محمود خليل يكتب: ربنا عايز كده..!
– تخيل أن برومو رامز جلال عدى 5 مليون مشاهدة في 24 ساعة بس.. مش معقول المصريين دول.. يقعدوا يقولوا وحش ومش هنتفرج ومش ناقصين وجع قلب وكل مرة نقول رامز وقع ومش هتقوم له قومة تاني..
– فيه 10 ارهابيين هاجموا أتوبيس للمسيحيين وأسقطوا 26 شهيد بعد صلاة الجمعة قبل رمضان بيوم..!
– بس تعرف أنا عاجبني قوي اصرار عادل إمام على أنه يبقى موجود كل سنة.. يا أخي برضو الزعيم هيفضل زعيم.. تفتكر عفاريت عدلي علام هينجح السنة دي؟
– فيه 10 ارهابيين هاجموا أتوبيس للمسيحيين وأسقطوا 26 شهيد بعد صلاة الجمعة قبل رمضان بيوم..!
– أما بقى بيومي فؤاد ده حالة عجيبة.. موجود يا سيدي في 6 مسلسلات ده غير الاذاعة والبرامج والإعلانات.. بس الصراحة هو شاطر ومقبول والناس بتحبه.. صدق اللي قال: اللي يحبه ربنا يحبب فيه خلقه..
– فيه 10 ارهابيين هاجموا أتوبيس للمسيحيين وأسقطوا 26 شهيد بعد صلاة الجمعة قبل رمضان بيوم..!
– شوفت سامو زين عمل أيه في محمود العسيلي.. بيقولك ظبطه على تويتر.. قصف جبهته لما العسيلي لقح عليه بالكلام.. راح هو مدي له كلمتين في عضمه.. بس بصراحة بقى الاتنين دمهم يلطش.. والغريب يا أخي أن فيه ناس بتسمع أغانيهم.. وعلى رأي اللي قال: لولا اختلاف الأذواق لبارت السلع.
– فيه 10 ارهابيين هاجموا أتوبيس للمسيحيين وأسقطوا 26 شهيد بعد صلاة الجمعة قبل رمضان بيوم..!
– صحيح شوفت البرومو بتاع ياسمين عبد العزيز.. شكلها عاملة تمثيلية حلوة اسمها هربانة منها.. بصراحة هي شاطرة وبتعرف تختار أدوارها كويس.. أنا هتابعه على فكرة.. خلينا نضحك شوية يا عم.. تقريبا هيتذاع على أون.
– فيه 10 ارهابيين هاجموا أتوبيس للمسيحيين وأسقطوا 26 شهيد بعد صلاة الجمعة قبل رمضان بيوم..!
– مش أنا شوفت برومو مسلسل نيللي كريم في رمضان.. ولقيتها بتضحك سبحان الله.. المسلسل اسمه لأعلى سعر.. ربنا يستر وما تنكدش علينا زي كل سنة.
– فيه 10 ارهابيين هاجموا أتوبيس للمسيحيين وأسقطوا 26 شهيد بعد صلاة الجمعة قبل رمضان بيوم..!
– غادة عبد الرازق السنة شكلها مصممة تعوض اللي فاتها السنين اللي فاتت.. ولا أنت أيه رأيك.. ولا سمية الخشاب طالعة في بوستر لمسلسل اسمه الحلال.. وواخدة تريقة على الفيس بوك قد كده.. بيقارنوا البوستر بتاعها ببوستر فيلم الحرام بتاع فاتن حمامة.. إنما هم عندهم حق بصراحة.. لأ ولا يسرا طالعة بالحجاب في مسلسل الحساب يجمع.. حساب أيه بس مش عارف.. تعرف أنا بقول كفاية عليهم كده هم التلاتة.. خلي الناس تشوف وشوش جديدة بقى
– فيه 10 ارهابيين هاجموا أتوبيس للمسيحيين وأسقطوا 26 شهيد بعد صلاة الجمعة قبل رمضان بيوم..!
– كله كوم والزيبق كوم.. كريم عبد العزيز شكله عامل حاجة حلوة مع شريف منير.. ما أنت فاكر فيلم ولاد العم.. كان تحفة وعملوا دويتو روعة ساعتها.. وعلى فكرة الزيبق برضو عن قصة من قصص المخابرات.. يا ريت بقى نشوف حاجة حلوة زي رأفت الهجان ولا جمعة الشوان.. عايزين نسف شوية على الاسرائيليين.
– فيه 10 ارهابيين هاجموا أتوبيس للمسيحيين وأسقطوا 26 شهيد بعد صلاة الجمعة قبل رمضان بيوم..!
– بقولك أيه هيفاء وهبي نازلة رمضان يا معلم.. مسلسل اسمه الحرباية.. بس شكله طلقة وهنتفرج بقى ونهيص.. بس معقول المزة دي تبقى حرباية.. يا خرابي.. يا عم بقولك هيفاء وهبي نازلة في رمضاااااان.
– فيه 10 ارهابيين هاجموا أتوبيس للمسيحيين وأسقطوا 26 شهيد بعد صلاة الجمعة قبل رمضان بيوم..!
– مصطفى شعبان.. ماله.. لأ عادي.. هتلاقيه زي كل سنة.. مزواج ومبصبصاتي وبتاع ستات.. ما بقاش عنده جديد.. كل أدوراه شبه بعضها.. لأ أحمد السقا حاجة تانية.. ده الحصان الأسود يا جدع.. بتتكلم في أيه.. هتفرج عليه طبعا على إم بي سي مصر.
– فيه 10 ارهابيين هاجموا أتوبيس للمسيحيين وأسقطوا 26 شهيد بعد صلاة الجمعة قبل رمضان بيوم..!
