10 دروس مستفادة من "شبحنة" سامو زين
محمد حمدي سلطان
زمان كان الشخص الفاشل بيتم النظر إليه على أساس انه نموذج ومثال حى للفشل، نقدر نتعلم من تجربته الفاشلة، عشان نتفادى الأخطاء اللى وقع فيها، وانتهت بيه انه أصبح مجرد ” عبرة ” لمن يعتبر. دلوقتى الفشل بقى صوته أعلى وأكثر انتشارًا، والفروق الواضحة ما بين النجاح والفشل ما بقتش واضحة ولا حاجة، وبقت مبهمة تمامًا، لا مش بس كدة، ده بقى فيه مريدين للفشل، وطرق ومدارس مختلفة. وفيه ناس نفسهم يفشلوا يا عينى ومش عارفين.
نرشح لك: حسمًا للجدل.. حقيقة الفتوة سامو زين
الفنان سامو زين صاحب تجربة مهمة في هذا الصدد، وشخصية ” عبده البلطجى ” اللى قدمها في مسلسله الفظيع ” طعم الحياة ” هتدخل التاريخ من أوسع أبوابه، فهى تجربة فشل ملهمة للغاية، ليست ” كعبرة ” وإنما كدليل للفاشلين لتعلم أحدث طرق الفشل. فإذا أردت أن تفشل فعليك ” بعبده البلطجى ” اللى حاولت استخلص من تجربته أهم الدروس المستفادة والتى ستنير الطريق أمام كل السائرين على درب الفشل، وما أكثرهم هذه الأيام.
1- ليه تفشل مرة لما ممكن تفشل مرتين
الفنان سامو زين كان مطرب محدود النجاح، اتجه للتمثيل وما شاء الله ربنا كرمه وبقى ممثل معدوم النجاح. وده درس مهم لعدم اليأس، وإنك ممكن ما تبقاش عارف حقيقة قدراتك، وتضيع عمرك بتفشل في مجال ما في حين إنك لو اتجهت لمجال تانى هتحقق فشل أكبر.
2- جرب اللى ما بتعرفش تعمله
التجربة شىء مقدس، وعمر الإنسان ما هيتعلم من غير ما يخوض كم كبير من التجارب. متقولش انا ما بعرفش امثل، أو انا ماليش في الكتابة، أو صوتى وحش ما ينفعش اغنى. جرب يا أخى مش يمكن تطلع بتعرف، وبعدين ما تنساش انه كلما كنت ” ما بتعرفش ” تعمل الحاجة دى كلما زادت فرص فشلك فيها.
3- إلفت الانتباه بأى طريقة
لو ما عرفتش تثير إعجاب الناس، حاول تثير اشمئزازهم. ما عرفتش تخليهم يصقفولك، خليهم يضحكوا عليك. المهم انك تنتشر وتفضل تحت الأضواء، وإسمك يتحول ” لتريند “. تريقة بقى مش تريقة، انت الكسبان في الآخر شهرة ونجومية وفلوس، ومحدش بيقول للفلوس لا.
4- الإصرار على الفشل
فيه ناس بتنجح أحيانًا، وبتفشل أحيانًا. لأن مفيش حد بيقدر يحافظ على نجاحه طول الوقت. لكن فيه عظماء بيقدروا يحافظوا على فشلهم بكل إصرار، حاول تكون واحد منهم، لأن إصرارهم على الفشل ده بيبقى شىء مبهر، ويدعو للتأمل، ويعتبر نجاح في حد ذاته. نجاح في إيه ؟ نجاح في إنهم يقرفونا في عيشتنا، ويجبرونا نشوفهم، ونكتب عنهم كمان.
5- سيبك من المنطق
وانت بصدد تجربتك الفاشلة، ما تحاولش تهتم بإنه يبقى فيه منطق في أى شىء بتعمله، بالعكس، انت لازم تكون حريص على البعد عنه قدر استطاعتك، وما تهتمش بالتفاصيل، سيبها كدة ماشية ” بالبركة ” هو إيه المنطق أصلاً في أن علا غانم وسامو زين واحمد هارون يبقوا أبطال ويقدموا مسلسل يناقشوا فيه قضايا المجتمع، هو إيه المنطق في ان هما بيمثلوا أساسًا !
6- تايجر وسيطر
مش لازم تغير من نفسك، عشان تبقى مقنع، بص. هو مش لازم تبقى مقنع أساسًا، فلو انت حد ” كيوت ” و ” حبوب ” زى سامو زين، وهتعمل دور ” بلطجى “. اضرب ” بشلة ” في وشك، وافضل زعق و ” برق طول المسلسل، بس لو لقيت قدامك في مشهد، كيس ” شيبسى ” انت بتحبه، ما تفتكرش انك لو أكلت منه ده هيهز صورتك قدامنا ” كبلطجى ” هى كدة كدة مهزوزة ما تقلقش، اضرب يا معلم ولا يهمك.
7- طور من فشلك
الفنان سامو زين كان له تجربة سابقة في التمثيل بفيلمي ” 90 دقيقة ” و ” شقاوة ” ولم يحققوا أى نجاح طبعا. لكن المشكلة الحقيقة انهم حققوا أسوأ انواع الفشل وهو الفشل الصامت، مروا مرور الكرام ومحدش حس بيهم، ولأن سامو زين ذكى وبيتعلم، فهم الدرس كويس وقدر يطور من فشله، فمش كفاية إنك تفشل، لازم تعمل ” دوشة ” وتثير أكبر قدر من الضجيج أثناء فشلك.
8- حزب أعداء الفشل
طبعا ما تقولش ان انت سعيد بفشلك، ولا تعترف أصلاً بالفشل ده. بالعكس، اخرج وهاجم كل اللى بينتقدوك، أو بيتريقوا عليك، وقول أن دى ” نفسنة ” وحقد عشان أنت ناجح وعظيم، ومكسر الدنيا، ورقم 1 في نسب المشاهدة. وده بالظبط اللى عمله الفنان سامو زين.
9- احتفل بفشلك
بعد ما تهاجم حزب أعداء الفشل و ” تقصف جبهتهم ” احتفل بقى بفشلك، وبشر جمهورك العريض بالخطوة القادمة، وبمزيد من الإبداع والتألق، وده برضه اللى عملوا سامو زين لما كتب على تويتر ” توكلنا على الله. بعد النجاح الكبير لشخصية عبده الفتوة. انتظروا أول عمل سينمائى في العيد الكبير ان شاء الله ”
10- لما بيضحك بيزعل
آخر حاجة وبعيدًا عن الفشل والنجاح، لو صادف وقابلت الفنان سامو زين في أى مكان، اوعى تخليه يضحك لأن الراجل طلع ” لما بيضحك بيزعل ” واحنا مش قد زعله، لأنه ممكن ” يزعل علينا ” ويعملنا مسلسل جديد، وساعتها احنا اللى هنزعل. اوى !