محمد حمدى سلطان يكتب : 40 سببًا لعشق أصالة

كلما تكلمت أصالة اثارت الجدل
وكلما غنت أصالة أثارت الشجن

صاحبة شخصية غريبة الأطوار ، تمتلك موهبة خاصة وصوت استثنائى إما سيأسرك منذ أول لحظة لتصبح إحدى مطرباتك المفضلات ، أو سيظل يزعجك إلى الأبد ولا تطيق أن تسمعه أبدًا ..

نادرًا ما ستصادف من لا يحب أو يكره أصالة ، فهى فى رأيى شخصية يصعب تجاهلها أوالشعور نحوها بأى مشاعر حيادية ، فإما ستكرهها تمامًا أو ستصبح أحد المغرمين بها وما أكثرهم ،عن نفسى لا احب أصالة فقط لأنها صاحبة صوت جميل أو تعجبنى أغنياتها ، ولكن لدى 40 سبب آخر يجعلونى واحدًا من عشاق تلك المطربة السورية الجميلة أصالة مصطفى نصرى ..

1- قُدرتها على أن تستحوذ على مشاعرك منذ إطلالتها الأولى’ عندما تقول بكبرياء منكسر( الناس بتمسح دمعتى وحبايبى ولا سألوا عليا ) وهى جملة كفيلة بأن تجعلك تتعاطف معها إلى الأبد ..

2- قالت لحبيبها سامحتك وبعدها عينك ما تشوف الا النور ( ومش غصب عنى ) ( ولا ضعف منى ) ( سامحتك كتير وبحذرك ) وهكذا إلى آخر الأغنية ، وهو ما يؤكد أنها مخلصة تمامًا للقاعدة الأنثوية الأهم وهى تعمد إظهار القوة – أو التظاهر بها – فى عز لحظات ضعفها..

3- قلبها كبير ( ولا عمر قلبى يكون سعيد ، لو تشترينى بدمعها ، إرجعلها ) ..

4- ماعندهاش استعداد تحت أى ظرف ان يتقال عليها خطافة رجالة ( إرجعلها لو روحى فيك ، وحياتى كانت بين إيديك ، هيكون عذاب أكبر كتير ، لو كنت هخدك منها ) ..

5- تمتلك من الوضوح ما يجعلها عندما تسأل ( وفين نلقى اللى يسمعنا ) لا تتركك لتحتار كثيرًا وتجيب هى فى نفس اللحظة ( مالوش فى الدنيا دى عنوان ) والأهم انها ستعطيك الإجابة الصحيحة حتى لو مش هتعجبك ..

 

6- تمتلك ثقة قاتلة ( يقولوا ما يقولوه عنى وطبعًا غيرانين منى ) وما يجعلك تتأكد انها ثقة بالنفس وليست غرورًا أنها تقترن لديها بقيمة إنسانية مهمة وهى الصدق ( ولا بتهز إكمنِّى انا الأصدق .. انا الأصدق ) ..

7- غالبًا ما تجد الرجل هو من يطالب المرأة بأن ( تكبر دماغها ) من كلام الناس ، أصالة – وفى حالة نادرة جدًا – فعلت العكس ( وحبى ليك مجننهم فرَيَّحنا وسيبك منهم ) ببساطة يعنى بتقوله ( كبر دماغك ) ..

8- اللى فى قلبها على لسانها ( مبحبش حد الا انت ولا نفسى كمان يا حياتى ) ولما حست انها اتورطت فى الجملة دى فضلت طول الأغنية بتحاول تبررها ( مبحبش حد الا انت مع إنى بحب الناس ) لكنها تعود لتوَرط نفسها أكثر ( مبحبش حد الا انت ، والعالم ييجى وراك ) ..

9- تحمل بداخلها روح طفلة أقل المواقف وأبسطها قد يؤثران بها
( على قد ما انت بتخاف عليا ، أوقات بتنسى وتسيب إيديا ) ..

10- لا تخجل من الإعتراف بتكرار نفس الخطأ مع نفس الشخص لأكثر من مرة ( واغنيلك تغنيلها ، أسيب الدنيا وارجعلك رجعتلها ، لتانى مرة تعملها ) ..

