إيهاب سلام يكتب: دليل الرجل السعيد لأفلام العيد
– بعد صلاة العيد كل راجل من غير (لف و دوران) كده ياخدها من قصيرها يقوم يفتح الدولاب و يجيب هدوم الولاد و الجزم الجديدة و ميستناش لما مراته تقوله (البس علشان خارجين) تحسبا لاي هجوم من الحماوات فى يوم زي ده.
– زحمة المواصلات فى شوارع القاهرة و الأسكندرية مش مبرر نهائي انك تقول لمراتك مش خارجين لأنها هتقولك خرجنا فى أي مكان حتى لو نركب باخرة نروح القناطر نشوف (الماء و الخضرة و الوجه الحسن)
– لا تتردد فى شراء اللحمة من الجزار بعد شائعات انتشار لحوم الحمير فى مصر و فرح مراتك وولادك و ادخل عليهم حتى لو ب (كلب بلدي) أكيد هيفرحوا بيك و متنساش تساعد مراتك فى رص اللحوم فى الثلاجة و (يجعله عامر)
– متنساش العيدية للأولاد لانهم مش هيقتنعوا بالكلام اللى أهلك كانوا بيضحكوا عليك بيه و يقولولك انه عيد لحمه و اديهم العيدية من سكات حتى لو من (تحت الترابيزة)
لان فى الحالة دي هتكون فى مرمي نيران مراتك و الأولاد.
نرشح لك : إيهاب سلام يكتب: أوسكار رمضان!؟ 2016
– سيبك من الأرصاد الجوية و نشراتها لان أوقات كتير خاصة لو مسافر مدينة ساحلية هيقولك احتمال موجة بارده على السواحل الشماليه و القاهرة و تعيش جو (حملة فريزر) و تلاقي نفسك فى الأخر فى جو أشبه ب (جحيم فى الهند)
– بالنسبه للشباب السينجل اللى بيقضوا العيد فى مشاهدة افلام من على اليوتيوب و أغاني الالبومات الجديدة أعمل حسابك ان الشبكة ممكن تقع و مفيش نت و ساعتها مش هتلاقي خدمة عملاء تقولك اقفل الراوتر و افتحة. كل شله بيبقي فيها (صابر جوجل) اتصل بيه و هيقولك تعمل ايه بالظبط.
– لو مديرك فى الشغل اتصل بيك فى العيد و قالك محتاجينك فى الشغل ضروري هتبقى مضطرترمي شريحة الموبايل و تروح أقرب قسم تبلغ عن سرقة موبايلك و عربيتك و انك مخطوف شخصيا و طالبين فيك فدية ساعتها مش هيبقي قدامك غير انك تستخبي عند حد من صحابك فى أجازة العيد و تعيش بقي مع باقة من المسرحيات الكوميدية زي مدرسة المشاغبين و العيال كبرت و سك على بناتك.