مينا فريد: كيف تصبح محللًا رياضيًا في تسع خطوات
مبدئيا ماتفتكرش الموضوع سهل .. الموضوع صعب و محتاج مجهود و علم و فكر و تضحية و ثقافة و شوية مصاريف…
أولا : البس شورت و انزل العب مع أصحابك كورة في أي مكان فيه نجيلة و إتصورلك كام صورة عشان هتحتاجهم … صدقني موضوع الشورت ده فارق معاهم جدا .. عاوزهم يعني يقولوا عنك محلل رياضي مالبسش شورت ؟ تبقى مابتفهمش.. معروفة يعني … كابتن فاروق جعفر مش بيحب اللي مالبسوش شورتات. و مش مهم لعبت في نادي إيه ولا عملت إيه .. أتحداك لو عارف نص المحللين الرياضيين و المذيعين لعبوا في نادي إيه أو إيه الإنجاز اللي عملوه .. كمان مش مهم تكون بتعرف تلعب أغلبهم كان لاعيبة كسر.
ثانيا : و إنت بتلعب مع أصحابك حاول تتصاب ..لأ حاول إيه .. لازم تتصاب .. أيوه إتصاب .. الإصابة عامل مهم عشان تتقبل بسرعة هناك .. نص المحللين الرياضيين إتصابوا و إعتزلوا .. شوف واحد صاحبك غشيم خليه يجيبلك أي إصابة و إتصور و إنت بتتصاب فيديو .. هتحتاجها برضة..
ثالثا : لما تقوم بالسلامة من الإصابة إنزل وسط البلد .. هاتلك كام بدلة إسود و فضي و كحلي و قميص واحد كفاية و شوية كرافتات بألوان القنوات الرياضية الموجودة..
رابعا : مرحلة المذاكرة … هات أصحابك تاني .. بس ماتجيبش الواد الغشيم اللي كسرك مش هتحتاجه .. و هات بلاي ستيشن ممكن تجيبة مستعمل عادي … و إلعب معاهم بس حاول تبدع في الخطة … عارف في العادي لما بتطوّل في الخطة بيشتموك و عشان كده قولتلك هات بلاي ستيشن إنت عشان تاخد راحتك … هيزهقوا منك و يسيبوك .. عادي كمّل وحدك و ماتزهقش لازم تعرف الخطط كويس …
خامسا : كان فيه واحدة في الكلية وحشة و رغاية و إنت بتزهق منها .. هتحتاج تجيب بوكيه ورد و تشيل البلوك اللي على الواتساب و تصالحها .. معلش دوس على نفسك إسبوع بس .. دلوقتي مرحلة التدريب .. حاول تشوف هتقدر تصمد قدام رغيها كام ساعة .. و ماتسمعش بس لازم تشارك .. ده تدريب و تعليم و بيفرق جدا في المحلل الرياضي كام ساعة بيتحمل الرغي و بيشارك فيه ..
سادسا: طبعا فلوسك خلصت .. دلوقتي مرحلة الشر …حاول تلمّح للبنت الرغاية إنك محتاج ساعة يد كبيرة و أصلي عشان تكمل حلمك في إنك تكون محلل رياضي عليه القيمة … هترفض إقفش عليها و سيبها و إنزل إشتريلك ساعة تقليد نضيفة .. زي ما إنت عارف مفيش محلل رياضي معندوش ساعة كبيرة أصلية.
سابعا : مرحلة الإبداع الفني … حاول تبتكر مصطلحات عميقة و مالهاش أي معنى لأماكن اللعيبة … حاجه زي أسطى النص .. السد العالي .. مهندس العرضيات .. دي أنا هسيبها لإبتكارك ماعرفتش تبتكر حاجه كفاية تعمل أصوات طرازانية …أووووه ياااااااه و هالله هالله هالله.
ثامنا : الوعي السياسي … طبعا اللي كان في البلكونة و بيشرب سيجارة هييجي يقولي لية الوعي السياسي ده محلل رياضي ؟ هاخد منه السيجارة الأول طبعا و هقوله بس يا جاهل المحلل الرياضي لازم يكون عنده وعي سياسي .. عشان بيحتاج يملى وقت و ساعات كتير رغي و الكلام بيجيب بعضه يعني .. ممكن تشوف الأستاذ توفيق عكاشة ساعة و الأستاذ أحمد موسى ساعة .. خلاص كده بقى عندك وعي سياسي مناسب.
تاسعا : كده إنت لعبت كورة و لبست شورت – إتصبت – بتفهم في الخطط – عندك بدل ألوان مختلفة و كرافتات – معاك ساعة يد كبيرة شكلها زي ما يكون أصلي أو أصلي عادي مش فارقه – و رغّاي و بستحمل الرغي – و عندك مصطلحاتك الجديدة العميقة – و عندك وعي سياسي قوي جدا – و كمان بسبب كتر لعب البلاي ستيشن عارف كل لعّيب بيلعب في نادي إيه و جنسيته إيه. تروح تقدم في القنوات الرياضية و تقولهم أنا فاضي و مستوفي متطلبات التعيين و إن شاء الله هتتعين … مع أطيب التمنيات بالنجاح و التوفيق.
اقرأ أيضًا:
محمد عبده بدوي: في أهمية أن يتثقف الإعلام
أشرف أبو الخير: سلسلة كونترول رووم (9).. والمونتيرون أصناف
تابعونا على تويتر من هنا
تابعونا على فيسبوك من هنا