفنان محمد يسري.
وتقول كلمات الأغنية:
جروحي اتبعترتْ شبابيك
على الجُدران
بتسأل: إمتى هـ تضمِّي
العيون إمتى؟
بلاش بُعدِك يكون أسلاك
على القُضبان
دانا لو كنت متقطَّع
ميتين حِتَّة
وعدِّيتي على قبري
ولو غلطة
.. حفيف توبِك هـ يوصلِّي
هـ ألملم عضمي لو باقي
وألملم فوقُه أشلائي
ولو وطِّيتي هـ تلاقي
عيون فـ الوَحل مفتوحة
.. فـ حُضن عينيكي بتصلِّي
عيون بالحلم مجروحة
.. فـ حُضن عينيكي بتصلِّي
ولولا خوفي من خوفِك
وريحةْ غيري فـ كفوفِك
.. أكيد م القبر هـ أطلعلِك
هـ أفتَّح عيني وأتماسك
قُصاد أشباح رِماح نورِك
وأخطِّي فـ ضيّْ أنفاسِك
يغمَّض حُزني فـ حضورِك
وأشوفِك حتى بجروحي
تغيب العتمة من روحي
.. ونا فـ العتمة بأرجعلِك
تمدِّي بعَزم أحلامِك
وتبكي يقولوا غنِّيتي
وأمدّ الضِّلّ قدامِك
عشان لو فوقُه خطِّيتي
.. يبوس بشويش جروح نعلِك
يدوس كل الدروب فيكي
تكوني الريح يطاوعها
تكوني التُوهة فـ الآخر أكون ليكي
وقبل إيديَّا ما تكمِّل صوابعها
.. تلاقيهم محاوطينِك
يسيل بينهم وبين جسمِك
عرق زيّ العطش لاذع
يُقع يرسم حروف اسمِك
آهات ع الأرض بتنازع
يعود النبض من تاني
ونا بأغرق فـ نار شمسِك
يهبّ يهزّ شرياني
ويرضع من لبن همسِك
على صدرِك أبات مصلوب
تكوني الحلم والغاية
شايلِّك بين ضلوعي شعوب
بيبكوا بلهفة جوَّايا
ورغم المنفي حاضنينِك..