هل انخفضت أسعار السمك بعد وقف التصدير؟ - E3lam.Com
نورا مجدي
عرض برنامج “كل يوم” تقريرا يوضح آراء التجار والمواطنين من داخل الأسواق حول انخفاض أسعار الأسماك بعد قرار وقف التصدير.
وقال أحد التجار في التقرير الذي عرض على شاشة ON E في برنامج “كل يوم” الذي يقدمه الإعلامي عمرو أديب، اليوم الأحد: “الأسعار انخفضت اليومين دول مقارنة باليومين اللي فاتوا”، وقال آخر: “الأول مكنتش بعرف أبيع لكن دلوقتي السعر اللي فرق ده فرق معايا أنا.. بس هي مش هتنزل مرة واحدة هتيجي بالتدريج”، وقال تاجر آخر: “لو نزل السعر هنبيع.. اللي هياخد 3 كيلو هياخد 5 واللي بياخد 2 كيلو هياخد 3”.
بينما كان هناك رأي آخر لأحد التجار الذي قال: “كيلو البلطي فرق 5 جنيه بس لكن لسه في ركود ومفيش تغيير أوي في الحركة”، كما قال آخر: “السحب والبيع والشراء زي ماهما، وانا بتمنى إن السمك يرجع لـ 10 و 12 جنيه لكن دلوقتي الكيلو لسه بـ 24 جنيه”.
على الجانب الآخر حاول التقرير أن يستعرض آراء بعض المواطنين باعتبارهم الجزء الأساسي في عملية الشراء والذي يؤثر في الأسواق، وكانت الآراء متباينة حيث قال احد المواطنين: “أكل السمك كان للغلبان دلوقتي من 18 جنيه لـ 35 جنيه واللي عنده 3 عيال مش قادر يجيبلهم 2 أو 3 كيلو”، وقال آخر: “مفيش حاجة قلت بالعكس الأسعار بتزيد أو زي ما هي” ووافقه في الرأي آخر قائلا: “الأسعار غالية جدا السمك البلطي أبو 28 جنيه كنت بجيبه ب 8 جنيه ولما غلي بقى ب 12 جنيه ده لما غلي”.
وتمنى المواطنون أن يعود سعر السمك لما كان عليه خلال العاميين الماضيين لأن الأسعار في زيادة مستمرة، رغم إعلان الرئيس السيسي وقف تصدير الأسماك للخارج سعيا لخفض أسعارها في الأسواق المحلية.