كيف علق المشاهير على فيديو سائق "التوك توك" - E3lam.Com

أثار التقرير الذي أذاعه الإعلامي عمرو الليثي، في برنامجه “واحد من الناس”، ليلة أمس مع سائق التوك توك، الذي تحدث عن سوء الأوضاع المعيشية في مصر، حالة من الجدل على مواقع التواصل الاجتماعي، واختلفت الآراء حوله ما بين مؤيد لكلامه، وما بين مشكك في هوية الشخص نفسه ومن وراءه.

وأبدى بعض المشاهير على السوشيال ميديا آرائهم في التقرير

نجيب ساويرس

أكد نجيب ساويرس، رجل الأعمــال، أن سائق “التوك توك” لخص حال مصر والمصريين منذ عام 1952 حتى الآن، مشيرًا إلى أن السائق لا يلوم الحكومة لكنه يرصد الواقع الأليم.

وكتب “ساويرس” تغريدة على موقع “تويتر”: “سواق التوك توك ده بيلخص حالنا من سنة 1952 لدلوقتى، وبالتالى هو مش بيلوم حكومة النهاردة إنما بيرصد واقعنا الأليم ويستثير حماسنا وحبنا لبلدنا”.

نشوى مصطفى:

وعبر حسابها في موقع التوصل الاجتماعي Facebook، كتبت نشوى معلقة على حديث سائق “التوك توك” لتؤكد أن جميع المصريين الآن يمروا بظروف صعبة إلا طبقة واحدة وهي نسبتها 1%، وأكدت أنها ممن يتحملون أيضا فقامت بالاستغناء عن بعض الأشياء الضرورية في منزلها، كما أكدت على أنها منذ طفولتها تربت وتعلمت أن تتحمل وقت الصعاب بكل صبر، فكتبت:

“تابعت زى غيرى فيديو سائق التوك توك ربنا يعينه ويفك كربه — ويعين كل محتاج ويفك ازمة كل مأزوم — لكن اسمحولى اقول كلمتين — اولاً اعترف اننا فى وضع اقتصادى كلمة صعب حتكون هينة لو قلتها — وللمعلومة الوضع صعب على كل الفئات لا استثنى منها سوى طبقة الواحد فى المائة اللي فلوسهم بره مصر — انا واحدة من الطبقة اللي تحسبهم اغنياء من التعفف — اللي بالبلدى شغلهم بالارزاق — وشغل جوزى الحمد لله موصلنا لحد الكفاف — حد الكفاف اللي معاه كنت مضطرة انى استغنى فى بيتى عن حاجات تتصنف ضرورة ملحة ومش شايفه ده بطولة منى — انا اتربيت كده — امى الست البسيطة اللي مش متعلمة علمتنى كده — انى وانا معايا اشكر ربنا — وانا ماعنديش اشكره اكتر وادبر امورى — وابويا علمنى ان الرجولة انى استحمل الصعب فى الشدة ومااقولش آه ”

وتابعت: “نرجع لاخونا سواق التوك توك — حقه انه يقول آه ويصرخ من قلبه لان الوضع صعب وادينا بنحارب — بس واجب نفهمه اننا فى وضع مأزوم – – وليه اسباب كتير اهمها أننا ورثنا من اهالينا بلد خربانه فقيرة مسروقه لصالح طبقة حصل عليها ثورة — وحد يفهمه ان منظومة التعليم والصحه مختاجة مدى زمنى كبير ومحتاجة فلوس كتير ومحتاج ضمير –حد يفهمه اننا فى الحرب وان مصر زمان كانت بتحارب اسرائيل دلوقتى بتتحارب من اكتر من دولة لصالح اسرائيل الكبرى — حد يفهمه انه يحمد ربه انه شغال على توك توك بيمشى فى شوارع فيها بيوت مش اطلال بيوت صواريخ العدو والحبيب بتدمر فيها — شوارع فيها ناس مش جثث مش لاقيه اللي يدفنها — حد يفهمه ان احنا فى وقت الشدة الصعب ويفكره ان اهالينا فى الوقت الاصعب كانوا رجالة ووقفوا وقفة رجالة — المصريين فى الشدة ياكلوا نص بطن ومايضحوش بوطنهم — نقف جنب بعض شوية ومانفتحش جبهات تضعفنا ومعلش هانت ان شاء الله

وفي نهاية حديثها وجهت كلامها للقنوات الفضائية التي تعتبرها من اعداء الوطن واخذت تنشر الفيديو قائله لهم: “وفى الاخر حلال على قنوات العدو الفضائية الڤيديو الهدية ده اللى شغال عرض مستمر — يالا خليهم ياكلوا عيش”.