 

11- وحتى لا يشكك أحد فى إيمانها من باب أنه لايُلدغ المؤمن من جحر مرتين اضطرت لتأكيد أن ( قلب المؤمن هو دليله وانا مؤمنة ) ..

12- جميلة وعفوية لدرجة أنها قالت بثقة تُحسد عليها ( عايزنى اقول بحبك ليه ، بحبك بس مش قايلة ) وهى خطة فى منتهى الذكاء كما هو واضح..

13- حتى فى أصعب المواقف لا تفكر فى نفسها فقط بل تفكر فى نفسها وفى حبيبها الذى يحب امرأة أخرى ، بل تُشغل بالها أيضًا بمصير المرأة الأخرى ( دلوقتى قولى حنعمل إيه ، إحنا التلاتة حنعمل إيه ) ..

14- المطربة الوحيدة فى العالم التى اعترفت صراحة فى إحدى أغنياتها بأنها تكذب أحيانًا وتقول كلام ليس له أى أساس من الصحة ( حتى انا أوقات بتاخدنى حالات ، واهمس بحاجات ولا ليها أساس ، وكلام وخلاص ) وهى شجاعة نادرة تستحق الاحترام ..

https://www.youtube.com/watch?v=T80Vf1-vizk

 

15- لم تكتفِ بشجاعة الاعتراف بالخطأ ، بل أكدت أن الأهم هو أن نغير من أنفسنا ( لا حاقول من تانى كلام ، ولا حاهمس تانى خلاص ، ده العمر يدوب أيام ، آه من جرح الإحساس ) ..

16- تملك أيضًا شجاعة الإعتذار .. ( أيوة جيتلك أعتذرلك ، قلبى قالى هتسامحنى ) ولكنها لا تنسى كونها أنثى …. ( وانت لازم تعتذرلى ، أصل ظنى فيك جرحنى ) اللى هو متحاولش تفهم واعتذر من سُكات أحسن ..

17- لديها استعداد للتضحية من أجل من تحب دون أدنى تفكير أو تردد
( وعشان تعدى المركبة وتوصلك بر السلام ، لازم نقلل حملها وانزل أنا من غير كلام ) ..

نرشح لك: 30 أغنية صنعت “أسطورة” عمرو دياب

18- لم تنسَ والدها الراحل وكان مطربًا كبيرًا بسوريا وغنت فى ألبومها
( يمين الله ) أغنيته القديمة ( يا الناطر ) وأهدتها الى روحه ..

19- بنت بلد وبتراعى الأصول كويس
( بالأصول أديك عينيا بالأصول .. وبسماحة وبصدق نية وبقبول ) ..

20- بتجيب من الآخر
( تكون صادق تكون كداب خلاص مابقتش تنفعنى ) ..

https://www.youtube.com/watch?v=oORi2cq-c_I
21- عملت ألبوم خليجى فى 2002 اسمه ( ياخى اسأل ) ، وضعت فى أوله أغنية ( ياخى اسأل ) وفى النص ( خلاص ما تسأل ) وختمته باغنية ( اسأل علينا ) ما يؤكد أنها شخصية مُربكة ومتقلبة المزاج بشكل لا يخلو من طرافة ..

22- سيئة الحظ ، يضعها القدر أحيانًا فى مواقف صعبة ، تُجبرك على التعاطف معها ( أقولك بحبك تقولى افكر ) ..

23- أول من بشَّرت بحالة العدمية والتى وصلنا لها الآن
( الألم عادى والندم عادى والعذاب عادى .. أى حاجة كل حاجة مش غريبة ، غريبة عادى ) ..

24- تتعامل برُقى مع من يستحق حتى فى لحظات الفراق
( ودَّع قلبى بطيبة ده انا برضه الحبيبة ماتشوفنيش غريبة وماتنساش الطيب ) ولا تكتفى بذلك بل تترك له الباب مواربًا للعودة وبطريقة لا تنتقص من كبريائها ( يمكن تحتاج قلبى أو تشتاقله قريب ) ..

25- تؤمن تمامًا بنظرية الحلو مايكملش
( أى حاجة نفسى اصدق أى حاجة كل حاجة حلوة يطلع فيها حاجة ) ..