– هند صبري نازلة مع الواد ده اللي اسمه ظافر العابدين.. ما أعرفش يا أخي البنات هتموت عليه ليه كده.. مع أني أحلى منه وربنا.. إنما هند بقى حاجة تانية خالص.. ده كفاية صوتها اللي بيحل من على حبل المشنقة.
– فيه 10 ارهابيين هاجموا أتوبيس للمسيحيين وأسقطوا 26 شهيد بعد صلاة الجمعة قبل رمضان بيوم..!
– صحيح هم الثلاثي شيكو وفهمي وهشام انفصلوا ليه.. هو ما فيش حاجة في بلدنا دي تمشي عدل ابدا.. كل ما ينجح فريق مع بعضه ينفصل.. فهمي عمل دويتو مع أكرم حسني اللي بيعمل سيد أبو حفيظة وعاملين مسلسل على النهار اسمه دلع المدام مع ممثلة جديدة بس قمر اسمها مي عمر.. وهشام وشيكو نزلوا مع البرنس أحمد مكي.. أخيرا هيعمل حاجة غير الكبير والكبير قوي والكبير قوي خالص.. عاملين حاجة على النهار اسمها خلصانة بشياكة.. تفتكر هيبقى حلو؟
– فيه 10 ارهابيين هاجموا أتوبيس للمسيحيين وأسقطوا 26 شهيد بعد صلاة الجمعة قبل رمضان بيوم..!
– نسيت أقولك صحيح.. ماتش مصر وتونس في تصفيات أمم إفريقيا هيبقى في رمضان.. ربنا يستر بقى.. تونس دي كعبها عالي علينا طول عمرها.. والمشكلة أن كوبر مش لاقي مهاجمين خالص غير عمرو جمال.. سمعت أنه قال للجهاز بتاعه يدور على مهاجمين في الدوري.. تفتكر عصام الحضري هيلعب الماتش ده؟
– فيه 10 ارهابيين هاجموا أتوبيس للمسيحيين وأسقطوا 26 شهيد بعد صلاة الجمعة قبل رمضان بيوم..!
– بقولك أيه تفتكر ريال مدريد هياخد دوري أبطال أوروبا.. اليوفنتوس مش هيعديها المرة دي.. شوفت عمل أيه في برشلونة.. خده رايح جاي.. أنا نفسي ريال مدريد يكسب ما أنت عارف الأهلاوية بيحبوا ريال مدريد.. وأنت بتشجع مين؟
– فيه 10 ارهابيين هاجموا أتوبيس للمسيحيين وأسقطوا 26 شهيد بعد صلاة الجمعة قبل رمضان بيوم..!
– يلا كلها كام ساعة ويبدأ رمضان بقى ونقعد نتفرج على المسلسلات.. سمعت أنهم 32 مسلسل هيتعرضوا.. يا أخي مش عارف هتابع أيه ولا أيه.. ده أنا لو قعدت 24 ساعة قدام التليفزيون برضو فيه مسلسلات هتفوتني.. يلا نبقى نتفرج على الإعادة بعد رمضان.. مش هم بيعيدوها كلها بعد رمضان برضو؟
– فيه 10 ارهابيين هاجموا أتوبيس للمسيحيين وأسقطوا 26 شهيد بعد صلاة الجمعة قبل رمضان بيوم..!
– السنة دي بقى فيه الدي إم سي نازلة جديد.. وطبعا أون داخلة بتقلها.. وعاملين صراع رهيب بينهم.. بس تصدق كويس برضو عشان نشوف بقى إم بي سي مصر هتكسب ولا البلدي يوكل زي ما بيقولوا.. أنا مش عارف ليه السي بي سي والنهار فكوا الشركة اللي ما بينهم قبل رمضان.. طب كانوا يستنوا شوية.. ولا أيه؟
– فيه 10 ارهابيين هاجموا أتوبيس للمسيحيين وأسقطوا 26 شهيد بعد صلاة الجمعة قبل رمضان بيوم..!
– عمك الشيخ عمرو خالد راجع في رمضان تاني.. تلاقيه هيعمل حملة من بتوعه ويقول كلمتين يحاول يرجع بيها تاني.. أصل بصراحة من ساعة سنة الاخوان السودا دي والناس خلاص بقى ما بقتش متقبلة كلام الدعاة دول.. وبرضو مصطفى حسني نازل ببرنامج والشقيري ومعز مسعود.. وما شاء الله الدعاية بتاعتهم على الكباري قد كده.. مش عارف بيجيبوا الفلوس دي منين يا أخي؟
– فيه 10 ارهابيين هاجموا أتوبيس للمسيحيين وأسقطوا 26 شهيد بعد صلاة الجمعة قبل رمضان بيوم..!
– هو صحيح الحكومة لغت صلاة التراويح.. ولا لغوا الميكروفونات بس.. أصل بصراحة مش عارف الحكاية أيه بالظبط.. عموما أدينا هنروح نصلي وخلاص.. لقينا الصلاة هنصلي.. ما لقيناش نرجع نلحق المسلسلات بدل ما نضطر ندور على ترددات القنوات اللي هي زائد 2 دي عشان نتفرج على المسلسلات اللي فاتتنا.
– فيه 10 ارهابيين هاجموا أتوبيس للمسيحيين وأسقطوا 26 شهيد بعد صلاة الجمعة قبل رمضان بيوم..!
– يلا رمضان كريم بقى.. أشوفك على خير.. صحيح: هو أنت صايم ولا زي كل سنة؟
– فيه 10 ارهابيين هاجموا أتوبيس للمسيحيين وأسقطوا 26 شهيد بعد صلاة الجمعة قبل رمضان بيوم..!