رسالة نشوى مصطفى لمنتقدي الجيش: هتتفرموا - E3lam.Com
وجهت الفنانة نشوى مصطفى رسالة لمنتقدي الجيش المصري، قائلة: “يد تبنى ويد تحمل السلاح.. لو فهمت معنى الجملة دى حترحم مرارتنا اللي اتفقعت من تريقتك وسخريتك وضحكك على الجيش اللي محافظ على البلد اللي سيادتك عايش متأمن فيها”.
وأضافت عبر حسابها الرسمي على موقع “فيس بوك”: “لو سيادتك بصيت كده ناحية سيناء وشفت البطولات اللي بينجزها جيشك.. عقيدتهم ويقينهم النصر أو الشهادة.. بيدفن زميله اللي كان واقف جنبه اللي استشهد على إيد إرهابى وبمنتهى اليقين يجرى على مكانه سلاحه فى إيده.. لو سألت نفسك إحنا ليه الدولة تقريباً اللي ليها جيش قوى وقادر لسه يكون موجود بقوة بعد الجيش السورى والعراقى ما أنهكت قواه”.
وتابعت: “لو سيادتك سألت نفسك إحنا ليه بعد الحصار الاقتصادى غير المعلن وغير المباشر عن طريق تطفيش المستثمر وتطفيش السياح بسبب أعمال الإرهاب المتعاقبة لسه الحمد لله قادرين نعيش.. لو سيادتك بعد ما سألت نفسك ونفسك ماعرفتش الاجابة استمر فى التريقة والسخرية والنضال الإلكترونى ضد الجيش المصرى”.
وواصلت: “لازم تكون فاهم إن كل بيت فى مصر فيه مجند أو ظابط أو شهيد.. يعنى الجيش المصرى هو شعب مصر، واللي يفكر او يحاول يقرب من شعب مصر بيتفرم.. بيتفرم بالمعنى الحرفى، وخصوصاً بعد اللي الشعب شافه فى الخمس سنين اللي فاتوا، وإحنا مابننساش مين الراجل وقت الشدة”.
واختتمت حديثها، قائلة: “المواقف بتتسجل والشعب عمل فرز بالبرهان وبالتجربة والشعب المصرى عينيه شافت إخواتنا السوريين والعراقيين والليبين والأهوال اللي بيعانوها بسبب إضعاف جيوشهم ومحاولات تفكيكها.. عاش الجيش الشعب المصرى”.
