أحمد عبد الغني يكتب: ماذا لو فازت غانا ..!!
الحمد لله .. والله وعملوها الرجالة .. أبو صلاح والسعيد فرحوا المصريين .. الشعب المصري نفسه يفرح من زمان .. والفرح عنده عزيز وغالى .. بس فعلا كل الفريق كانوا رجالة ..!!
توفيق ربنا وتشجيع الجمهور ودعمه للفريق وعزيمة اللأعبين وخبرة كوبر أسباب النصر .. لكن ماذا لو كانت فازت غانا ..؟؟
1- كان الأستاذ المحترم مرتضى منصور هيطلع يقول كوبر لازم يمشى ونوفر الدولارات ويقولنا كان هيلعب إزاى لو هو مكانه وان التشكيل غلط والتغيير غلط وهيطلب بتعيينه مدير فى للمنتخب ويطلع سيديهات على كوبر وأسامة نبيه والحضرى .
2- كان الكابتن مجدى عبد الغنى هيفضل يذل فينا لحد أربع سنين كمان .. هو أحنا أصلا لسه ماوصلناش كأس العالم بس أهى خطوة ممكن تخليه بهدأ شوية علينا .
3- طبعا الكابتن مدحت شلبى مكانش هيغنى لعبدا الله ولا هيتمنى يأخد شقة جمبه .
4- كان عمرو أديب هيفضل يصرخ ويزعق فى الأستدويو ويقولك ليه .. ليه الجمهور دا يروح زعلان .. ياريت لاعبى مصر أحسن يتبرعوا معانا فى حملة البطاطين أو أتحاد الكورة يتبرع بإيادته المبارة لحملة البطاطين .
5- كنا هنلاقى ناس بتقولك نتبرع بإيراد المباراة وراتب كوبر وراتب اللأعبين لصندوق تحيا مصر .
6- كان كوبر هيتعلق له المشانق وطبعا عندنا 90 مليون خبير كروى حتى البنات والستات بيفتوا فى الكورة وكانوا هيقولوا عليه : مدرب دفاعى – معندوش فكر – بيحب وبيكره – دا ذنب حسام غالى وإيمن حفنى – إزاى بيلاعب الحضرى وعنده 43 سنة وسايب الشناوى وأكرامى – إزاى واخد حمادة طلبة وعلى جبر ولم يضم سعد سمير …
7- كان الواد بتاع الليزر اللى أنضرب على لاعبى غانا أتقبض عليه وأتعملوا محضر وكان هيشيل اللية ويتقدم للمحاكمة العاجلة بتهمة تكدير العلاقات المصرية الغانية .
8- كان فين ناس كتييييير هتشمت وتقولك ذنب ناس وتدخل الدين والساية والكورة فى بعض.. وتفرح فى الهزيمة وكأنهم مش مصريين ..أه والله كان هيحصل .
9- كان الجمهور هيروح متنكد وزعلان وهو مش ناقص .. كفاية نكد 4 نوفمبر بتاع عيد الحب عليه .. ماهو ربنا مايرضاش بالظلم تعويم وبنزين وكورة كمان .. دا كدا يكون كتير قوى عليه .
10-طبعا كنا هنلاقى الناس بتتكلم عن الأخراج والتصوير وتقول إيه الفشخرة دى وليه الأسراف والتبذير دا .. شوفوا صرفنا كام على ماتش كورة .. طب ماالغلابة أولى ..!!
11- طبعا أسرائيل كانت هتشمت فينا ما المدرب بتاع غانا أسرائيلى ..
12- كنا هنلاقى مظاهرات فى الشوارع ومطالبات بألغاء كأس العالم ونلاقى أحمد موسى بيقول أن كأس العالم أخوانية أصلا .. ونلاقى الشيخ برهامى بيحرم كأس العالم بأعتبارها كأس ممكن نستعملها غلط ويشربوا فيها خمر والعياذ بالله .
13- كنا هنلاقى ناس بتقولك أحسن أننا مش رايحين كأس العالم .. مصر أولى بكل جنية .
14- كنا هنلاقى كوميكس وألش للصبح على باسم وعلى جبر من جمهور الأهلى وألش وكوميكس على عبد الله السعيد وتريزيجيه وحجازى وفتحى من جمهور الزمالك .
15- كان هيطلع حد علينا ويوقولنا ماذنب الجماهير واللى هيطلع يقول أن فى أصابع بتلعب فى مصر وأن فى مؤامرة كونية على مصر حتى لاتصل إلى كأس العالم .. والدليل مدرب أسرائيلى بيدرب غانا .