عبد الله غلوش يكتب: غلوشيات رمضانية (3)

– بعيدا عن حلاوة أو سخافة اعلان يونيفرسال ، بس بمنتهي الامانه ليلي علوي وشيرين رضا ابسط دليل علي ان الاساس الحلو لا بيتأثر بالزمن ولا عوامل التعريه.

– امتي هانستوعب فكرة اننا 100 مليون بني ادم ، وأن المسلسل او الاعلان او البرنامج اللي مش عاجب حضرتك ممكن يعجب 10 مليون واحد غيرك أو العكس.

– لما تبقى حلقة كامله مافيهاش مشهد وحش او اي كلام .. تبقى حلقة النهارده من “حلاوة الدنيا”.

– ورطة انسانية .. محاولة مش بطاله لاستنساخ برنامج الصدمة.

– عفاريت عدلي علام ، لسه بكتب هو رامي إمام ادي مهدئات لـ مي عمر قبل ما تصور ولا ايه؟ ، لقيت عزت أبو عوف بيقول دي لسه خارجة من المستشفي واعصابها تعبانة.

– بعد احمد مالك “لا تطفئ الشمس” ، مؤمن نور “عدلي علام ” تاني سائق اوبر في دراما رمضان ، مش عارف كريم ناوية تتحرك امتي الحقيقة.

– لما الداخلية تعرف تكشف لغز قتل الطفل يوسف في ميدان الحصري، احتمال وقتها تعرف تكشف ألغاز الدراما السنة دي.

– لمعي القط .. حنفى الابهة نسخة ٢٠١٧.

– اعصر علي نفسك لمونة واتفرج علي حلقة من مسلسل “عرايس خشب ” وصدقني عمرك ما هاتكررها تاني أبدا.

– لأعلى سعر .. التجربة اثبتت ان سارة سلامة بدون هوت شورت ممثلة عادية جد.

– أمينه خليل اكتشفت ان حبيبها خاطب واحدة تانية ” لا تطفئ الشمس” وإنجي المقدم اكتشفت ان جوزها متجوز عليها “30يوم”.

– الحاله ج .. تحس انهم جمعوا الحلقات فجأة .. غلطات في المونتاح والالوان وحاجه مأساه.

– محمد ثروت مشروع بيومي فؤاد جديد في رمضان الحالي.

– اخر ١٠ سنين دوري .. ٩ اهلي ، ١ الزمالك ولسه بيقولوا عليهم قطبين.

– أرض جو .. لو فريال يوسف كانت راجعه من رحله عاديه مش من طياره مخطوفه ، كان اهلها ممكن يستقبلوها بحراره اكتر من كده ومش بعيد كانوا راحوا خدوها من المطار مش الـ living room.

– أرض جو .. فجأة جالي احساس ان غادة عبدالرازق بيحققوا معاها في جراج “اركان” مش في امن الدوله.

– رمضان كريم .. روبي طرحت سؤال وجودي في غاية الأهمية ” هو لسه في حد بينقي الرز ؟”.

– في الـ لا لا لاند .. محمد سلام .. ياخوانا ياخوانا.

– لزمتها ايه الكوارع كنا كلنا كنتاكي.. ملخص حلقة اليوم من “هذا المساء”.

– اللهم اني صايم .. إلي حد كبير ماجدة زكي بدأت تكسر الحاجز النفسي اللي عند ناس كتير تجاه مصطفي شعبان ومسلسلاته.

– زي النهارده شوبير وأحمد الطيب ضربوا بعض ع الهوا في حضرة طيب القلب والذكر وائل الابراشي.

– مطبخ الست غالية ..الحاجة الوحيدة اللي ممكن تشوفها علي القاهرة والناس في رمضان.

– 30 يوم .. تخيل ان باسل خياط هو اللي عامل دور اسر ياسين تفتكر كان هايعمله ازاي؟

– لا تطفئ الشمس .. حتي الان ، مش لاقي تفسير منطقي لاعتماد محمد شاكر خضير علي السوري جهاد سعد بلهجته المصرية المتواضعه غير ان فاروق الفيشاوي كان مشغول بتصوير قصر العشاق.

– بعيدا عن جن “كفر دلهاب” وعفاريت “عدلي علام” ، غرابيب سود اكتر مسلسل رعب في دراما السنة دي.

– بالمناسبة ، حلو انك تعمل مسلسل تعرف بيه تاريخ الجماعة ، بس الأحلي انك تعرف شباب وقيادات الجماعات الارهابية والتكفيرية بيفكروا ازاي الان.

– غادة عبدالرازق اخوها ارهابي في “ارض جو” ، وعمرو سعد اخوه ارهابي برضه في “وضع أمني” .. سبحان الله علي توارد الخواطر.

– هو عمرو يوسف مخدش باله ان البيت اللي عايش فيه مع كنده في اعلان نيوبولس ، غير البيت اللي عزموا فيه مامته في اعلان فودافون.

– ‏ الكلام الكتير مالوش لازمه لو مش هايغير حاجه .. ظافر عابدين “حلاوة الدنيا”.

– هيواجهك وانت بتطارد لعنات الشياطين شر البشر و دا مفيش اسوء منه.. “كفر دلهاب”.

– اخر حاجه ممكن تتوقعها ، هي اول حاجه ممكن تتحقق في الزمن ده ..عادل عبدالرازق “ارض جو”

– لو مكوناش هنشغل القران في رمضان هنشغله امتى؟ .. كريم عفيفي “رمضان كريم”.

– تاخدي درينك يا بيلا؟ .. لا يا حبيبي أصل انا لسه مصلتش العشا.. زكي فطين عبدالوهاب ومها ابوعوف “لا تطفئ الشمس”.

– ربنا يرحمك يا أمي ويرحم أمهاتنا جميعًا ويخلي أمهاتكم يارب.