خالد الصاوي

تعليق مقتضب من الفنان خالد الصاوي، حيث قال :” سواق التوكتوك هايل! هو رتبته ايه؟

عمرو سلامة

حذر المخرج عمرو سلامة من عقبات حديث سائق “التوك توك”، عن حال مصر.

وتساءل “سلامة”، على على حسابه الرسمي على  “فيس بوك”: “ليه فيديو سواق التوك توك انتشر كالنار في الهشيم مع إن في مليون فيديو وبوست كل يوم بيقولوا نفس الحاجة ومش بينتشروا بالقوة ديه؟”.

وتابع: “مش مهم الفيديو حقيقي ولا مصنوع ومفبرك -ولو إني ميقن إنه حقيقي وعفوي- ومش مهم السواق ده إخوان ولا لأ، ومش مهم إن كان خريج توك توك أو خريج هارفارد، كل ده تشويش مالوش قيمة، المهم ليه محتوى كلامه خلى الناس تنشره، بشكل خلاه أسرع فيديو انتشارًا تقريبًا في تاريخ الإنترنت في مصر”.

وأضاف: “رأيي إن أول سبب لانتشاره هو إنه يبدو للناس إنه خارج من مواطن عادي مش منتمي لتيار، لأن كل التيارات تم تشويهها حتى لو مش إخوان، ثانيًا إن واحد طبيعي من عامة الشعب واضح إن عنده دراية وإدراك ووعي كبير، لكن ببساطة تقدر تقول إن سبب ده إن السواق ده عنده بس فيسبوك، لأن تقريبا معظم معلوماته وكلامه متاخد من بوستات شهيرة انتشرت على الانترنت قبل كده، منها بوستات بالمناسبة مش دقيقة”.

وواصل: “ثالثًا إن كلامه بيوضح حجم المأساة اللي بتعاني منها الطبقات التحت متوسطة، واللي بدأت الطبقات الأعلى تحس بيها بشكل كبير، الفيديو ناقوس خطر لعدة أسباب، أولها ناقوس خطر إن الطبقات التحت متوسطة فقدت الثقة في الإعلام كاملاً، وبَقى في إيدها تليفون في باقة وبيخشوا على النت بيعرفوا خطاب مغاير، حقيقي كان أو غير دقيق بس بيصدقوه أكثر من الإعلام”.

وذكر: “ثانيها أن الطبقة ديه خوفها من مواجهة السلطة بيقل وحنقها من الوضع الراهن بيزيد، ثالثها إن انتشاره بالسرعة ديه معناه إن الناس مستنية حد يزقها، غاضبة بس مكبوتة، وممكن أصغر عود كبريت يخليها تنفجر، أنا لو من السلطة أخاف، ولو منها لما أخاف اعدل مش أقمع أكثر”.

واختتم: “متأكد إن في ناس في السلطة بعد الفيديو ده مش بيفكروا في حلول حقيقية على قد ما شايفين الحل رقابة أكثر على الانترنت أو حتى غلقه، لأن حتى هم فقدوا الأمل في حلول جذرية زي إعطاء حرية أكثر، وحلول سياسية توحد الناس، وحلول اقتصادية حقيقية لو حصلت تغضب مؤسسات قوية مستنفعة من الأزمة، الخطر يقترب، وكلما تظن أن الناس هبطت وخافت هايفاجئوك، فالحق نفسك وألحقنا معاك، فاتورة الانفجار كبيرة مش بس على مصر ده على العالم كله، فأليس بينكم رجل رشيد؟”.

عمرو محمود ياسين

علق عمرو محمود ياسين على الفيديو قائلا :” اولا الناس اللي بتقول ان الحوار بتاع سائق التوكتوك مفبرك ..ارجوكم اكدوا لنا المعلومه دي عشان لو الراجل ده ممثل يبقى نستعين به ناخد بيه أوسكار …ثانيا انتوا ازاي ماتعرفوش أن في مواطنين بسطاء و عندهم هذا الوعى و هذه الثقافه ..لا في..و كتير ..و مش اول مره يبقى في نموذج زي كده .. اما الناس اللي بتستهين بوظيفته كسائق توكتوك..فا ياريت حضرتك تجيب له فرصة عمل مدير بنك سي اي بي مثلا يمكن ساعتها تقدر تستطعم كلامه و تهتم بيه و ماتسخرش منه .”