السيسي عن دعم الخليج: كفاية إحراج - E3lam.Com
قال الرئيس عبد الفتاح السيسي خلال حضوره ندوة بعنوان “السياسة النقدية وأزمة سعر الصرف.. الأسباب والحلول”، ضمن فعاليات المؤتمر الوطني الأول للشباب المنعقد في مدينة شرم الشيخ: “لازم نعترف إن الست سنين اللي فاتوا ظروفنا صعبة، والموقف الاقتصادي مش قوي.. دولة ظروفها صعبة.. نعمل إيه؟.. نعمل حالة لدى المجتمع تؤدي إلى حراك.. عملت الإصلاح يبقى ضاغط على الناس أمر ممكن نتكلم فيه.. ما عملتوش الأمر يزداد تأزمًا وإنت رايح برضه إلى مشكلة كبيرة”.
وأضاف :”أنا دوري معاكم عملته، وقلت لكم المشكلة كبيرة والمشكلة دي أنا مش هقدر عليها لوحدي، لكن نقدر عليها كلنا، ودوري عملته بس دوركم إنتم دلوقتي هتعملوه ولا.. أنا بكلم كل المصريين”.
وتابع: “كفاية نحرج أشقاءنا العرب بأنهم يدعمونا، كفاية نحرج الناس ونحرج نفسنا، ومش هقول أكثر من كده، وكل الإجراءات اللي اقترحت عاوز تعملها في حسبة واحدة في وقت واحد، في الاقتصاد بياخد مدى زمني كبير عشان تبان آثاره، ومش معقول نبقى مسؤولين عن الناس والناس تعاني معانا لكن مفيش حل غير إن إنتم تصمدوا، وأنا مش بحمل الموقف ولا أزايد، فيه إجراءات وجهد منظم ضخم. إنتم مش بتبصوا الدول اللي حصل فيها التغيير.. الدولة الوحيدة اللي واقفة على حيلها إنتم.. وده تحقق بالمصريين.. لازم نضرب إرادة المصريين ونعمل جواهم حالة من عدم الرضا والسخط العام وفي الآخر نصل للحالة دي وتبقى الأمور خرجت عن السيطرة وتم تحقيق الهدف في تدمير الدولة”، لافتًا إلى أن المصريين تصدوا لتلك المخططات.
وأضاف: “لما طلبتوني لقيتوني ولم أبخل عليكم بحياتي.. أنا مش طالب حياتكم، وأنا طالب منكم إن إحنا نبقى أمة ذات شأن، تصبر وتتحمل وما تتكلمش”.