عبد الله غلوش يكتب: غلوشيات رمضانية (2)
– هي كندة كان بيتعرض عليها إعلانات قبل ما تتجوز عمرو يوسف؟
– إنجي المقدم اتخطف منها ابنها في خطوط حمراء .. وابن أخوها تاه منها في سقوط حر السنة اللي فاتت .. وامبارح بنتها اتخطفت منها في “٣٠ يوم” .. كده كتير يا مدام إنجي والله.
– “كلابش” .. تاني أفضل عمل لأمير كرارة بعد “ستار ميكر”.
– بعد عمرو يوسف ومي عمر وياسمين عبدالعزيز .. دنيا سمير غانم تفقد الذاكرة في حلقه اليوم.
– ظل الرئيس .. ياسر جلال يعيد اكتشاف نفسه.
– الحساب يجمع .. السنة اللي فاتت يسرا قتلت في أول حلقة ومتقبضش عليها طول المسلسل، السنة دي مقتلتش حد واتقبض عليها من أول حلقة.
– وراء كل رجل عظيم شراب قطونيل.
– هند صبري “حلاوة الدنيا” .. خالد النبوي “واحة الغروب” .. باسل خياط “30 يوم” .. بيمثلوا من level تاني.
– سينابون بدأ يعلن عن كحك العيد من الأن.
– لقب دلال عبدالعزيز في تتر “عشم إبليس” الفنانة المتميزة ، ولقب بشرى في ” لأعلي سعر” المتميزة بس من غير فنانة.
– أحمد رزق .. مات إفيهاتيا.
– بإعلان واحد ، محمد هنيدي علم علي فنانين كتير عاملين مسلسلات كوميدية.
– الزيبق .. آخر حاجة كنت ممكن أتخيلها ، أنه هايجي يوم وطلعت زكريا يطلع فيه خال كريم عبدالعزيز.
– الحرباية .. حد يقول لمنذر رياحنة إن طريقة التمثيل دي انتهت بقالها شوية حلوين.
– مها نصار “واحة الغروب” .. افتكروا الاسم ده كويس .
– إعلان اتصالات .. الأجمل من صوت أصالة ومحمد حماقي .. صوت طارق نور.
– بظهور شيكو ، خلصانة بشياكة فرق بنسبة كبيرة عن أقرب مسلسل كوميدي بعده.
– حذف ما تبقى من مشاهد لعماد رشاد في الـ لا لا لاند .. هاتبقى أكبر حسنة ممكن تعملها دنيا سمير غانم في حياتها.
– الفرق الوحيد بين إعلان فودافون السنة دي والسنة اللي فاتت ، إن الكلام اللي بتغنيه شيرين مفهوم.
– رغم إن معظمها مشاهد مهمة والمفروض إنها ماستر سين في الأحداث ، بس واضح إن ارتفاع أسعار العربيات الفترة الأخيرة هايخلينا بعد كده نشوف معظم الحوادث جرافيك بالطريقة دي.
– لا شئ يفوق تكييف مدام مني.
– الحصان الأسود .. اسم علي مسمي.
– الجماعة .. عن حسن اختيار الوجوه الجديدة.
– باستثناء صابرين ويسرا مفيش ممثلة قدرت تستغني عن الـ makeup لا وهي صاحية من النوم ولا وهي خارجه من حمام بلدي.
– كل اللي بيسأل عباس أبو الحسن مظهرش ليه في حلقة النهاردة من “ارض جو” ، أقوله عشان كان طالع ضيف شرف في “ريح المدام”.
– الحلال .. بيومي فؤاد أول واحد يعمل حمام مغربي وهو لابس كلسون.
– سهر الصايغ فسخت خطوبتها في الزيبق ، ونيللي كريم اتجوزت في لأعلي سعر.
– قليلين اللي يعملوا 3 مسلسلات بطولة في شهر واحد وميجليش منهم ولا واحد .. حنان مطاوع من الناس دي.
– رمضان كريم .. الجزء التاني من بين السرايات.
– إعلان رونالدو .. طفرة كبيرة في عالم صناعة الكروما.
– عفاريت عدلي علام .. أحسن من امبارح بكتير.
– المعجب بهاني سلامة في “طاقة نور” ، أكيد متفرجش عليه في “نصيبي وقسمتك”.
– عشم إبليس .. محتاجين نعرف رأي الدين في علاقه عمرو يوسف وريم مصطفي.
– لا تطفئ الشمس .. محمد ممدوح قفش اخته مع صاحبها.
– لا تطفئ الشمس .. محمد ممدوح قفش أمه مع صاحبها.
– هو الشباب المحترم اللي بيقف في الشوارع يوزع تمر ومولتو وقت الفطار ، بيروحوا فين بعد رمضان؟
– هذا المساء .. حد يقول لأروي جوده والنبي فكرة إني افتح الحنفية واقعد اعيط تحتها ، اتلغت من ايام بشري في “العشق والهوي”.
– أرض جو .. قعدة محمد كريم كتير في أمريكا ، عرفته انجليزي كويس بس نسته التمثيل تقريبا.
– اللي حصل بينا ده اسمه محسن ، علي اسم خالو .. شيرين رضا “لا تطفئ الشمس”.
– اتعودي لما ترجعي من الشغل وانتي بتقلعي هدومك تقلعي معاها مشاكل الشغل وتلبسي مكانها مشاكل البيت .. رجاء الجداوي حلاوة الدنيا.
– المجاملة في البيزنس خسارة.. مستر كامل “هذا المساء”.
– مفيش أشرف من إنك تموت وأنت بتقاوم .. خالد النبوي واحة الغروب.
– الظلم دايما بيجيب الخراب .. محمد رياض كفر دلهاب.
– ربنا يرحمك يا أمي ويرحم أمهاتنا جميعا ويخلي أمهاتكم يارب.