كيف تصبحين ريهام سعيد في 10 خطوات؟
عبد العزيز أحمد
عزيزتي الإعلامية الناشئة، هل تريدين تحقيق الشهرة السريعة؟ إذا كانت الإجابة بنعم يجب أن تختاري نموذجًا يعكس هذه الشهرة وتسيرين على خطاه، نحن نساعدك في السطور المقبلة إذا اتفقتي معنا على أن أفضل نموذج للشهرة الطاغية والسريعة تجسده الإعلامية ريهام سعيد.
بداية هل تذكرين برنامج “خلف الأسوار” الذي كان يذاع على التلفزيون المصري.. إذا تذكرتيه فهذا جيد لأننا سنحتاج إليه بعد قليل، والأن لنبدأ سريعا استعراض الخطوات العشر.
الخطوة الأولى: اجعلي صوتك مبحوحًا دائمًا، وتحدثي بصوت خافت أغلب الوقت “أه قبل ما أنسى” ستحتاجين لقطرة دموع من نوع “فريش” ودي طبعًا ليها استخدام واحد بس ملوش تاني..
الخطوة الثانية: اذهبي إلى هايبر ماركت وابحثي عن “سيلف دفينس أو صاعق كهربائي” وطبعًا هتقوليلي أنا هعمل بيهم إيه دول .. أنا عايزة أشتغل مذيعة .. هرد عليكي وأقولك ..دول بقى هينفعوكي في المداهمات والأوكار والبؤر الإجرامية اللي هتروحيها .. لازم الواحدة تأمن نفسها برضه ..
الخطوة الثالثة: تعاقدي مع مصلحة السجون ومستشفى القصر العيني “عشان أغلب الحلقات هتبقى هناك” وبهذا تملأ الفراغ الذي تركه برنامج خلف الأسوار داخلنا..
الخطوة الرابعة: لازم تخاوي كام جني طيبين كده وولاد ناس ويشترط حسن المظهر ..
الخطوة الخامسة: لازم تبقى أسئلتك من نوع “قتلتها ليه؟” حتى لو كان المتهم اللي قدامك ممسوك في قضية سرقة “ولازم كمان” في أخر الحوار مع المتهم تشتميه شتيمة من نوع “ياحيوان يازبالة” وبعدين تمشي وتسيبيه..
الخطوة السادسة: اقتربي بتوجس وحذر شديد من المتهم وقوليله “مش ندمان” حتى لو رد عليكي وقالك ندمان.. قومي بإعادة السؤال عليه مجددًا لكن بصيغة أخرى “حقيقي بجد مش ندمان” لو قالك مره تانية “وحياة اللي خلفوني ندمان” هتردي بكل ثقة واستفزاز وتقوليله “ندمان بعد إيه أنا جاية هنا عشان أقولك حاجة واحدة بس .. أنك “حقير” مع إعادة الخطوة اللي فاتت هتمشي وتسبيه..
الخطوة السابعة: تستضيفين “ملحد” لإجراء حوار معه وتعملي نفسك مش عارفة أنه هيجي في أخر الحلقة ويقولك إن مفيش ربنا، وهنا بقى مش هتمشي وتسيبيه.. إنما تقومي بطرده من البرنامج حتى ولو كان طول الحلقة بيحلف ويقول “والله” وسط الكلام عادي..
الخطوة الثامنة: مشاهد النهار الخارجي ستحتاج منك شراء عدد واحد “كوتشي أو سنيكر”، عدد واحد بنطلون جينز”سليم فيت” وأي “بلوزة سودا والسلام..
الخطوة التاسعة: ستحتاجين إلى أن تستدعي مشهد “عمرو واكد” في فيلم “أصحاب ولا بيزنس” لعمل حلقة عن القدس المحتلة مع تعديل بسيط في المشهد مثل إطلاق نحوك بعض الطلقات النارية “الفشنك” وأنت تختبئين منها..
الخطوة العاشرة: أي كلام يتقال عليكي في الصحف مثل الإشاعات أو هجوم بعض الزملاء سواء كانوا صحفيين أو إعلاميين لازم تعملي حاجة واحدة بس ساعتها “ولا كأنك سامعة حاجة وكملي زي ما أنتي” وبكده أقدر أقولك هتبقي نسخة طبق الأصل من “ريهام سعيد” وأشوف وشك في صبايا الخير.
اقرأ أيضًا:
هل تلاحق ريهام سعيد اتهامات التطبيع مع إسرائيل؟