26- تنظر للأمور بواقعية شديدة ( هو احنا لاقيين الطريق علشان تقول نتحمله ) وهى نظرة لا تخلو من حس ساخر ( وإن كنت راسمُه فى الخيال إنسى كلامى وكمله ) اللى هو مع نفسك بقى ..

27- تعلمت من تجاربها ونضجت وأصبحت تضع كل كلمة فى موضعها الصحيح تمامًا ( أملى وشريك ذاتى وأغلى ما فى حياتى ) وهى جملة عبقرية تحمل من الحب لحبيبها بقدر ما تحمل من تقدير للذات فقالت شريك ذاتى ولم تقل كلى ملكك مثلًا وأغلى ما فى حياتى وليس أغلى من حياتى والفارق بينهما كبير جدًا ..

نرشح لك: محيي الدين أحمد: أنغام الأولى والأخيرة.. أنغام الوحيدة  

 

28- عميقة دون ادعاء
( واللى عشنا العمر نحلم بيه نلاقيه بين إيدينا ولسه بندَوَّر عليه ) ..

29- متصالحة جدًا مع نفسها ومع نزعات الشر بداخلها
( أيوة انا فرحانة فيك وعيبك من كل الدنيا جتلى انا ) وهو ما يجعلك تقدر ضعفها البشرى وتحترم عدم ادعائها لملائكية زائفة ..

30- تهتم بعد ذلك بتوضيح موقفها حتى لا يُساء فهمها
( شر الحليم مش من مفيش ) ..

31- تعترف بأن ( آه كان وهم وعشت فيه صدقته وعيِّشنى فيه ) ولكنها تعود لتقول ( مش سهلة بعدى يلاقى واحدة يحبها ) والغريب أنك ستصدقها وتشعر ان الجملة منطقية تمامًا ..

32- بتعرف تاخد حقها كويس ( وكأنى ماعملتش حاجة .. من واحد كان يوم ولا حاجة ) وفى قول آخر بتعرف تقصف جبهات ( من حقك ما كتير كبّرتك .. كبّرتك على سيدك ) ..

33- قد تراها براجماتية تمامًا ( وهييجى اليوم واحقق حلمى بأى طريقة ) لكنك ستكتشف أنها لا تقصد سوى المثابرة والإصرار ( وهاخدها تحدى لنفسى اصل انا شخصية عنيدة ) ..

34- من الصعب توقُع ردود أفعالها فقد تبدو هادئة تمامًا ( وعمومًا بكرة يبان مين فينا طلع خسران ) ولكنها تنفجر فى لحظة ( ولعلمك يوم والتانى وتجينى لحد مكانى ندمان على حب زمان ) ..

35- لا تعرف المجاملة بل ستصارحك برأيها فيك وبكل وضوح
( وحتفضل على طول لعبتها ..إكمنك دوبت وحبيتها )
وستتمادى وتسخر منك لعلك تفيق ( قلبك بقى أنتيكة فى بيتها ) ..

 

36- قدَّمت دليل آخر على النضج وعدم المبالغة فى التعبير عن مشاعرها
( والساعة اللى بعيشها فى حضنك 60 دقيقة حياة ) مازودتش ثانية فى الوقت اللى غيرها مازال بيقول ان لحظة جنبك بالعمر كله ..

37- مُتَوحدة وتميل الى العزلة
( أصل انا لما بكون متشافة بتوتر أصل انا خوافة ) ..

38- مرتبة ومنظمة جدًا حتى وهى بتفارق حبيبها رسمتله جدول وفضلت تمَلِّيه ( وفى خانات الذكريات حط إسمك فى المواجع ) ومن أجل مزيد من الدقة ( تحت خانة الملحوظات اكتب ان الجرح واجع ) وفى نهاية الحصة
( أما فى الخانة هنرجع إكتب انه ماعدش نافع ) ..

39- متصالحة مع الحياة بكل تقلباتها ( مهما شفت فى عمرى ياما من مواقف مؤلمة .. عايشة زى ناس كتيرة ع الهموم مُتأقلمة ) ثم تضيف لتؤكد قيمة مهمة مثل الرضا ( واللى يحصل ليّا دايما راضية بيه ومسلمة ) ..

40- غنَّت من كلمات عمر طاهر ( بدوب فى حبى لربنا ومحبته عبادة .. النية صافية وجنبها سبحة وسجادة ) ..