عبد الله غلوش يكتب: غلوشيات رمضانية (5)
– لا تطفئ الشمس .. تخيل ميرفت أمين مخلفة ٥ عيال ، وتقولك انا محستش أن أنا عايشة غير لما جوزي مات .. أومال لو بتحبه كانت خلفت كام؟
– ربنا يرزقنا بأصحاب جدعة زي حنان مطاوع في “حلاوة الدنيا” ويكفينا شر الأصحاب الواطية اللي شبه زينه في “لأعلي سعر”.
– كل ما الدنيا تزعلك أو تيجي عليكي ، افتكري إن إنجي المقدم . متجوزة في رمضان السنة دي أتنين واحد اتجوز عليها “30 يوم” والتاني بيخونها مع واحده اد عياله” لا تطفئ الشمس”.
– لليوم الثاني على التوالي ، في الـلالا لاند .. حلقة خالية من الضحك ، منزوعة الأفيهات.
– واحة الغروب .. اللي حصل بين خالد النبوي ومنة شلبي في حلقة النهاردة ، أبسط دليل علي أن العين فلقت الحجر فعلا.
– مصطفي شعبان دخل بيته فجأة لقى مراته بترقص ” اللهم اني صايم” ، في نفس اليوم محمد لطفي دخل بيته فجأة برضه لقى مراته بتعلم بنته الرقص “رمضان كريم”.
– سلوى عثمان .. كريمة مختار الجيل الحالي.
– أرض جو .. الممثل هيثم شاكر .. يجي منه.
– أرض جو .. تتفق أو تختلف مع محمد سامي ، لكن بمنتهي الأمانة غادة عبدالرازق معملتش مسلسل حلو من بعده.
– بالمناسبة ، هو محمد سامي ووليد منصور خدوا فلوس مقابل ظهورهم مع تامر حسني في إعلان فودافون ، ولا كلوا الكفتة المحروقة وخلاص؟
– بيقولك عبد الرحيم علي نفى مسئوليته عن تسريب حلقة النهاردة من “كفر دلهاب”.
– بنات يسرا طلعوا بيحششوا “الحساب يجمع” ، وهند صبري مدمنة سجاير كليوباترا “حلاوة الدنيا”.
– أحمد زاهر “الحاله ج” الظابط الفاسد الوحيد في دراما رمضان السنه دي .. متفهمش السيناريو ده فلت من الوزارة إزاي؟
– دياب ” كلابش” أقرب حد وصل لدرجة إجادة خالد صالح في تجسيد شخصية “أمين الشرطة”.
– هذا المساء .. الأنسة تُقي بتقول لأحمد داوود “ممكن تقفل تكييف العربية شوية عشان الدنيا حر” .. مش عارف جملة زي دي عدت أزاي علي الكاتب والمخرج والمونتير والقناة الحقيقة.
– صبري فواز ” الحصان الأسود” أفضل من صبري فواز “رمضان كريم”.
– أكبر فارق جوهري بين “طاقة نور” و “ظل الرئيس ” .. أن اللي بيضربهم هاني سلامة بيغمى عليهم ، اما اللي بيضربهم ياسر جلال بيفوقوا مرة تانية.
– 30 يوم.. ياريت حد يقول لوليد فواز أن الـ، vabe بتتشرب مش بتتمص.
– هالة صدقي راحت لعراف عشان ترجع لعادل إمام “عفاريت عدلي علام” و ريهام عبد الغفور راحت لعرافة عشان تخلف من شريف منير “الزيبق”.
– محمود الجندي اتقتل في “ظل الرئيس” ومجدي بدر انتحر في “30 يوم”.
– أخو غادة عبد الرازق سقط في أمتحان الخارجية “أرض جو” ، و إيمان العاصي نجحت في انترفيو الشركة اللي كانت متقدم لها “الحساب يجمع”.
– ظافر العابدين طلع عنده سرطان ، وكوع حوض المطبخ ضرب في وش حنان مطاوع.. ملخص حلقة اليوم من حلاوة الدنيا.
– واحة الغروب .. مش فاهم ليه مكنش فيه ترجمة على مشهد توثيق منة شلبي لعقد جوازها في السفارة.
– حرام انك تتفرج ع “الحلال” أكتر من كده.
– من صفات مواليد برج الثور أنه كداب وزبالة ودؤوب جدًا في شغله.. شيكو “خلصانة بشياكة”.
– دي الأغنية اللي حركت وجدانا وكل احساسنا .. بسمة وهبة معلقة علي أغنية “تسلم الأيادي” في برنامجها “شيخ الحارة”.
– الموضة اليومين دول، الممثلة تتحجب ولما يجي لها دور تلبس باروكة .. أحمد مجدي “لأعلي سعر”.
– الرجالة كلها بتكدب والستات بيعملوا نفسهم مصدقين .. ماجدة زكي “اللهم اني صايم”.
– ربنا يرحمك يا أمي ويرحم أمهاتنا جميعًا ويخلي أمهاتكم يارب.